ديوان الشاعر/ سعد المحمدي

جيت اعتذر ماتفيد بعض المعادير
من الضبيس معرب الجد والخال

طيب وطيبه طيبلي يالمناعير
وطيبه عندي لها فال وعقال

يبقالها بالقلب حيز وتاثير
اجنيهها بجنيه وريال بريال

يامعزب الخطار ريف المسايير
سلام تسليم الوفاء قدر وجلال

يعم بالقاعه جميع الجماهير
ويخص راع النوب مذكور الافعال

مالاح براق الحيا بالمزابير
وجاله على ديرة هل النوق همال

والسيل عم ديار برص المواخير
بعد طلوع سهيل في عدة اليال

ماجيت يامحمد على شان تصوير
وماجيت لشهره ومامطلبي مال

جيتك وفاء معزوم ضمن الشواعير
ويكفي من الدله عن الزاد فنجال
.
يالله حسن الخامه والتياسير
بالساعه اللي مابها شك وجدال

خلف بن غالب المريخان

سلام …ياشاعر …بالطيب …متبيّن
لو ديرته سمّيت بالاسم مندسة

شاعر ولا هو على الا خصام بالهيّن
ماضاق من كثر حساده ولا حسه

يدين …ويخلص ..المدّان …ويديّن
كم واحد عاد عايف عقب ما جسه

سعد يضد ..الضديد.. وللو في ليّن
كم …عايلٍ ..لا ترع …بالهرج ينتسه

والدار.. والاسم ..بالامجاد ..متزيّن
تاريخهم ..كاتب التاريخ ..ماهسه

"""""""""""""""""""
سعد المحمدي

يامرحبا لو سلامك عذب ومطّين
حبال متلويه وحبال ممّتسه

حطيت بالدرب تحويلات وكميّن
والغام جنب الطريق الزين منحّسه

وانا ياريف النشاما حذر وفطّين
اجنب الشارع اللي باخره عسه

برجالها الدار خل الاسم ياذهّين
السم بالسمن يابن العم لادسه

يامحزمي كل هرجك زين ومزّين
وانا من اللي يعرف الهرج ويحسه

جيت المكان اللي دعاني مجيه

مجابني ماسور ساري هوا نوف
رجال وفهم ماعليه وليه

من بعد ماني صرت بالامر مكلوف
اخاف يلحقني ملام وزريه

جيته وانا بين الشواخيف والخوف
كله لعين الجادل الغشمريه

وبنيت به بيت ٍمسلح ومسقوف
يذري وله في جمرة القيض فيه

للجاهليه فيه طوفن على طوف
وللحق فيه ارسوم ماهي خفيه

يشوفه اللي للمصابيح مايشوف
ومايشوفه اللي ماب راسه حميه

سلام ياراسي من الجوف للجوف
ومن الحجاز يشق نجد العذيه

لو اللاذان لكل خايف ومخفوف
ارخيتها مارقبت قمة طميه

يامدعي ماتدعي فيه مكشوف
عقبت بالمضماه كور المطيه

علي ماذكرلك جمايل ومعروف
قدام والابعد ذيك القضيه

تمرني والا تعدى يابو زيد
الله يسهل دربك اللي مشيته

مع السلامه وكد العلم تاكيد
من لاهتدى درب السنع ماهديته

انا ليا شان اللغى يالمحاميد
اما هدمت البيت والا بنيته

النفس عن درب الخطاء والمناقيد
في راس كايد للمراجل رقيته

من لايدل الضاميه للمواريد
لو ماه من نقع الصفى ماضميته

اهداء للاخ الشاعر سعد بن دومان المحمدي

عبدالعزيز بن براز بن مريخان
ابو فيصل

سلام ياشبل المحاميد والطيب
ياصامل الوقفه وراع الرجوله

سلامً احلى من لبن شمخ النيب
ياتيبه الحلاب ساعة حلوله

سعد محمد من محاميد ما يخيب...
لاخاب خطو الامعة والملولة

شاعر كبير وماضيله تجاريب
ودون القبيله مايعقل ذلوله

فيه الحمياء حاضره ما والله تغيب
تهابه الشعار من طيب قوله

يستاهل الكرمه وطيب المطاييب.
. رجلً كريم اوما ضياتن فعوله

هاذا جوابي وانت فاهم اما يصيب
عامين راحت ونتحرى وصوله

وسلم وسلملي علي عيال وصحيب
واللي تعزه من جميع الحموله

!!!!!!!!!!!!!!!!!!!!!!!!!!!!!!!

رد سعد المحمدي
يامرحبا مالاح برق المناصيب
وهلت على نجد العذيه ثعوله

ببيات راع الطيبه والمواجيب
سمي من وحد قبايل ودوله

بالسيف والحكمه وعوج المشاعيب
ماجاه حكم المملكه بالسهوله

مدحك يابو فيصل عريب المجاذيب
من طيب راس ٍ جعل مالله يزوله

لابد ماياتيك مني مناديب
اجيك واخذ لي على نجد جوله

البعد عايق والليالي مجاديب
واحيان مابالجيب عندي سيوله

ماقل ياحلو النباء والاساليب
ان دل يكفي والذلول معقوله

رفيقك اللي في حياتك معاديك
ماهو بشافع لك نهار القيامه

خله بعيد ولايقرب حواليك
عيد على فرقاه واذبح سلامه

اليا عجز من طيب راسك يجاريك
عاداك دون اسباب حسد وغشامه

لو قال لك من قال هذا بناخيك
ماهو صحيح ولا تصدق كلامه

ياسامع اسمع قول راعي صمايل
لو ماتقوله بالزمن ماشحنا

كلام من غنا جديد المثايل
اسمع كلامه يوم بالجزل غنا

لاقال ماهو ياجودي بي قايل
على الصحيح بيوت شعره تبنا

للغير فيه من الرسايل رسايل
والا انت مانته بالشعر ماتمنا

حنا عيال الولد طيب وسلايل
ماحد علينا شاخ ماهو بمنا

والله مالجدك علينا جمايل
يامزور التاريخ لاتمتحنا

لنا بواد الحمض دار وفعايل
وفي نجد تنبيك التواريخ عنا

تحدنا بالدار عدة قبايل
والا انت وسط الدار كفك محنا

جيناك يوم انك شكيت الغلايل
من فوق خيل ٍ للمعارك تعنا

وفي يوم شجوه بالحجج والدلايل
مافيكم اللي سأل والا تعنا

لوماعلينا ميل والحمل مايل
عليك ياللي عن لزومه تثنا

لو جيتني فازع على كور حايل
حمست لك فوق احمر الجمر بنا

الطهبله ببثوث بث الهزايل
خلتك تسرق زادنا من صحنا

وحنا مجرينك بيوم الهوايل
الصيت صيتك والمجاويخ حنا

ماقول فيك قصور ضمن الحمايل
منته خفي من شامنا لايمنا

لكن فعل متعبين الاصايل
لاتجحده وتقول كنا وكنا

اللي يخصك غنبه فوق طايل
لو مالحنك اليوم يشبه لحنا

من يوم حثيت القدم بالقوايل
وقفت ضعونك مجنبه عن ضعنا

بعد السكوت اللي مضي جاك سايل
عن ماتقول يالبعير المثنا

لو الكلام احيان عيب وفشايل
ياطيب رجال ٍ بهرجه تئنا

وقاس الامور وعن طريق الهزايل
عطا طريق الميمنه ورجهنا

اخيل براقٍ سمربالمخايل
ليت المخايل بالحما مامطرنا

مع قدرة المولى مزونه ثقايل
اليا رعد منه القلوب الرجفنا

وبله من السم الصقطري تهايل
على بطون الاوديه ومحلنا

اصبحت وعيوني لبرقه تخايل
وانا بدوي وهجوس فكري سرنا

مدري هواي معبسات الشمايل
والا هوايه مع هل الفن فنا

يامقرب الكبريت عند الفتايل
وين انت عني يوم غزوة مهنا

الضد لاضدك عطيت الخمايل
وعلى الرفيق بكل ليله تجنا

يقطعك ياراع الحيل والتحايل
ياعل مالك عينه في وطنا

البارح وعيون الانام غافيه
غلطان ياللي تحسب العين غافيه

كبد السماء غيبت غايب نجومها
لو ان مالاجوا بالاسحار صافيه

ماسهر عيوني حب ملهوفة الحشى
اللي جدايلها على الردف ضافيه

والا عاشقٍ دنيا كفى الله شرها
منها السلامه ياهل العرف كافيه

مريت في بعض المداهيل يومها
وذكرت يوم العب والاقدام حافيه

هذا محل البيت والنار والحطب
تقول شبت بي لو النار طافيه

من البطاء بعض المعالم نسيتها
ونشدة ماحصلت الاخبار شافيه

يزورني طيف الديار وخيالها
والله ماجفاها لو الدار جافيه

اليا دعتني قلت لبيه ديرتي
بالبنه والا عن الناس خافيه

غنيت من جزل التماثيل مسحوب
نوادر ٍحاسوب راسي رصدها

نقحتها عن كل هفوه وعذروب
ماتموت لاغنيتها في مهدها

وارسلت فيها من هل الطيب مندوب
غالب عسى دنياه يقبل سعدها

جار وخوي من خيرت الناس محسوب
ماعمر جيرانه بهرجه لهدها

يابو وليد من العسل صافي الذوب
غلفتها يالوايلي وعتمدها

الطيب الوافي عن الطيب ينوب
قالوه قبلي ناس داخل لحدها

لسمي من وحد دويلات وشعوب
بعد الفقر والخوف عشنا رغدها

حفيد ابن داله ذرى كل مرعوب
عقيد يوم الخيل تركض جهدها

اسمٍ لمع قدام يبنا بها طوب
والارض جردا ماتعمر بلدها

ابن فلاح اللي من الناس محبوب
مفراص ماص يحل كايد عقدها

كريم ساس اكرام ماضي ومن دوب
ابيوت بعد ابيوت عالي عمدها

ربعه بني وايل ستر كل رعبوب
لاسيقت العطفه وهلت جعدها

وصاحت لمن يثني ورى كل جندوب
من السطر للقوم تشر بيدها

ولحقو على ضمرتجوب الوطا جوب
وخيلٍ يعيف اطرادها من طردها

وردو جميع اللي من المال منهوب
في يوم يعرف شيبها من فهدها

جنابهم دايم من الخصم مهيوب
شهادةٍ عندي محضر سندها

غير السلام اللي مع الطيب مصحوب
ماله هدف راعي قصيده قصدها

يازين مابين النهود المزابير
ماتحطني مثل السجين السياسي

الصبح من دوني تزر الازارير
وتلبس عليه من جديد الباسي

وبالليل خفف من قيود ومحاذير
عني وعنهن يابعيد المراسي

وتردني مابينهن وصة الطير
لايكشفون امري من الناس ناسي

تعبت من لفح الهوا والمعاصير
العمر قضيته كفاح ومأسي

مابين يالمجمول دهم الطوابير
هرولت لاما شيب الوقت راسي

واليوم متقاعد ومامن مشاوير
كثر الفراغ اخاف يقتل حماسي

صحيت من حلم ٍ تفاصيله اتثير
لاني لحالي ماش حولي حساسي

بعض الحلوم تخدر الجسم تخدير
ويصير فيها مثل لعب الكراسي