ديوان الشاعر بدر الهبيري

يالردي ماهمني هرج ٍ تقول ولاتهين=الاالردي مثلك ومن رام المعالي مايهاب
ولو تذم الذم عمره مايردي طيبين=يشهد الله والرجال شهود والمعنى صواب
واشهد ان المدح ماطيْب عفون الساقطين=والشهاده حق واللي تزعله لابد خاب
المعارف ماتعرٌض عند ناس ٍ عارفين=والضواري نبحها ماطال هامات السحاب
الدروب ادلها واعرف يساري واليمين=وان بنيت القاف وافي مانقص فيه الجواب
أركز المعنى ويفهم ماقصدت الفاهمين = والهبيله لو يشوف الما يقول انه سراب
ان مشيت امشي على سلم الجدود الاولين=وان نصيت فلا نصيت الا عزيزين الجناب
وان ضربت فلا ضربت الاعلى حبل الوتين=وان سكت الصمت بعض احيان هو عين الصواب
وان ضحكت اضحك طبيعي ماخذيت الاسبرين=وان حزنت الحزن عاده عندطلقين الاشناب
الردي ماشال هم وذا ترى علم ٍ يقين=والمعالي مالها الا من لها ساق الركاب
والمزون اللي تهل ولا مرابعها تبين=والله ان من خبث الارض اللي مغرقها السحاب
لايمي ماتدري انك تشبه ابليس اللعين=زادك النمه وغرات العرب عندك شراب
لاتكل ولاتمل ولاتجود ولاتعين=توهم الساري بعونه وانت ملعون الصلاب
خابرينك لو تمثل قصدك بوجهك يبين=لاتذرى بالعرب يامال قصاص الرقاب
جيت ابيْن ماحصل لكنٌ وجهك مايلين=تجهل المعنى ومثلك مابلغ فيه النصاب
ياقليل العرف قلي كان تفهم للرطين=وش رصيدك بالحيا مالك رصيد ولاحساب
حاجة ٍ صارت وبيْن ردها فوق الجبين=واحسافة من تعنى ماادرك افعال الخياب
حول خمس سنين والمالك يهين المشترين=ماجنى المالك عطاه ومملكته امست خراب
يامراجين العزيب ويامهادين القطين=والله ان اللي جرى علم ٍ مثل لون الغراب
العرب عافت عربها والبقيه مستحين=لارعى الله من رعى واطين يامال الذهاب
فيه حاجه صايره والناس فيها جاهلين=وان تكلمت الكلام يزيد حزني والعذاب
ياعرب قوموا ترى ماباقي الا كلمتين=( نخْ) ولا(طسْ) والمعنى موضح بالكتاب

قـالوا بدعـت القاف قلت ايه وابديه =للي يعرف الشعر مني تحيه
خمسة عشر مره وانا اشرح معانيه =ولااحد ٍ عرف معناه بين الدنيه
صاحبكم اللي كاثرات ٍ بلاويه=زايد عليه امن الزرايا شويه
ياحــــيف وان خابت بقايا هقاويه =ماعاد يبقىله بكم مقدريه
ماوده يلاقي عبوس ٍ يعاديه =ولا َ نفوس الخير دوم محميه
على ردي العرف مابه مشاريه=منه الخطا يدمح ولاهي اذيه
مايوذي الجاهل لو انه على تيه=توخذ له الزله على طيب نيه
يـِـعْـذر على ماقيل مما وقع فيه= وتصير له بين الخلايق خفيه
مير ان ابو وجهين زادت مجانيه =وقام يتخبط بين صبح وعشيه
وماضن له عذر ٍ يبرر تجنيه=ماله عذر عندي ولاله وقيه
النفس تنهاني وماوالله آتيه=اللي نهتني عنه نفس ٍ ابيه
اللي بمقدوري فعلته ولاابيه=مير ان بعض الناس نفسه رديه
بعض الخطا يودع بالافكار تشويه=بين الحنايا مودع النار حيه
والكذب ياراعيه بانت مواريه=واضح وضوح الشمس وقت ضحويه
ياكيف رجال ٍ فقدنا مباديه=مانشوف له ياكود روحه وجيه
ماهوبمن عندي كلام ٍ حكوا فيه=رجل ٍ بلا مبدا حياته دنيه
وكبوه بلاصحوه من ابليس مغويه =ورجل ٍ بلا كلمه عديم الهويه
ونفس ٍ بلا طيبه عسى النار تشويه= تمسي على ضو ٍ سعير ٍ صليه
وهرج ٍ بلا داعي عسى لسان راعيه= يـِـقطع من عروقه ولاهي خطيه
والغاوي ان كانه يبي نضرتي فيه=ماعاد له قيمه ولا له حميه
ماعاد باقي ل اسود الوجه تنبيه= ياعلها بالحال تاتي قويه
ياعلها تاتي وتقطع عراويه=يمسي عقب داره بدار ٍ خليه
ياتي جزاه وفعله الشين يذيه = ويذيه من جنسه بحلم ورويه
ولو اشتكى هذي ترا فعلة ايديه =مما فعله براعي الاوليه
هو يحسب انه يوم قفى بناديه=مايدري ان نفسي تشوم وغنيه
مايدري اني في مضى الحال ناسيه=ولاابيه لو عذره يسوقه عليه
من باعني بعته ولاني بباغيه=عساه فدوه للسنين الخليه
واصل معه ولا بدربه يخليه =النفس عافت شوفته والقضيه
وعندي خبر من قال انا فلان مغليه=الناس بين الناس ماهي سويه
والله ترا المغني ولاغيره ارجيه=فيه الرجا ماخاب رب البريه
اللي لعبده حافظ ٍ له مساعيه =الواحد الوالي جزيل العطيه

من بدرابن عيد الهبيري يااباالحار= سلام من صوغ الذهب فيه عينه
ماهو سلام اللي تبجّحْ بالاشعار= واهدافها يرفع رصيد الخزينه
انا اليا من قلت ماني بهذار= واثبت كلامي بالحروف الرصينه
ولااتعب على المعنى علشان دينار=ولااخبر حطيته مع الخلق زينه
ولايوم في شعري تلاعبت بالنار=ولااصيد فيه الاّ خطاة السمينه
وان هب لي ذعذاع الاشعار واندار=ماالحق وراه ولالْـطـَرْده رهينه
ولااخذت في شعري شهادات واشوار=من طلعتي وابيوت شعري حسينه
والشاهد الله ماعلى هرجي اغبار =دام المعاني والمباني متينه
واقول حق وكلمة الحق بااعيار = واعيارها دايم يصيب الضمينه
واليا مدحت امدح هل الطيب والكار=لااجل المدايح بالنشاما ثمينه
يابو علي ياحر من ماكر احرار=اهل العقول الراجحات الرزينه
ربعن مواقفهم لو ان الزمن دار = تبرز سواة اطويق ماهي دفينه
وابيوتهم للي عليه الزمن جار=شبهتها مثل الحصون الحصينه
ريف الخوي والضيف لاحلّ والجار=واللي بكبده من زمانه غبينه
يابوعلي يانسل وافين الاشبار= ياعل تفداك النفوس اللعينه
ياريف من زارك على الدرب مرار = وياريف من زارك بوسط المدينه
دوك البيوت اللي جديدات وابكار = من قدح راسي ماتقاضيت دينه
فيها على ماقيل مارد ومصدار=واجمع بها مابين قسوه ولينه
وابغى كذا تبقى مع الناس تذكار = والاّ دليل اهل العقول الفطينه
وانتوا كسبتوا طيب في كل مضمار= يوم الوقايع والسيوف السنينه
واعتيبه الهيلا صواريم سنجار = وقت الهداد بيوم مثل الدفينه
تشهد لهم كل القبايل والاقطار= ياما حموا ميقافهم والضعينه
والشاهد الله يوم روغات الابصار = يرسون فوق الموج مثل السفينه
صغيرهم ينشى على شبّة النار= واميرهم تغشى عليه السكينه
والضيف مقلاطه على بنْ وابهار=واعلوم ماهي للنشاما طمينه
ذباحة الحايل ولـِطام غدّار=فكاكة(ن) لاارقاب كانت سجينه
جتك العلوم اللي يسرن ّ الانضار = منــْي على وضح النقا مستبينه
واللي رغا من عقب ماكان هدّار = عيب(ن) عليه وله تراها مهينه
يفنى الفتى والفعل يـِنشر بالاخبار=والثابته عند المدوِّن مكينه
واللي بقى يـَحْضَرْ طويلين الاعمار= مااضن يــِفتى ومالك(ن) بالمدينه

بعد انتهى العام الدراسي وجا الصيف=غبني على مركب عذابي حملني
تبغى تصيّف بين باريس وجنيف=وانا لهيب القيظ في نجد اكلني
بين الظروف القاسيه والعواصيف=والتمر طبّاخه بقدره شملني
بلشت بالرمضا وشوف الملاقيف = اللي يجيني غصب واللي زهمني
يوم اني احاتي لبعض المصاريف=واقسم الحسبه لما كد وصلني
على سفركم والمات التكاليف = شين يروعني وشين هبلني
والموتر اللي فيه رجه وتطويف=مركون ماتقل المقربع قبلني
من عقب ماكنا بروس المشاريف=اليوم عنا يالخوي لاتسلني
الوقت مشاني على شذرة السيف=وامن الظروف القاسيه مامهلني
حتى ولانحتال مايقري الضيف=يامال فري الجيب مما جهلني
شيّبت في زهرة شبابي من الزيف=واضمرت ضيقي والحشا مااحتملني
لكن على المكشوف ياجمرة الصيف = الرزق به رب الخلايق كفلني

ملّيت من راع الكلام المزخرف = اللي علومه كلبوها هواالات
بالهرج نفسه حطها مثل حجرف = وابعد مداها للفضا والمجرّات
يفخر بنفسه حيل ياقوم واسرف = والمدح ماهو بهرجه واحتمالات
يبغى فعول ٍ ماتميل وتعجرف= لكنّ غن الليل يا ابا الدعايات
لا احتجت مالي من خزاينك مصرف = يرزقني المعبود رب السماوات
بالك تمادى بالمديح وتخطرف = تراك في حاجة دواليل واثبات
واللي معك لو قالوا اعز واشرف=ما افرقبكم كود افرق العنز والشاة

مانبي جندي ولانبغى عريف = ياوطن عفنا المراتب كلها
ودنا يومن مثل يوم الصريف = والكبود المضميات نبلها
القبيله حرب من دور الشريف = لابتن لاخاف من يزبنلها
عزوتي ربعي عمى عين الحفيف=لاطمع يبغى نوادر بلها
والله انـــّا للمعادي والحليف=سقم عينه والسيوف نسلها
دون عانينا مثل حد الرهيف=والعلوم المكرمات اهلنلها
وقت نطحات اللوازم مانخيف=كم عقودن محكمات نحلها
والصخا يلقاه زوّار المضيف=كرمتن ماجات غير بحلها
يلتجي فيها القوي قبل الضعيف = كم تفيّا من عزيز بظلها
والخطا لامر نعتبره طفيف=كل عثره للرفيق نقلها
وان وصل جرح الكرامه يالطيف=تلطف بحاله عقب ما انعلها
والصحيب اليا انجرح عزه نقيف=ماقفن يبري جروحه كلها
يامساعد راعي القلب النظيف=وقفتك ماني بناسي حلها
لوربيع القلب يقفاه الخريف=ولو بقت نفس الشقا في غلها
ماقفك مايجحده كود الخفيف=والحقيقه كل رجل يدلها
سارة اقدامي ولاحولي رديف=واطوي الطرقه واعود افلها
لجل ماقلبي ولافكري صخيف=ماجهرت اقول نفسي من لها
وجهتي عقب الحيا غرب المصيف=والحيا لاجى النفوس يجلها
بين ثقل الكايده والمستضيف=عيني اكبر ماعليها ذلها
وقتنا يالقبع ميلاته تخيف=والنفوس احيان ماياونلها
تبتلي راع النقا حتى يعيف=فوق راسه كل ساع يصلها
وانت حرن نادرن ماله وصيف= لانصتك اللازمه قدن لها
والحرار شوزنها لولا الرفيف = يالعديم اللي شهر عن جلها
ماتحير بماقفك لو هو كليف =والمواقف مثلها كفون لها
رايتك بيضا على راس المنيف=والعلوم الغانمه محرن لها
يالوليده يانضر عين الكفيف=ياجمل كل الحمول يشلها
القبول الذرب والساس الشريف = والعلا لو كايده واصلها

القلب كنه على دافور = من مغربه لين الاصباحي
والصبح لاغرّد العصفور = طار الكرى والشقا لاحي
والعين لابان شق النور = تغظي للاوجاع وتناحي
ياوجدها والدلال تفور=والقلب مع فورها فاحي
على زمانن بهج وسرور = وايام سجات وافراحي
مامثلها بالنيا مخبور = ولاجرى جد وامزاحي
مير الزمان اذكروه يدور =ولايرجعه نوح وصياحي
ماباقين منه غير حرور = واطياف ذكراي واجراحي
معذور ياصاحبي معذور=من لامني عله الماحي
يابوعلي راعي المظهور=يامراعي الخير لاطاحي
حقك علي انتحي وازور=ولابد ماجيك نزاحي
في خايعن بالحيا ممطور=ماطب في قاعه متاحي
لافيه لمبه ولاماطور=والكل بالجود نطاحي
عرف النشاما بها مذكور=مرابحن سوقها صاحي
بعطيك علمن قبل مخبور=وامجوده راع الانصاحي
الوقت صافيه قسم العور=لرضاهم تهب الارياحي
وامفتح العين ماله دور = لو صافي القلب نصـّـاحي
دنياك مضمونها مستور=واصحابها طيف واشباحي
لاضدتك سيفها مشهور=سلامتك روس الارباحي

قرب لي اذنك زين ياقاصر الباع=واسمع كلامي ياردي النصيبي
وافهم قصيدي يوم ينشر وينذاع=وانا ترى بالذات رمحي عطيبي
عن هرجتك لابد مااوفي الصاع= واردها بالحال والله حسيبي
يالشايب اللي صرت للعجز مذياع=عن ماذكرت اليوم جاك المجيبي
ياما قفلنا عن سوالفك الاسماع=واليوم لا بالله دور الطبيبي
لكن جداك ان طعتني طق الاصباع=قدامك اللي رميته ماتخيبي
منتب من اللي طيبهم بالعرب شاع=تراك ترثه من حروب الصليبي
صنـّـاع ياراع المثل وابن صنـّـاع=وجدك وابوه يشذبون السبيبي
لو تقصد المشي وتهادى مع القاع = والا تطير امع الفضا بالعسيبي
حدّرت ياشين الحلايا والاطباع = عن الطريق المستوي للشعيبي
واعلومك اللي كلها زيف واخداع=تكشفت للناس شرق ومغيبي
حطيت نفسك حر ساطي وبتاع=وكلن على منسبك جر النحيبي
مير الحقايق تسلب وجدوده اضباع=والساس لين تموت ماهو عريبي
وايديك لو مديتها السيف قطـّـاع = تكرم عن مصافحك يمنى النجيبي
حتى تحط يديك بيدين الاسناع = لابد لسلوم العرب تستجيبي
لكنهن بالطيب مازالن جياع = وامن الردى نذكرك دايم قريبي
على خدودك من سواياك مرقاع=وادروبك اللي سرتها ماتثيبي
عن منزلك لابد ما ابلغك الاقناع=وابقدرك اعطيك الجواب المصيبي
لو ان مالي من ورى مثلك اطماع = لاني طليبن لك ولا انت بطليبي
حربي وراسي فوق وفجوجي اوساع = وربعي هل الوقفات سقم الحريبي
خصيمنا يتبع هوانا وينصاع=وابقربنا ينساح بال الغريبي
وابصفحة التاريخ ماضي لنا باع = والجود فينا حاضرن مايغيبي
وارواحنا دون الخوي علمها ذاع=والجار معه بكل حالن نطيبي
حرب الوفا والطيب في كل الاصقاع=وشعاد كان بقربنا تستريبي
معذور لو قلبك على ذكرنا فاع=والا لو انه شب جوفك لهيبي
خل التمادي والخنا والتنطـّـاع = واعرف مقامك يوم بيتك خريبي
ببيوتنا للضيف عز وتمناع = عن كل مايجرح خفاه ويعيبي
يلقابنا التقدير كله والامتاع = ويعيش معنا مهتني مستطيبي
والا انت صوره بين ربعك ومرياع=واللازمه لاجتك عنها تهيبي
والضيف لامن جاك عجلن بالارجاع=من عقب عزه راح منكم غضيبي
مدايحك روحك مع الناس مرماع = والطيب يالهذار دربه صعيبي
والله لو ان ايدينك يدين جزاع = والا يدين الاحمدي والذويبي
مهو انت فينا تبدي الراي واتطاع = حنا الذي لمناسبك نستعيبي
معلوم منا يا اسود الوجه ترتاع = وان رحت والا جيت غصنك رطيبي
بالناس دوّار الثنا عدي واسراع=وانته على الجزلات مشيك دبيبي
للهون والعلم الردي بك تخضّاع = من خلقتك وانت الضعيف الغليبي
والطايره لاحل ميعاد الاقلاع=لك مقعدن حتى بعمر المشيبي
تمشي بعرض وطول من غير مركاع=وبكل ديره جيتها لك صحيبي
عمرك على درب الردى يالردي ضاع = واليوم عود ولاتركت الهذيبي
اثر النحاس يغش فيه التلماع = والذيب من عقب الخلا بالقليبي
حب القروش اودعك خاين وخدّاع = ولو ان كذبك يعتلمه النسيبي
لتروح لك عند المسيّر تركـّـاع = واتقر بالتظليل منك وتخيبي
لكن ترانا ماعلى حالك الياع =ولا افتكرنا فيك ويش بيصيبي
مير الجواب ان جاك دو لك اقناع=واربض بركن البيت وانع النصيبي
وادهن ركبك بزيت وادرج للاكواع=واترس جنوبك من صخين الحليبي
انا ادري ان جبت مافج الاضلاع=ويقصم لك الله كل عظمن صليبي
وان كان جاني من طوارفك فرّاع = حق الله ان له مع طنيبك طنيبي
واليا بغيت تجيب ناطح وفزاع = قافي على مد النظر مايشيبي
عاداتنا والصاع نردفله الصاع = ولاواحدن عن واجبتنا ينيبي
نرد الزلال وغيرنا المر جرّاع = ومنا العدو يمسي وحيله تعيبي
لو هو صعيب يروح هيّن ومطواع=من باسنا يوم النهار الرهيبي
هدّاتنا فيها عطايب ومصراع = والذيب مع مركاضنا له قنيبي
من ضدنا لابد يشقا ويلتاع=واليا انتحى يبطي وقلبه صويبي

ياراكبن من فوق جمسن عريض جنوب = في مقدميه دمغة الصنع محفوره
هوّن على قلبي ترى خافقي مغضوب = يااحن قلبي كل ماحنة سيوره
على التسع والسبعين ابو رفرفن مقلوب=يوم الشديد البدو تمشي على نوره
مايطرحه لكزس ولافاد معه جيوب=صوت الرعود المرزمه صوت ماطوره
الجيب ياراعيه لو عندكم مرغوب=للبهبهاني هيبتن فيه مخبوره
والصدق ياشانيه هو غاية المطلوب=واسماعكم لو انها منه مشعوره
منه انطرب راع الولع ناطح الماجوب=يفوق عنده عود جلسات ابونوره
صوته على باله مثل جرة المسحوب=بديرة خلا ماداجها ساكن قصوره
قدم الجيوب اليا شلع سايقه مطروب=حرن شهر عن طامن الارض ونسوره
اليا نطحك الشيخ بعمامته معصوب =والا عريف الجيش لاشب شرشوره
واليا انتحى نمرن على صيدته مغصوب=زاده ثلاث شهور ماطب حنجوره
لاشافه الماشي تنحـّى وهو مرعوب = والربع راح بساقته تقل عصفوره
يا اهل المصندق شغلكم كلبوه ذنوب =متى على الله يخلف الجيب غندوره
للجمس سوقن ماوطا وسطه الرعبوب =وابو عبر غيره ترى كلها صوره
ياعلها تفداه كل المواتر نوب = وتفداه من سوت من الرمل نافوره
في وقفته من دون لاينصب منصوب = ياهل النصـَب زيحوا عن الجمس جا دوره
تشد المولع سكبته يوم يمشي دوب =تهاديه يخرج راعي الصنف عن طوره
وارد من امريكا على صنعته متعوب =عبارتينه لاشتغل تقل مسعوره
واليا مشى الغبشه على ديرة المحبوب = ما احصى بخط السير كبري وماصوره
أنشهد انه ياعرب خيرة المركوب = لو انها راحت طواريه وعصوره
جانا زمان الجنز والترف ابو دبدوب=والظاهر الموضه بعد عام تنوره
هل العوايد سلمها بالقهر مسلوب = والصقر عوّد ياهل الصيد بوكوره
واشيب عيني ليت ماشعبنا منكوب = خذانا على المكشوف مع جرف حادوره
قلت اتمنى والمنى لده المكتوب =على طريقن فيه الايام مسطوره
من دم قلبي سيفها كم سنه مخضوب =حتى لقيت الروح بخباي مدموره
ترى الوقت ماعمره على خبرنا مغلوب=يامن صحبت الوقت لاتامن شروره
يحدنا حد السعودي لبو معصوب = نهارن على ابو قات ماطارت طيوره
راحوا شتات ولابقى فيهم المنصوب =والرافضي ماعوّدت يمه سبوره
والعبره لغيره عسى ضوّنا المشبوب = ياكل خشاشن جابها الوقت ديجوره
والا يهيد مّمَــني النفس عقب يتوب = ويكبها ويعوّد الفار لجحوره
حربن على من حيلته جابته منكوب = واديارنا من دونها النفس منحوره

يالله مشينا يافوادي وصك الباب = نفسي لها من وقت متحرّي الصده
واللي بغى معنا يغادر فلا يرتاب=يامرحبا وبساع يوفي لنا المده
يرخي سموعه لين يسمحله البواب=واطيه لوم ان كان اذانيه منسده
نبغى نحلق بالفضا والهوى غلاب=ونطير مع من طار والارض ممتده
واهم حاجه عندنا راحة الركاب = لومن علينا كان ماباحت السده
ماني بحاجه لا لشرهه ولا لعتاب = نفسي عن اياة المخاليق مستده
وابآآتحاشا البعد لو له لقيت اسباب = لكن ترى لقفيت ماعقبها رده
وانا تراي آطيب يوم المقابل طاب=واغيب لاجات الغرابيل منهده
تعبت اجامل عالمن ودّها كذاب=لدناتها تقبل على البغض مشتده
تلوّى مثل مايلتوي بالطريق الداب=ولحفظ حق اصحابها مابها شده
تلعب وانا ماني على مابغت لعاب=هجماتها جتني مع الوقت مرتده
واصدها والمعتدي عوّد المنصاب=واضحك مع التنوين وامازح الشده
كرّيت نار البعد لو ماني الشبّاب = على هوى من شبّها جازت الكده
ياحر يوم اغراك حومك على المرقاب=نفسك ترى للحوم ماهيب منحده
باكر ليا من حام عالي سماك عقاب =لابد عقب الحوم ماتجل الهده
تبصر بحالك واغنم الوقت ياحطاب = ترى سيوفه لاتمكنك منحده
قبل الزمان يعلق براسك الكلاّب=وتروح روحك عقب الآمال منقده
بدّل مسيرك واترك الشذب فالغيّاب=ترى لها عن سرّة نفوسنا لده
والا تراي عقاب وابنآآآخي ابن عقاب =قرمن على صكات الايام به سده
نورن يضوي سكة التايه المرتاب =لا جا اللزوم وغبر الايام مشتده
سيفن مجرب يوم سود الليال غضاب=واضد فيه اليا زما ناوي الضده
لكن لسانك ردّه بفمك واِكل تراب=واشبع ولانسمعك ياطيّب الجده