ديوان الشاعر عجاب صالح الحنتمي المزيني

يالله ياللي تفرج الهم والضيق
يافزعة المضيوم مادونك حجاب

يامسير الافلاك رب المخاليق
عبدك وابن عبدك لك اليوم طلاب

مالي بحبل غير حبلك معاليق
ياحي ياقيوم يارب الارباب

طالبك حسن الخاتمه والتوافيق
كبير سن وعارضي بالزمن شاب

من بعد مرقب عاليات الشواهيق
اليوم دوب ادف رجلي مع الباب

العام لعلومي وشوفي مشافيق
واليوم ياستار من بعض الاصحاب

عيونهم مثل الرماح المزاريق
ونفوسهم شينه عساهم للاسباب

ياهل الحسد يناقضين المواثيق
مبغى سوالفنا مشاريه وعتاب

مالله مضيقها على العبد تضييق
البعد راحة بال عن كلب الاطناب

واللي يشلق ثومة القلب تشليق
ويخلي ادموعى على الخد تنساب

يوم اتذكر يالرجال المطاليق
امي وابوي ومافقدته من اقراب

الموت غيبهم عساهم معاتيق
والحال بعد افراقهم مابعد طاب

شرحت عن وضعي بجزل الطواريق
اخترت صدق القول ماني بكذاب

عجاب صالح السالمي

هل الهلال وهلت العين عبرات
لو حدرن واد الرمه سيلنه

من ضيقتي سهران جفني والا بات
وقلبي صواديف الدهر حرقنه

ماعاد بالدنيا وناسه ولذات
مجابت الايام مني خذنه

يارشيد يامشكاي زبن الونيات
اللي نبي يارشيد يابعدهنه

ابعد عليه من اليمن للقريات
والعمر قفى والسنين اسهجنه

يالله حسن الخاتمه والسلامات
في يوم مابه غير نارن وجنه

يوم اتذكر بيت من جزل الابيات
مشهور واللي قايله بالمجنه

ابوي جعله في نعيم وملذات
مرحوم ياللي ماشكى الجار منه

ياما على الجاهل يفوتن الافوات
وكم عاقلن سود الليالي بالنه

عجاب صالح السالمي

ياوادي الجافي عسى فالك السيل
في ذمتي مانته على الاسم جافي

فيك الوناسه والسمر والتعاليل
وزادك وناسه مجلسن لبو لافي

وشرواه من خيرة زحول الرجاجيل
قبالهم عن ضيقة الصدر شافي

ياعل مابيني وبينك عراقيل
ومايذكرون اهل المواشي خلافي

كني ليا جيتك على شاطي النيل
لو عادتك مابين حر وسوافي

ضغط البلد يثر على الحال بالحيل
وانا بدوي سلواي جرد الفيافي

اليا غطا روس الشجر دامس الليل
سبحت للي ماخفى عنه خافي

وسميت باسمه ثم جبت المعاميل
الارض فرشي والسماء لي لحافي

يقطع خواء راسي ثلاثه فناجبل
وزادي من الميسور والفكر صافي

عن ماتريد النفس موجز وتفصيل
وضحتها للمستمع عبر قافي

وختامها يالله عليك التساهيل
في يوم بين ايديك عاري وحافي
عجاب صالح السالمي

عاد الشريط الذكريات القديمة
ومن ضمن ماعاده وانا الجفن سهران

قليب لعليان ربي يديمة
فوقه مقامه يارده كل ضميان

لو ماه مايكفي ظوامي محيمه
عنها مايمنع وارده ياهل الشان

عليه من كل الوسايم وسيمه
محط دونه راعي الجود حيطان

انشهد انه طيب راس وعزيمه
يستاهل البيضاء سلايل كحيلان

من قبل حكمن جعل ربي يديمه
عيال الزغيبي دون حلوات الالبان

لازان مضراب الغريم لغريمه
عاداتهم جدع المجوخ بالاكوان

ياعل تسقي دارهم كل غيمه
امين يمكن نبيه سليمان

الشاعر / عجاب بن صالح السالمي

البارحه بالقلب مثل البراكين
تثور تال الليل من ماجرالي

وبالعين مثل رهيّفات السكاكين
ماني من الهاجوس والحزن خالي

يقفي ويقبل بي عسى ربي يعين
ارهقني التفكير ما أرتاح بالي

احاول انسى وأتناسى عزيزين
عون الرفيق وطيبين القبالي

الموت ما أمهلهم عساهم عتيقين
للتف ساق بساق يوم السؤالي

من بعدهم دمعي على محجر العين
لو قلت سالي ماني اليوم سالي

اضحك واجامل مع بعيد وقريبين
والكبد يصلاها من الحزن صالي

كبير سن وصحتي بين قوسين
يالله يالمعبود تلطف بحالي

لا تردني لأرذل عمر قولوا آمين
وعني تجاوز يا عظيم الجلالي

الشاعر / عجاب بن صالح السالمي

لاناموا اللي من غثى الوقت سالين
حلو الكرى بالليل عيا يجيني

وان غمضت لحظه عسى ربي يعين
قمت اتذكر مامضى من سنيني

وذكرت عطف الوالدين العزيزين
ياعلهم مع زمرة الصالحيني

الوالدة في حضنها عايش سنين
ياعل قبر ضمها للغشيني

ينبت على جاله ورود ورياحين
وعنها يتجاوز باعث الميتيني

وابوي من عطفه مسح دمعة العين
ياعل حبله عند ربه متيني

ياليتهم باقي لهالحين حيين
وابرهم في كل لحظه وحيني

يارب ثبتني على الحق والدين
مالي هدف تال العمر غير ديني

يالعبد ماعندك على العمر تأمين
لابد مايبكونك الاقربيني

ماتجمع النمله نصيب البعارين
مثل من الامثال يبغى فطيني

الشاعر / عجاب بن صالح الحنتمي

شريتلي مستبيشي غال الاثماني
وكيلها معتمد بانحاء السعودية

قلت اتريح بها واقضي بها شاني
ديزل ماتصرف عليه بالشهر ميه

وخلال شهرين منها خاطري شاني
الزيت بالمختلط يادافع السيه

قرر عليها المهندس يابو راكاني
تخبيط والتكلفة جدا خياليه

انشهد اني بها بالحيل خسراني
ماجابت الربع في سوق الشريطيه


يالشروت الفقر جتها عين عياني
مدري خطاء مصنعي وانا لها ضحيه

عجاب صالح

ماني مخلي في مراحي ولا شاه
بلشت في ماها وغالي علفها

مع الضريبة والغلى زاد مشراه
الله أ يعوضني بها ويخلفها

مرتبي محدود والسعر ماقواه
والنفس عيا لايتحقق هدفها

أ فراق يادنيا الشقى والمعاناه
محد(ن) ضمن قبلي وبعدي ترفها

فيها السعيد اللي عرف وين ممشاه
ونفسه على مرضاة ربه عسفها

وتقبل القبلة وصلى وناجاه
وبه عاذ من غلب الرجال وصلفها

وابعد عن اللي هرجته في دناياه
لامرته عوج السوالف خطفها

وعن واجبه يعطي مع الباب علباه
نفسه دنيه مايهمه شرفها

الله لايكثر مع الناس شرواه
وعسى جميع اعضاه يشكي تلفها


الشاعر/ عجاب الحنتمي

ياوقت لاتقسى عليه تراني
شايب ومالي بالمقادير حيله

الحيل فاتر يالله المستعاني
من بعد مرقب فوق راس الطويله

خليت عشري بين خمس وثماني
وطيتك ياوقت المصايب ثقيله

انشدك بالله في فصيح الساني
لاتضدني ضد العميل العميله

النفس ماهي ضاريه للهواني
والعين براق المخايل تخيله

سجت خلا مع طيبن المجاني
في وادين توه مشى الصبح سيله

اللي يشب النار برضن بياني
واللي يصلي بعد فرضه نفيله

ثم اجتمعنا في رفيع المكاني
وقمنا نسولف بالعلوم الجميله

خمسين كيلو فاهقين المباني
لو الدروب اطوال معنا دليله

مثل الكريم اللي يحل الشطاني
سرحان ابو سلطان راع الجزيله

شيخن لو شان الزمن مرحباني
انشهد انه طيب راس وقبيله

وكل اخويانا من بعيدن وداني
والنعم فيهم عد وبل المخيله

هي غايتي مدام الانسان فاني
اللي رحل واللي قريب رحيله

عجاب بن صالح الحنتمي

القلب ماهو كل الايام خالي
لابد مايحسه مع الوقت حاسوس

اما من الاقصين والا الموالي
ولا شقى دنيا مثل شذرة الموس

ان قبلت مثل القراح الزلالي
وان ادبره ماقدمها داسته دوس

يالله يالمعبود تلطف بحالي
لاشانت الايام والحبل ممسوس

عليك في كل الامور اتكالي
وعوذبك من كل حاسد ومنحوس

ياعل مايبقى للانذال تالي
اللي بهم من علة الوقت فيروس

وانا ليازاد الغا والجدالي
في عين مبغضني تقل راس دبوس

للعقرب ام ذنيب جاهز نعالي
لاشفت راس اذنيبها تقل نادوس

وعلى رجال الطيب صدري شمالي
بعيد شوح وغايتي كل ناموس

الطيبه حطيتها راس مالي
والعايبه سلعة ملاقيف ونجوس
عجاب صالح الحنتمي