ديوان الشاعر/ سعد المحمدي

*الموتر اللي عوجة الشاص عيبه*

*شراه عنتر للمكده وعافه*

*زادت عليه التكلفه والضريبه*

*وباعه بسوق المصلحه والحسافه*

*يافاقدين الطيب ماهو غصيبه*

*الطيب كايد والفعايل اغلافه*

*اللي يحوش الطيبه من نصيبه*

*مرحوم يامن شدني طيب قافه*

*شاعر وشيخ ومن عوارف عتيبه*

*حماية التالي زمان الحوافه*

*وانا بعد فحص العمى من طبيبه*

*في مختبر زاد الكلافه كلافه*

*لقيت بالقمح المصفى زبيبه*

*قبل الشريف حسين مدري خلافه*

*العلم يالصحاف وده وجيبه*

*سوالف الشيبان فيها طرافه*

عواض الشدادي

شعار يوم بكل وادي .. تهيمون
في شي لو قلتوه
.. ماتفعلونه

ينصحكم الناصح ولاتستجيبون
ويتبعكم الغاااوي وﻻتنصحونه

وياماكذبتم قلتم إنكم تحبون
والحب في وادي ولاتعرفونه

وياكم مدحتم ناس مايستحقون
وتركتم اللي واجبه تمدحونه


**************************
سعد المحمدي

اخالفك بالراي مبنى ومضمون
وغير اختلاف الراي مالك مهونه

صديق وبناخي وشاعر ودندون
منته من اللي زادهم يملحونه

لو كل شعاره مثل ماتقولون
الرسل واهل الدين مايسمعونه

صحابة المختار عنده يغنون
حسان ابن ثابت قرينا لحونه

اليوم مثل الامس والناس يدرون
والجزل ماملوه من يعرفونه

*سعد المحمدي*

*ماجاك مثل العام راعي بشاير*
*لو حلم بين الثانيه والدقيقه*

*في نشوته تبني صروح وعماير*
*وتهدها ﻻبان وجه الحقيقه*

*بعد انتهت بيام حرب الجزاير*
*حطيت لي سم الحنش في رحيقه*

*هدهد سبأ جابه مع الجو طاير*
*قصده يحط الذيب وسط الحديقه*

*ياود لو حطوك ضمن الشعاير*
*ولك يذبحون بكل ليله عقيقه*

*النور ماتخفيه سود الستاير*
*ياهل المكايد والجنوب الرقيقه*

*لقيت عيب سلاحكم بالذخاير*
*مايثور مابين الكمين وزريقه*

*****************************
*مجاراةالشاعر*
*تركي المحرول*

*كتبت درس لميتين الضماير*
*وبصدورهم من كلمة الحق ضيقه*

*ضاقت صدور مفتشين الصراير*
*ومن شم ريح الذيب جنب طريقه*

*تبي على الظالم تدور الدواير*
*وباكر غراب البين تسمع نعيقه*

*ولاهي غريبه يازبون الخساير*
*تملك من الامجاد صرح ووثيقه*

*يوم الزمان اللي به الرمي ثاير*
*شبيتها بوجيه الاعداء حريقه*

((سعد المحمدي))
بعد ديس المنيحه مابقى به مايبل الريق

تقول انت المبدا والهدف تمثيل وسياسه

سوالف جالها من سفرجي في سوقنا تسويق

بعد معلن زعيم المافيا عجزه مع افلاسه

مع الطاقه علينا بعد قفل الباب كيف تويق

كبيره وانت مايجهلك خف شعيل من راسه

*************************
(محمد عياد العروي)

تجف ديوسها والله عليه الرزق والتوفيق

‏عسى ربك يعدلها لو الاهداف منحاسه

‏علوم السفرجي كثرت علينا مالها توثيق

‏ليا طاح الحيا لابد ماتلفيك عساسه

‏لكن الصبر طيب والفرج ياتيك عقب الضيق

‏ترى الاخبار مكتوبة ومقرية وحساسه

‏*****************************
((سعد المحمدي))

محمد لاتسريها من الدره شمال طويق

عليك الهون لاما تفرق الولو من انحاسه

قضيتنا قضيه بين ابن صادق وابن صديق

لها فوق الشهر والوضع يرسم فوق كراسه

انا في جو مالي فيه حاجه مارغب التحليق

يكفيني من الدله ثلاث وبعدهن كاسه

اذنبت في مدحي لك العام واخطيت
خطية ٍ ياكبرها من خطيه

ياليتني عن كل حاجه تحريت
قبل ماتحسب من خطايه عليه

بالقصه اللي حلوها تقل حلتيت
كثرة بها برق البشوت العريه

ضحية الانذال فيها زناتيت
مابين بيع ومشترى بالقضيه

ياجرح لو طال الزمن ماتشافيت
ومالك علاج بداخل الصيدليه

ياليت للحيين هيبه من الميت
لو كبر يالنشاد عين المطيه

كافحت في دنيا الشقى لين مليت
اقدم الحسنه تجيني بسيه

سلام ياراع الوفى منبع الجود

يانايف الصديق ياشامخ الراس

متفقده يالقرم عن كل منقود

ومغلفه بالورد وعقود الالماس

ياصلك لو دونك مسافات ويقود

يجيك في ذكر الحيا كل عساس

وذكر الرجال اللي لهم فعل مشهود

شرواك ياحلو النباء طيب الساس

يالناحلي علمي سلامتك محدود

اخلاصته يالقرم مابين الاقواس

وان ماتهيا يافتى بعد مجهود

والله مايلحقك لومي مع الناس

انا مجرب بيض الايام وسود

وقت الرخا وايام الارياق يباس

*صالح براك المحمدي*

*بعض العرب حكمهم حسب الهوا والمزاج*

*من غير تفكير تلقى النيه مبيته*

*راع العوج لبسوه مبررات العواج*

*واللي على حسن نيه حرفوا نيته*

*ماترجي الناس حسنه من مهب العجاج*

*اكبر غنيمه يفك الناس من سيته*

*(سعد المحمدي)*

*يابو فهد نطلب الله بالستر والخراج*

*والعافيه في زمن ياكثر سلبيته*

*ماشفت غيرك يشوفه ياطليق الحجاج*

*الناس كلن حسب عرفه ونوعيته*

*وبل المطر ياولد براك قالو هماج*

*والحنظل المر قالو حسب ساقيته*

*(صالح المحمدي)*

*لله درك يابو تركي شعلت السراج*

*واضفيت نوره على صالح وقافيّته*

*لكن انا بنشدك ويش الدوا والعلاج*

*للي هوى النفس بالاحكام ماريّته*

*وان ماعرفت الدوا مالي عليك احتجاج*

*بعض العلل ترفق الانسان مع جيته*

*(سعد المحمدي)*

*تبغى اختصار الكلام اللي سوات الثجاج*

*اسمع كلامي يابن عمي ورمزيته*

*كان الدوا له علاقه في صدور الدجاج*

*ياليت راسك لنا يسلم بطاقيته*

*ماودي اطلع عن الموضوع خلف السياج*

*اخاف من شارع الخدمه ودوريته*

*يامعطي الأموات من ورث الأموات*

*خصمك نهار الأخرة من طوايفك*

*لاتشغل الساحة ولا تجلد الذات*

*راجع بعد سبعين حجه مواقفك*

*عكس الرضا يوم الخطأ بالملفات*

*دقت مسامير الخطر في مجادفك*

*الله خلق خلقه بدايد وقامات*

*وانا من اللي حول جملا مخالفك*

*******************

*الكلب ياراعيه وثق رباطه*
*قدام باللي تنزع الروح نرميه*

*خذها على ماقيل فوق البلاطه*
*ناويه واللي كون الكون ناويه*

*ارسلت نسخه واضحه للاحاطه*
*قال المثل من يجهل الصقر يشويه*

تحب الظهور بعيب غيرك وكلك عيب
ماتترك حركاتك وماتترك اسلوبك

نصيحه من اللي عارضه لاح فيه الشيب
لاتبحث عيوب الناس تبحث عن عيوبك

مايجهلك ياجساس بالحالتين اكليب
على موجة الارسال لاتفر حاسوبك

نبيها مزارق طيب بين الرجال وطيب
عط الناس واجبها وتعطيك ماجوبك

السلف معروف مايلحقه مني ملام
يشهد الله والملا يامشاري يشهدون

والخلف يارازق الطير يارب الانام
في سلفهم بين يوم ٍ وليله يلحقون

مانبي تشويه ماضي رفيعين المقام
علم اللي يامشاري بعلمي يجهلون

لابغيت الحر مايطير مع جول الحمام
عاعة الادياك واهتز غصن من الغصون

مابقي في عرش بلقيس ريشه من نعام
خمس يبنون المدينه وعشره يهدمون

كبدي اللي صايمه عن شراب وعن طعام
مرها مثر على القلب الابيض والعيون

ليت قلبي قلب يالايمي عجفى سنام
مايهمه بالزمن غير براق المزون