ديوان الشاعر عجاب صالح الحنتمي المزيني

يالعيد شاريلك .. جديد .. الثيابي
جعلك علينا تعود بالخير ..يالعيد
لو ان صبحك من .. سبايب ..عذابي
اضحك وقلبي فيه مثل .. العباريد
واقنب قنيب اللي بروس الهضابي
يبي العشا سرحان وافلس من الصيد
لين ... الثريا ... قربت ... للغيابي
والليل يطوي في عباته .. من البيد
يوم ... اتذكر ... طيبين ... الجنابي
اللي لهم في صفحة المجد .. تخليد
فيهم يارب الكون .. تجبر .. مصابي
اقفت بهم دنيا .. الشقى .. والتناكيد
معهم قضيت ايام .. زهرة .. شبابي
واليوم في وجهي تشوف .. التجاعيد
شايب ووقتي بعد .. كبري .. سطابي
شوفي قصر والحال ينقص .. ولايزيد
وان كان .. ماقدمت .. قبلي .. زهابي
بعدي لو املك مال .. قارون .. مايفيد
يالله ... حسن ... الخاتمه ... والثوابي
وعفوك نهار تشيب .. فيه .. المواليد
عجاب صالح الحنتمي

البارحه يوم الخلايق خواشيع
سهران حتى غابن الغايباتي

لاعاشقن بيض البنات المفاريع
ولاحب للدنيا بتالي حياتي

مودع الدنيا من العام توديع
شايب وماعندي عيال وبناتي

اخاف لاركعني الكبر تركيع
ابقى وحيد بسيتي واحسناتي

في دار مافيها رفيق ومنافيع

علي كل ابوابها مغلقاتي

من بعد ماراسي يشم الذعاذيع
والرجل ترقب عالي النايفاتي

سود الليالي بالغرايب مضاريع
وبالقلب بعض سهومهن مدمياتي

فكرت حتى صدع الراس تصديع
وطلبت من رب العباد النجاتي

عجاب صالح الحنتمي

نفسي قنوع وعزها راس مالي
ومن لايعز النفس لابد ينهان

لاشفت مايكدر من الناس بالي
ماني على بعض المخاليق شفقان

اصد وبعد عن مجاله مجالي
الحر مايرضى مذله وحقران

الوقت يمشي عكس والحمل مالي
صحيح والا ياهل العرف غلطان

اليوم من ماصار كني لحالي
لو ماتمشى ينفجر في شريان

سجت خلا بين السهل والجبالي
على طلوع الشمس والا مسيان

رجم اتعلابه ورجمن زمالي
برضن خلا ماشوف لناس زيلان

اخير من خوة قصير الحبالي
راعي مصالح لانتهت بالزمن شان

عجاب صالح الحنتمي

عجيب ياعجاب امر. نشوفه
تغيرت عند الرخوم. المبادي
امور صارت قبل ماهي معروفه
مذاهب العالم طلاه السوادي
يازين وقت زل لو به. كلوفه
يوم ان كل للمراجل... ينادي
وقت مضى نشوف ناس عطوفه
ماهم من الي ضاع وقته رقادي
الي مافيهم للضعيف. مروفه
محافته باللطف بعض الايادي
واليوم رجل الطيب قلت وصوفه
والطيب لاهل الطيب مثل القنادي
والوقت لو تقسي علينا ظروفه
حنا ماحنا عن دروبه شرادي
واليوم حنا في امان وتروفه
والي قدا ماطاه ماهو بغادي
ماغير سلوم لاهله.. معروفه
سلوم الابا ورثه نقلها الجدادي
وعشنا يابو صالح بوقت الحفوفه
وصارت لنا اطناب وارست عمادي
وياما على الطيب من اشيا تطوفه
اما جهل ولا ارتكبها. اعمادي
والطيب لو بكتب بدمي حروفه
ماوفيت حقه بس هذا اجتهادي
سليمان بن علي السرباتي


/////////////////////////////////

الله من قلبن همومه تلوفه
لوف الهوا لزرع بقران حادي

وياعيني اللي كن فيها نشوفه
بالليل يحداها عن النوم حادي

اسباب والاسباب نفسي عيوفه
طموح ماضريتها لدوادي

عن مجلسن قامت توافد ضعوفه
سوالفه دايم على غير قادي

ابعد عنه بعد الكرك عن هفوفه
عزيز نفس وفي مر وجلادي

من بعد نبذه يامكرم ضيوفه
عن ماب بداخل يالرفيق الفوادي

اللي تشوفه يارفيقي نشوفه
يالله تهدينا طريق الرشادي

اليوم حتى اللي ماتندى كفوفه
حطوه ياسليمان راعي شدادي

يشوف في نفسه عن الناس شوفه
وان صملو بالراي ماله منادي

هذا ومثله ماعليهم حسوفه
خذ علم ياسليمان مني وكادي
عجاب صالح الحنتمي

سلام ياريف الخوي والقرايب
ياطيب الرفقه بعيد المهاذيب

غالي ولك تقدير حاضر وغايب
عند الرجال مكملين المواجيب

دايم ورايك ياابيض الوجه صايب
مانته من اللي يخطي الراي ويصيب

صاطي ليا شانت وجيه القلايب
به يفرحون مدورين المعازيب

ابوك قبلك يوم عصب العصايب
ياما عصب راسه على العز والطيب

ملفى لحرب ومرتكي للنوايب
من بعد ينصونه عريب المناسيب

من روس حنتم ناطحين الكتايب
ان صاح صياح الضحى بالمراقيب

لاطوحن بالصوت شقر الذوايب
ردو بحدبن تدب الخصم تاديب

ربعي ذرايه عن سموم وهبايب
لاغثربت سود اليال المشاريب

محسن لربعه مثل غر السحايب
شوحه سما ماهو قريب محاضيب

عن زلتن من دون قصد وسبايب
يقفي كما يقفي عن الميته ذيب

عجاب صالح الحنتمي

ياموتري عسى العواكيس تخطيك
عليك اسج اليا طرت لي طواري

علي لاكثرت هجوس ودواكيك
عرضت خشمك للهوا والبراري

عن زحمة الاسواق مبعد مساريك
قدام مالاصبح تطلع مواري

بالكاش عن منة هل المن شاريك
ياعل ماتجري عليك الجواري

وناستي يانجد سجت سحاريك
بعيد عن ضغط البلد والحواري

يانجد من صغري وانا مغرمن فيك
حبك مع الشريان بالدم جاري

ياعل همال المراديم تسقيك
يومين ولثالث لباذرك طاري

يانجد حبك شبك القلب تشبيك
لك اعترفت برغبتي واختياري

عجاب صالح الحنتمي

يالله ماطلب غير عفوك وحسناك
رحمتك يارزاق عمي الافاعي

عبدك يدور مغفره منك ورضاك
قنعان من دنيا الترف والمتاعي

مالي ولد فيها يناديك بسماك
دعوه بظهر الغيب بعد الوداعي

عليم في حالي ولا شي يخفاك
انت الوحيد اللي لك العبد داعي

الراس شاب وزادني هم ورباك
وقتن يخلي مقدم القوم راعي

يالعبد لاتامن صواديف دنياك
تقبل وتقفي بين يسر ونزاعي

قدام مايحدك زمانك على اقصاك
من يسرها للاخره خذ متاعي

قال الشريف حسين لاقلت اشياك
بمعلقه ينصتلها كل واعي

لاقل مالك ماتفيدك دناياك
تضحك عليك اخبولها والرعاعي

نصيحتن ياباغي النصح وعفاك
عن الطمان تنزلك بالرفاعي

عجاب صالح الحنتمي

وجدي وجود اللي بعد شبت النار
ونجرن على صوته يجون المسايير

وصينيتن يلقابها الضيف والجار
حيلن تقلط بعد كيف المباهير

يجونه الخطار من كل الاقطار
وجهه بشوش وماحسب للمخاسير

واليوم دارتبه دواليب الاقدار
ماصارله في تالي العمر تقدير

حطوه رادين العمل داخل الدار
اللي من اول عند بابه طوابير

هو ايتوجد مامضى له ومنهار
ودموع عينه فوق خده حوادير

وانا اتوجد يوم للبدو محدار
يوم السنين الاوله والمظاهير

وشوف القطين اللي على العد حضار
وصوت الرشاء فوق المحاله على البير

وسوالف الشيبان وافين الاشبار
اهل المعام البيض ستر الغنادير

ياطيب جيرتهم مواريث الاخيار
اكرام حتى بالسنين المعاسير

هذا منايه ياهل الكيف والكار
لو ان وقت اليوم عن مانبي غير
عجاب صالح الحنتمي

ياليت لي من نخبة الوضح حاشي
ياخذ من الكنق المسمى حلايا

بعير من قبره عساه النواشي
مافيه يوم الا تعله نزايا

حربي ولد حربي ترعرع وعاشي
على العلوم الغانمه والحمايا

عن نخبة النخبه يطول النقاشي
مرحوم ياعليان ذيب السرايا

عنه النخب لقبل تقفي طاشاشي
جمل وكمل يوم رد البرايا

انا اتمنى والتمني بلاشي
وان حققه ربي عليم الخفايا

اشريه وابيعه بعد عام كاشي
ربحان واحقق ببيعه منايا

خلاصة الموضوع يكفي معاشي
النفس ماعودتها للهدايا

نوهة لايلقون فيها الخشاشي
ثغره تفرح عاشقين الزرايا

عجاب صالح الحنتمي

بعد البطى مريت ديرة خوالي
ياعل يسقيها من المزن همال

طرقي ومستعجل وماني بخالي
من الظروف وضيقت الوقت والبال

ياليتني ضليت فيها لليالي
واشوفها واقف على بعض الاطلال

على الحموديه وذيك التلالي
اللي بها عهدي وانا ضمن الاطفال

واليوم شاب الراس والحال حالي
تقول باريها من الهم سلال

فكرت في دنيا الفنا والزوالي
وايقنت مافيها مخلد بالاجيال

اموات وابناء اموات مابه جدالي
مات الرسول اللي عن الحق مامال

افضل اجلس بالبسيطه الحالي
راجي رضا من ثبت الارض بجبال

ماقلت ماهو من نسيج الخيالي
حقايقن ماهي سواليف جهال

وارجع وشيد بطيبن الرجالي
اهل المقام الزين ماضين الافعال

عيال حنتم طيبين القبالي
شجرة وفاء فيها عن الشمس مقيال

قدام يحكمها بعيد المدالي
عبدالعزيز الفيصلي طيب الفال

مايذبحون الا قروم العيالي
دون الجهام اليا اعتزا كل خيال

عجاب صالح الحنتمي