ديوان قصائد الشاعر(بخيتان البشري)

أنا مخفي عليكم ياجماعة حظي المقرود = ولا ادري كيف سايسني وطعته لين وداني
إلى قمة جبال الهم هو قايد وأنا مقيود = وتركني قال لك شانك وأنا بالمثل لي شاني
وقلت الخوة اللي وصلتنا حالي المشهود = وقال الحظ قادك لين جابك يالعريباني
وقلت ارجوك يالحظ الردي ياراعي المنقود = وقال المعذرة امزح معك ماترك وحداني
وقلت الصلح فيما بيننا ياصاحبي ممدود = قال أنا مسير ياصحيبي واخدمك لله مجاني
أنا ما اطلبك تصرفني وعلمك لايجي به زود= أنا عايش معك لورحت للمريخ تلقاني
وقلت السالفة تاهت ونبغى نعرف المقصود = تمدد قال انا حظك ومالي واحدٍ ثاني

دربي طويل وتايهٍ فيـه ممشـاي=مثل الغريب اللي مضيـع دليلـه
يحدني وقتي على ضيـم دنيـاي=ورضيت بالمقسوم حتـى قليلـه
يا طول صبري وآآآآه يا كبر بلواي=أخفي عن العدوان همي واشيلـه
أخاف أبوح بسد قلبي وشكـواي=وتصير نفسي بين ربعـي ذليلـه
أضحك ودايم بسمتي تسكن شفاي=ومن شاف حالي قال محدٍ مثيلـه
وأنا بجوفي هم والنـار بحشـاي=والجرح ينزف والليالـي طويلـه
والعمر يمضي بي وحاير بمسعاي=محروم من طعم الحيـاة الجميلـه
الياس حل وماتت اليوم رجـواي=ولا عاد لي غير الصبر من وسيله
يا حظي الباير تعثر بـك خطـاي=يا حيلة الله ما بقـي فـيّ حيلـه
يا الله يا عالم بسـري ونجـواي=تزيل عـن قلبـي همـومٍ ثقيلـه

ياماحلا الضمة على بحر الأشواق = تروي عطش منهو على الشط مكسور
يكون به موج الغلا حيل غراق = مبني على فتح الأحاسيس وشعور
وتعانقة شدة على جاله عناق = ويصير حرف الجر للحال مجرور
حتى السكون يهيم في جو الآفاق = ويصبح على جو المحبين منثور
والمبتدأ يسبق خبر فالهوى شاق = والحال وصفه من بعد كشف دكتور
الحب فاعل مرتكز جوف الأعماق = ومفعول به ودٍ منقا من الزور
كتبت ماتملي ترانيم خفاق = وصغتها بالنحو والكسر مجبور
ياللي تطيق وقلبي اليوم ماطاق = ارحم وخل أيامنا فرح وسرور

يابنت يابنت الاجاويد فوقي=صبرك على الدنيا وصبرك عليه
يابنت حبك وسط قلبي يفوقي=كل الذي فالكون وانتي بنيه
بالله يا بنت الاجاويد روقي=ما للشقا فالطيب يابنت جيه
يابنت لو تدرين وش في خفوقي= كان الغلا في داخلك نرجسيه
جرح الشعور من اقرب الناس عوقي=واحساسي الصادق عروقه نديه
يابنت حبك طوق القلب طوقي=والله يسامح كل راعي خطيه
يابنت لك في داخلي كل شوقي=اقدم الأشواق لأجلك هديه
يابنت في حبك سبقت البروقي=واجر صوتي باللحن سامريه
يابنت لاغبتي تيبس عروقي=واعوم فبحور الهموم العتيه

عشنا مودة مالها حد محدود = لا وعد اخذنا مع بعضنا ولا عهود
وإفراقنا ماكان فالبال موجود = تكفيني الذكرى من أحباب غالين
مادري وش اللي عكر الجو تعكير= لاهو شكى مني ولا شفت تقصير
مكتوب راده ربنا لازم يصير= تكفيني الذكرى من أحباب غالين
جنة بها الأثمار وأنهار وعيون = راحت هشيم وفوقها عيون يبكون
عيا الفرح يبقى من اللي يحسدون = تكفيني الذكرى من أحباب غالين
كان الأمل وطموحنا ما يتحدد = وفي كل يوم شعور فينا يتجدد
ومن بعد ماحلمي وحلمه تبدد = تكفيني الذكرى من أحباب غالين
الكل منا يرسم الحال مره = فيه السعادة كل ساعة تمره
واليوم بعد الوقت عانيت مره =تكفيني الذكرى من أحباب غالين
ياليت يالأيام ماشفت جورك = آلله لو تدرين وش كان دورك
ومن بعد قلبي حطمه لي غرورك = تكفيني الذكرى من أحباب غالين
عساه يذكرني كما ما ذكرته = ولو ماذكر من طيب خاطر عذرته
لا يانسانيس الهبايب شكرته =تكفيني الذكرى من أحباب غالين
با اعيش به ذكرى فباقي سنيني = عساه متهني ولا هو حزيني
صعيب لو جيته وأصعب يجيني =تكفيني الذكرى من أحباب غالين

لبيه ياصوتٍ زهم قلت لبيه = لبيه دوم الدوم ياعز غالي
اليوم أنا محسوب فالمجتمع بيه = مسرور مستأنس وفأعز حالي
قلي شعورك لا تحاول تخبيه = بإحساس صادق لاتجامل قبالي
لك عهد ماخونك ولك وعد واوفيه = لاطاب فالك أعتبر طاب فالي
جيتك غلا ليت التغلي تخفيه = وتبادل وصالي بمثله وصالي
ترى العمر لا راح يصعب تلاقيه = عيشه فرح ونهايته لزوالي
غلاك في قلبي أعزه واربيه = وضلوع له حراس فأول وتالي
يرسم خيالي من ملامحك تشبيه = ويقول فكري فيك زايد هبالي
أخذ مع الهاجوس سجة بك اتيه = وعقلي يميّز كل ميل وعدالي
اللي توده جاك ودك يلبيه = عجل ترى صبره به الوقت طالي
الشوق يآمر منك تأخذ وتعطيه = ولا تحكم الأشواق صعب ومحالي
قرر وصارح في قرارٍ تسويه = وانا أنتظر للمقبلات الخوالي

تـــــــــعــــال قـــــــــــــــلــــــــــي

يــا محـمـد الأيــام تـقـبـل وتـقـفـي =والكـل منـا ماعـرف حـكـم الاقــدار
تـعــال قـلــي لا تــحــاول تـخـفــي =يابـوك انـا ويـاك مـا بيننـا اسـرار
ابــوك فــي دنـيـاه مـاجــاه يـكـفـي =عاش الحياة وذاق فنجـال الامـرار
ليا انكشف سرك انـا ستـر يضفـي =ولو بعثرك وقتك أنا ظل وستار
باعيـش لـك صاحـب وبامـد كـفـي =تمشي بناالخوة على طول الاسفار
خلـك صـدوق ولا تـحـاول تلـفـي=لفتـك فعلومـك تسبـب لـك أضــرار
والعقـل زيــن و وزنـتـه لا تخـفـي =والنفـس لا تتـبـع هـواهـا وتنـهـار
وابعد عن اللـي لا هـرج مستخفـي =وتلقى العلوم الطيبـة عنـد الأخيـار
الكـذب لـو هـو بحـر بكـرة يجـفـي =وابعد عن اصحابه بوقتك هم كثـار
خـلــك عـلــم فالنـايـفـات ويـرِفــي =بادي وصيتـه تسمعـه كـل الأقطـار
وصلوا على محمد عدد مـن يقفـي =ويقبل على الكعبة حجيج ن وزوار

شمس الغلا

اللي معذبني وهو يا عـرب ميـت=يا كيف وضعي كان لو كان هو حي
انا أشهد اني من هوى البيض مليت=من عقب ذاك اللي طوى دنيتي طي
اعطاني اللي يملكه يوم انا اعطيـت=والكل منـا بالغـلا ياخـذ شـوي
اللي ليا منـه زهمنـي انـا جيـت=واللـي ليـا منـي زهمتـه يلبـي
شمس الغلا يوم اشرقت ما توانيـت=نورت منها في جبينـه لنا ضـي
ويوم الدروب طوال مادونها انخيت=سقت القدم لين القدم درهمـت بـي
لو كان تنفع كلمتـي قلـت ياليـت=ليت الليالي تاخذ الشـي بـا الشـي
جرحتني يا وقت وفالقلـب شبيـت=نار الغرام اللي كوت دنيتـي كـي
شمس الغلا غابت وروحي تناهيـت=وش عاد يبقى دام ماعاد لـي فـي
يالليل يا لليل الهـوى لو تواريـت=ما غيـره اللـي للواهيـب يطفـي
يعني كذا بذكرك والا تناسيـت=من مات مات وباقي العلـم مخفـي

هذه القصيدة بمناسبة قدوم أخو شاعرنا القدير / سالم البشري

المهندس / أحمد البشري بعد حصوله على شهادة الماجستير

من الولايات المتحدة الأمريكية

الا بسم الله أكبر ياهجوسي والأوامر جات =الا بسم الله ابدى والأمر ياهاجسي مني
بطيبة نفس والا بالغصب هلي لي الأبيات =ابى الأجزل وابى الأثمن ولاحدن عنك يمنعني
في بحر الفكر غوصي واخرجي من اطيب العذبات=انا شاعر ولد شاعر وابى شعري يشرفني
هلا يامرحبا ترحيب في حلة هل الطالات =هل التكميل واهل الجود فالأقنان والقني
هلا بضيوفنا عداد مايكتب من الآيات =وعدد مالاح برقن فالسماء والرعد له دني
الا مبروك ياسالم وهذي اسعد الحظات =وابارك للجميع وكل حربي قال شرفني
يعيش أحمد مهندسنا رقى للعلم والصعبات = جهيد ومجتهد ماقال ذا الغربة تعبني
دعس روؤس المخاطر ماحسب للمعضلة حسبات =نظر لنايفة واركز عليها والعزايم له تنادني
جويد الساس له نبراس ساسه من زمانن فات =على درب الجدود ذياب بالعليا تعوني
له التوفيق والتصفيق والفرحة لها دمعات =ولكني ابخفيها عسى ربي يصبرني
وقبل اختم سموحتكم ترى ماتوفي الكلمات =ولو بكتب دواووين الشعر ماظن توفني
وصلى الله على من فالحرم هلل وفي عرفات =على من شرف الأسلام والتوحيد والديني

بعد نسنس الغرياف في عالي المزبان =تهيضت وأطياف الهوى في حراوية
وجاشت هجوسي والفكر ينِشد الألحان = ويرسم من أيام الهوى والهواوية
ذكرت الهنوف اللي لها حشمة لها سلطان = على قلبي الولهان روحي بها حية
حياتي بعدها غيرت كفة الميزان = ذليل الهوى مطعون والجوف به كية
رماني زماني ونجبرت افقد الخلان = اغـني بصوت الذيب والاعب الحية
كتبت الشعِرْ والحرف من دُرة المرجان= نظمت القاف لعيون المها والنداوية
أصيلة ولابتها لهم فالملاقا شان = الأمجاد طالوها نسب عز حربية
ولية وعليّه بالمودة وفا وإحسان = تصير اسرارنا فقلوبنا صفحات سرية
الا يافراقٍ جاء ولا كان فالحسبان = عليه الحسايف تلتقي كل صبحية
اداري جروحي بالمدامع وبالكتمان =عسى بالعمر لو يوم يمي لها جية
اعاني من الحرمان وتعاني الحرمان = ولاشي بِيديها ولاشي بيدية
ولو نطري النسيان يامصعب النسيان = يتوه الفكر والروح لاشك منهية
وش اللي حصل مدري ولادري وش اللي كان = ولكني ادري بالآمل عايشة بية
حروفٍ على الأوراق والشاعر بخيتان = تعبر عن شعوره والأيام مطوية
وتبقى لنا ذكرى قصيدة مع الأزمان = تداول مع العربان برموز مخفية
تبقى ولا نبقى بعد نلبس الأكفان = وذي سنة حياة الناس ودروب ممشية