ديوان الشاعر/ سعد المحمدي

لو كللت هاك السنه بالنجاحي
تجارةٍ مابين جاحد ومجحود

يمديك مع نجد العذيه اتاحي
والذود مع واد الرمه يدحم الذود

اسمع يامال العافيه والصلاحي
كلام له معنى ومغزا ومقصود

من يوم صار بعد تيماء ملاحي
قفيت لو انه من البدو مارود

الله يسلم مخلبي والجناحي
وصبري على حامد على شان محمود
ماكل مايطري عليه مباحي
لي وعلي حقوق ياعمر وحدود

يالولد ياتاج راسي ياحزام الظفر
ياهل المواقف نهار الكايده والصعاب

انشهد اني بكم بين الجميع افتخر
واشوف نفسي محلق فوق متن السحاب

يوم المعارك لكم بالدار فعل وذكر
واليوم مع حرب دايم تعتقون الرقاب

الصف واحد ومتماسك سوات الحجر
صحيح من قال سيف الحرب حد ونصاب

ماعندنا في قبيلة حرب زيد وعمر
جميعهم بين خشم وعين عود وشباب

اهل الثلاث الوكاد ومدهشات البشر
الحالهن بالصداره لين يوم الحساب

ومن غيرهن فعلنا ماله زمان وحصر
مازال فينا الوفاء حتى يشيب الغراب

امسي بري واصبح من الناس متهوم
في دم علياء بعد مامات ابو زيد

والمتهم يبقى بري شرع وسلوم
حتى تتم ادانته يالاجاويد

برطمك ياللي تنفخ الجمر مشروم
حاولت اخيطه وانشرم رابع العيد

خذ علم مابعده وماقبله علوم
عليه خذ مني وثيقه وتاكيد

الروم شرهتها على عاقل الروم
ماترمي الشرهه على عاكس السيد

يامساعد يذكرونك من مساحه في مساحه
وانت امام بمسجد الحاره ومفتي بالسريه

ان نشدتك ياصديقي ماتعلم بالصراحه
والسبب يالوايلي مجهول والذمه بريه

انتبه للحارس اللي بين ضلع وبين واحه
من قنص ريم الفلا بالحال سواله قضيه

لو غفت عينه دقيقه لاصحى زهب سلاحه
عن ذياب الضلع حارس لرعاه ولرعيه

اسمع اخر بيت قبل النيل تقطعها سباحه
ماذكرت اعلاه كله مزح والنيه مطيه

غايب بحال وحال ماني بغايب
اتابع الاحداث ساعه بساعه
راس عليه احط عوج النصايب
وراس سبب في هيبته وارتفاعه
احيان مثل الطيب وسط المطايب
واحيان فيه للملكع لكاعه
وان شفت لي خايب يعزز لخايب
مالد عيني في رخيص البضاعه
بالسوق مالي مع جلبهم جلايب
ومكاسر التاجر على سعر صاعه
شوحي سما ماني قريب حضايب
مالي في بور السوالف طماعه
يامكثرين الهذرمه والطلايب
اقسم برب البيت ماهي شجاعه
عيب الكلام اللي على غير صايب
مافيه زود ومايشرف سماعه
الحر ياروس الفتن والمصايب
مايصير بين الناس مثل الاذاعه
مهما جراله بالزمن من شوايب
عن العلوم العوج عنده مناعه

ياليت ما رب الخلايق كتبها
لقمه تحورها على الكبد علقم

تفلتها يوم المعزب حسبها
علي كبر النير واغلى من الدم

ياللحيه اللي عيبها من شنبها
لناس عادات وتقاليد وشيم

من لايميز راسها من ذنبها
بضاعته بالسوق ماقلت من كم

نفسي عيوف وكل جزله طلبها
عن الطفايس تكرم النفس واكرم

يالعالم اللي فاقده نص ادبها
ماهي كذا حمر النعم تارد الجم

*يالله ياللي ماخفى عنك مثقال*
*مولج نهارك جل شانك بليله*
*عن الكلام الشين ودروب الانذال*
*اجعل لنا من نور هديك وسيله*
*من بعد ذكرك يوم حمل الجمل مال*
*وماشفت من عدل عن الميل شيله*
*اسرجت صفراء تفلج الخصم بالحال*
*وتهديه رشده يوم ضيع دليله*
*اليا اهتدى مالي ورا القيل والقال*
*مافات في بيرن رشاها طويله*
*وان ماهتدى جيته مجوخ وخيال*
*فوق الحصان اللي يروع صهيله*
*من دون حرب اهل المكارم والافعال*
*ان ماردعت اهل الفتن والفشيله*
*عدوني الفنجال في كل الاحوال*
*ماهي سوالف قاسمين القبيله*
*قولك زيود من اليمن مالها فال*
*بعض السوالف يالمسولف هزيله*
*وعلوم مايهرج بها غير جهال*
*بورة وباء ماعاد فيهم عقيله*
*متى كفلت اللي لهم فعل واظلال*
*لاتقول علم الا وعندك دليله*
*ياما لهم ناديت بالمرقب العال*
*وانجبت للاقصين بنت الاصيله*
*وصلت طلايعهم على كل مشوال*
*وزاحو جموعن في نحرهم مهيله*
*ربعي قبيلة حرب رجال رجال*
*عندي سوى والدم نفس الفصيله*
*نبغاك لاصعبت على كل حلال*
*دون القبيله فوق بنت الكحيله*
*وانته طعنت ظهورنا خبث وخبال*
*حطوك رادين الذمايم فتيله*
*ربعك مايلحقهم مشاريه وجدال*
*لاولذي وقت المحن نلتجيله*
*عوق العديم سيوفنا باشهب الال*
*محزل لنا لاصار بالوقت ميله*
*والله ماتمثل مواريث الابطال*
*اهل المكارم البيوت الظليله*
*لك خص لاتلعب على كل موال*
*وتقول سيل العرم جنب مسيله*
*ان محتوى الموضوع مدرك وعقال*
*طالت علومن ماوراها نفيله*

محمد عياد العروي

ياراع المحطه عب كل التوانك فل
حدتني هجوسن تشعف القلب وتلوبه

انا خاطري عاف المدينه وكل ومل
ولاني بها مرتاح والنفس مغصوبه

على قولة الشاعر رجاءالله فقيد الكل
عسى الله يبرد قبره ويغفر ذنوبه

اعالج مشاكل في مشاكل ودور حل
كما اللي يغسل الدم بالدم عن ثوبه

ابا سجها لو الدروب الطوال تعل
لكن الوكاد ان الخلا تطرب دروبه

يازين الفياض المخضره والمطر والبل
وشوف الخزاما والنفل زين دعوبه

هذا سايقن ذوده وهذا يبي ينزل
وذا عنده الضيفان والنار مشبوبه

*****************************
سعد المحمدي

ليا ضاق صدرك يامحمد توضى وصل
وتوكل على رزاق حوته ودغلوبه

يجيك الفرج من عالم الغيب لاتزمل
لو ان الظروف بقلت المال مصحوبه

لازانت مشاربها يابو طيف سم وعل
قبل ماتصير انقاض طوبه بعد طوبه

مع العلم كلن له هوايه ونهج ودل
تفاوت مابين الناس ياربي التوبه

على طاري اللي من رحيله تقل بي سل
اعيش الحياه احيان في وضع غيبوبه

اخير الكلام ومايفيده مادل وقل
عسى الله مثل ماقلت يغفرله ذنوبه

يمين لاعديت واحد وعشرين
بين الشعيب وبين عيطاء منيفه

عن المضيف اللي جداره من الطين
على ثغور الدار ليه وظيفه

النفس عن بعض البشر والدواوين
مهما حصل بالوقت حره عفيفه

حصان وابن حصان ماضي وهالحين
شريف واحب العلوم الشريفه

اليا تناسوني ضعوف ومساكين
اذكر عليهم بالامور المخيفه

الهرجه اللي ماعليها مضامين
تبقى بميزان الحقايق خفيفه

يكفي عن التفصيل بعض العناوين
وبعض الامور العين عنها كفيفه

بيض الله وجه ابو باسل منيف الهابس
عد من لبا بمكه في شهر ذلحجه

دون فعل الطيب دايم مايحبسه حابس
كن فيه لحل صعبات الامور موجه

فزعة اللي صار وجهه من زمانه عابس
الله انه يحفظه من وين حل ووجه

لانكسرت من الزمن كسر الجريد اليابس
وكل وادي ضاق في عيني عليه فجه

ماتذكر غير قرمن للفتايل قابس
واترك اللي لانخيته ضاع وسط العجه