ديوان الشاعر ( حفيد الحجيري )

الحجيري=
فالود ستلّ جناح الطير=ستلّ وقلبي على جناحه
يا سرور تكفى علينا شير=كيف الشقي يطعم الراحه؟؟
سرور=
الواقع . اللي معاك يسير=فشّرع المحبـيـن فالـسـاحـه
الحال يحتاج له تعبير=وسرور ماتقصّر شباحه
الحجيري=
من الجبل ما يجي تقصير=والواقع اللي يبا ايضاحه
بيني وبينه حصل تعكير=وباب الصفا ضاع مفتاحه
سرور=
واقعك في منتهى التكدير=البسني الهم بوشاحه
ومثلك له اسلوب فالتأثير= يرجعه بعد مرواحه
الحجيري=
يرجع و يد العزول تغير=وتحول عن راحنا و راحه
وانته شعورك له التقدير=كم همّ في داخلي زاحه
سرور=
عازلك قفل عليه السير=اقطع يدينه لاتجتاحه
يصبح ودادك معاك بخير=ويعيش والنفس مرتاحه

الحجيري=
نصيحتي يا وليف الطير=نصيحة أخوك ياخويه
إن سرت عاين طريق السير=لا تعاين لْفوق يابويه
وليف الطير=
نصيحتك تاجي وتاجك خير = يامن رششت الهوى بويه
وكلن حدودة تراها غير = واللي شِرِق يشرب المويه
الحجيري=
اللي ركوبه يا راضي عير=ما يميّز البنت والبويه
لكنّ تالَ الزمان أخير=ترك الجدالات واللويه
وليف الطير=
هذاك عقله فعقل ابزير = اسمع كلامي ومن فويه
اشوف مخضور علمه ضير = ياليت يرفق على سمويه

فاق اِشتياقي حدود الصبر= واليوم ياسي غلب صبري
ولو أدري ألقاه وسط القبر=قلت اِحفروا يا هَلي .. قبري

ناصر الحجوري=
حرفي يجي للخواطر جبر = وجرح الاسى بالوسى يبري
تلقاه بين الورق والحبر = مدفون في دفترك جبري

الحجيري=
يا عُمدة الحرف يا مربّي=أجيال ربتّ بَعَدْك أجيال
كلما الأمل ميل يقربّي=يبعدبيّ الياس عنه أميال
سالم البشري=
يابو علي من فضل ربّي=وانا اتشّرف صنعت رجال
وراع العزيمه يجد طبّي=لاصار فكره معه شغال

الحجيري=
عِشْقَك يابو خالد الخالد=ولّى ولا شيّ فيه يعيض
شفت آخرتها يابو خالد!!=كل المشاكل سببها (مْعيض)

ابو خالد=
عشقي طفل فاقد الوالد = والفقد خلى الدموع تفيض
ماهي على معيض والشاهد = المخطيه مالها تعويض

تكفى يابو متعب اِحضرنا=وألاّ لِحَضرم تركناها
لأجل إن ما شي يشْعِرنا=إنّا من أهلها و رعاياها

الحجيري=
البني طوبه على طوبه=متخالف البني ما يعمر
وحرية الراي مطلوبه=الشعر ما فيه خط أحمر

العم أبو سالم الرحال=
الكل يبنى على اسلوبه=كلاً على قد مايقدر
ومن خالف الساير دروبه=يندم على يومه الأغبر

الحجيري=
لا شك واللي شمر ثوبه=أكمامه الطايله تشمر
والحرف من ينزل حروبه=أعزل بلا سلاح . ما يظفر

العم أبو سالم الرحال=
السوق ياكثر مجلوبه=ماله حصر لو تبى تحصر
والبايره غير مرغوبه=لابد فالسوق ماتخسر

الحجيري=
على هلَ السوق محسوبه=إن تترك البايره تكثر
إنته وأنا ومثلنا وجوبه=يسعى سوى العذب ما يظهر

الحجيري=
بإسم الحجيري لماجلاااان=الصاحب الفارس الحلحيل
سلام ما يقبل النسيان=تاريخ يبقى مع أهل القيل
ماجلان=
رداً على ماوردنا الااان = من شاعر الطيب والتكميل
ترحيب يبقى مدى الازمان = كُل جيل ينقل صدااه الّـ( جيل )
الحجيري=
دام البقا والوفا عنوان=عن دربه أهل الوفا ما تحيل
والآن بسألك يا شيهان=وموجزك يغني عن التفصيل
ماجلان=
سلمت يا مجوْد السيسان = فالدرب حنا سوا مانميل
اسئل ونا مُصغي الآذاان = وتلقى الاجابة بلا تضليل
الحجيري=
يامن معاكم يطيب الدان=أشكي أسى فالفؤاد مهيل
ما تقتوي حمله الضلعان=له عام شام المحاني مقيل
ماجلان=
يا مشتكي من اسى واحزان = الوضع يحتاج له تحليل
هات الذي خافي الوجدان = قد ايش وسط الفؤاد اتشيل
الحجيري=
واضح ما يحتاجله تبيان=ينقال أكثر من اللي قيل
من يمسح الدمع والأعيان=ما تقبل المسح بالمنديل
ماجلان=
جاني صدى حرفك الرنان = فيه الاسى والدموع تسيل
وانا بوصيك يالربان = حتى الامل في سماك يخيل
الصبر طب الذي سقمان = لاصار مافالامر تبديل
والقسمة الي من الرحمان = عن دربها مالكم تحويل

أبو سرور=
سلام مبروك لآفيكم = علمٍ لفانا سررنا به
أطيب شذا الورد نهديكم = من فن زانت هناديبه
الحجيري=
ترحيب وافي يوافيكم=يامن هدى الورد فكتابه
الله يبارك لنا فيكم=يا حر في راس مرقابه

البيرق المنصور=
لي ود ماسدد ديونه = لكن يبغى يروح الحج
هل تستطيعون تفتونه = وتجاوبونه عشان يحج
الحجيري=
ما أفتيك . والشرع قانونه=يابو حسن كالنهار أبلج
حِجة معنّيك مرهونه=يا رخّصه طالبه ؛ يا أحتج