ديوان الشاعر (ناصربن مصلح الحربي ) ... جميل النوايا

محمدحجيج=
النوم ماعـاد يهنانـي=ينتابني فالمنام أحـلام
يفز قلبـي ووجدانـي=والعين ماعاد تبقى تنام
ناصربن مصلح=
يامرحبـا بالـذي جانـي=بحروف مسترسله بنظام
يقضي لياليـه سهرانـي=مشغول فكره بامر(ن) هام
محمدحجيج=
ياناصر الخوف يحدانـي=ليلي نهاري اعيش اسقام
حتى الحزن صار يغشاني=في داخل القلب له مخيام
ناصربن مصلح=
هآت الذي منّـه تعانـي=ياعزوتي ودرعها واحزام
كلى لك اصغي بالآذانـي=وبسمع انا شكوة المنظام
محمدحجيج=
مابين عينـي وأجفانـي=فرقا ولا عاد فيـه ليـام
والرمش مابينهـم فانـي=تنازعوا وأصبحوا أخصام
ناصربن مصلح=
الصلح مابيـن الاخوانـي=خل العقل يكتبـه باحكـام
وبالصبر وبطيب الاحساني=تطوي خصومه لها اعوام
محمدحجيج=
كيف اصلح الشأن وأشجاني=أخشى عليها تروح اعـدام
يامـا تكلمـت بلسـانـي=ماخذت قسمي من الأقسـام
ناصربن مصلح=
ثبّت حقوقك على الجاني=بالعدل وبسنة الاسـلام
ودامك على حق وايماني=ينصرك ربي مع الايـام
محمدحجيج=
لو جيت طـلاب للعانـي=يشهد لي الناس غرب وشام
لاتردنـي فكيـد احزانـي=اللي مضالي زمان العـام
ناصربن مصلح=
لا تفني العمـر سقمانـي=وخلّك على مبدأك مقـدام
وانته على النايفه بانـي=وخابرك من خيرة الفهّـام
ان كان لك خصم عدواني=ارفع جنابك ومـا تنـلام
ترجح بفعلـك بالاوزانـي=وتقضي العمر بالنعيم التام

ناصربن مصلح=
سـلام لشّاعـر الطـوّاف=يسري على مذهب وملّـه
سلام مثل النجم ينشـاف=مع مطلع الصبح يوصل له
الطوّاف=
حنا لفانا رجل عـراف=نحفظ له الطيب ونجلّه
يامرحبا والسعد ميلاف=وراعي العقل عقله يدلّه
ناصربن مصلح=
دام البقا ياجميـل القـاف=ومن شافه يقول ما شاالله
بمشي معك والقلوب انظاف=وابشكي لك احوال معتلّـه
الطوّاف=
مالي عن اهل المثل محراف=وانتـه معانيـك مقتـلّـه
والمرء عقله معه صـراف=والصعب يسهل معه حلّـه
ناصربن مصلح=
ليه العرب دايماً بخـلاف=وأرض ومخاليق محتلّـه
وفي شامنا حربة السياّف=على المساكيـن مستلّـه
الطوّاف=
هاذي فِِتَن من وراها احلاف=والكل شايـل معـه غِلّـه
ولو لقْيت العقل والإنصاف=ماكان هـذا حصـل كُلّـه
ناصربن مصلح=
زود الغبن كسّر المجـداف=وحنّا على مشـرف التلّـه
نقوا الحكي والحكي ما طاف=يسعـى ولا جـاوز الحلّـه
الطوّاف=
ماتستوي وزنة الأكفاف=والنور ماهو مثل ظِلّـه
والمؤتمن لاعليه تخاف=يقدر على المفتري يذلّه

ضاوي الليل=
جيت ارتكي فوق مشعابي=ابغى الصفا والصفاويـّة
سلام ياساير أصحابـي=منهـج وسنـة سماويـة
ناصربن مصلح=
ترحيب فيـه الوفـا رابـي=للّـي لفـى صافـي النيّـه
في مجلس(ن) يجمع احبابي=بنفـوس بالـود مسقيـّّه
ضاوي الليل=
من قبل لانزل عن ركابي=وابني لك القيـل بيديـّه
هيا استمع فأول خطابـي=وخـل المراسيـل ليليـّة
ناصربن مصلح=
هات الذي فيه مرتابي=وكلي لك آذان صاغيّه
ياتيك ردي وميجابي=مكتوب بوراق مقريّه
ضاوي الليل=
غربني الشوق وانحابي=ماعاد لي فالبلـد فيـّه
ماصدق انه تخلوابـي=راحت حياتي علانيـّه
ناصربن مصلح=
كانك بالاشواق منصابـي=خل الهواجيـس مخفيّـه
ولو واجهك بعض الاتعابي=اصبر على بعـدك شويـّه
ضاوي الليل=
في مامضى كان يشقابي=يعدنـي فـأول الهيـّه
مدري ويش اللي تبلوابي=خلاه يجفل عـن عنيّـه
ناصربن مصلح=
انا اعرف الشوق غلاّبي=والبعد سـم الشقاويّـه
داريه وافتح له البابـي=ولا تحسب حساب للسيّه
ضاوي الليل=
انته وانا فوق مرقابي=بيناتنا علـوم جديـّه
خذ مابدالك من جرابي=لاصار لك عين نجديّه
ناصربن مصلح=
من كـان للمجـد طلاّبـي=مافيـه مثلـه ولا زيّــه
ومالك عن الصبر مجنابي=وللصبـر حكمـه الاهيّـه
لا صار ما يحسب حسابي=للّي مضـى بينكـم طيّـه
جنّب ولا تقـول يسلابـي=وتحط نفسـك لهـم ديّـه

بين الأمل وانعدام الياس=واحساس عايش فوجداني
لا بد يوم(ن) يزول الباس= واسعد انا بشوف خلاني

خالد بن عبيـد الاحمـدي=
سلام واصلـك ياشملـول=والطّيب مانصـكّ بيبانـه
ياالشاعر اللي من اسطنبول=يرسل للاصحـاب قيفانـه
ناصر بن مصلح الاحمـدي =
أهلاً هلا عطرها مرسـول=فيها الغـلا زادت اوزانـه
للشاعر اللي بعرض وطول=يعزف لنا أعـذب الحانـه
خالد بن عبيـد الاحمـدي =
لك البقى والوفا موصـول=والشـكّ مانطلـق اعنانـه
ليتك تفيد الـذي مذهـول=من جيل ماانصفه ميزانـه
ناصر بن مصلح الاحمدي=
حكم الزمن دايماً مقبـول=ولو عاصر الجيل بحزانه
ومنهو مشى سكّته بأصول=يبني مع الوقـت بنيانـه
خالد بن عبيد الاحمدي=
معذور يومه يدور احلول=اللي على الطيب سيسانه
لاساووا الميـل بالمعـدول=وحطّوا له اللاش بوزانه
ناصربن مصلح الاحمدي=
قايست فكري ولك باقول =يامبدع برسم ديوانه
دنيا وفيها جبل وسهول=وكل بحر يوحيه ربانه
ولا بد يوم(ن)نرى المأمول=ويزول لاشه وطوفانه
واللي تصبّر لا بد ينول=ويقضى على كل عدوانه

ناصربن مصلح=
يافارس الحرف ياحرّيف=يارمز واضح للاعيانـي
سلام مني لكم بالصيـف=نابع من احساس وجداني
ابوسالم الرحال=
اعرفك مااحتاج لى تعريف=ذوقك ولطفك مايخفانـى
يامرحبا مثل ورد الريـف=على سنا خضر الأغصانى
ناصربن مصلح=
ياصاحبي بسألك عن طيف=لاغمّض الجفن ينصانـي
اخاف يطلع سراب وزيف=واجرح انا القلب من ثاني
ابو سالم الرحال=
بعد إطلاعى على التوصيف=وحسب الذى شفته وجانى
ماشوف انا فيه شى مخيف=وكلاً من إحساسه يعانـى
ناصربن مصلح=
كيف ارتجي للهوى تصريف=مـادام الاقـدار تبـلانـي
ودّي اشوفه حقيقـه كيـف=وانسى معه كـل أحزانـي
ابو سالم الرحال=
للآن سر الهوى ماشيف=ولاطب له فالزمن بانى
ياكم من طرف له ذريف=من غالى الدمع هتانـى
ناصربن مصلح=
أخشى العنا لو جرى تكليف=أقضي أنا العمر وحدانـي
ياليتني عايش(ن) فجنيف=وانسى الذي دوم يبرانـي
ابو سالم الرحال=
مقره الصقر فوق النيف=لو كلفه امـر سلطانـى
وديره بها مايمر الضيف=ماهى له الصقر اوطانى
ناصربن مصلح=
يمكن مع البعد والتسويف=ومشاهدي لكل الالوانـي
اقضي حياتي انا كالسيف=من دون تفكيـر يبلانـي
ابو سالم الرحال=
من كان صوب الهدف هديف=وله فـى مراميـه نيشانـى
البعد مايسير لـه صفيـف=لـو إنـه البعـد قومانـى
لاتقول هذ عنـى وتنكيـف=وإنته من رجـال شجعانـى
من خوف ما يقال لك ياحيف=خلك على الريـس ربانـى

ابــــو حـجـيــج =
سلام في مطلـع أقوالـي=من بعدها ننشر الأعـلام
يابو مشاري علـى بالـي=علوم وأخشى من اللـوام
ناصـر بــن مصـلـح =
يا مرحبا بريحة اخوالـي=درعي ووقت اللزوم حزام
عطنا علومك ولا تبالـي=مثلك على النايفه مقـدام
بــــن حـجـيــج=
اخفي بعضها لـو ثقالـي=والبعض يستدعي الأحكام
لك عين مثلـي يورالـي=والعين تشهد على الأقلام
ناصـر بــن مصـلـح=
حالك ترا يا بعـد حالـي=تلزم على الحاضرين الزام
ينصت لها كـل عقّالـي=ونسمع بها شكوة المنظام
بــــن حـجـيــج=
مثل الذهب سعرنا غالـي=الرأس من تحته الأقـدام
مالـد عينـي لعـذالـي=لاصار تفكيرهـم اوهـام
ناصـر بــن مصـلـح =
بعض العـواذل تهيالـي=تلجم به العاطفـه الجـام
تلعبّـه يميـن وشمالـي=تحسبه يبني وهـو هـدّام
بــــن حـجـيــج =
لاصار لي صف في قبالي=مثلك انـا متبـع الأقـزام
مصيره الوقت لو طالـي=يظهر لنـا البينـة قـدام
ناصـر بــن مصـلـح =
قالـوا وقلنـا بلامثالـي=ظهر الجمل بالثقايل قـام
واصبر على شان كرمالي=خل الزمن يفضح الاقـوام
ابــــو حـجـيــج =
لجلك انا بطـوي حبالـي=لو كان روحي تروح اعدام
واصبر على المر والحالي=وابعد عن الظلم والظـلام
ناصـر بــن مصـلـح =
عسـاك سالـم وتبقالـي=يا صقر فوق السماء حوّام
واسمع كلامـي وموالـي=ولا يشغلك من معاه فصام
بعض البشر فكرهم خالي=ماهو من المعرفـه لمّـام
ان غاب ما عاد يطرالـي=وليا حضر ما عليه الـزام

ناصربن مصلح=
أبـدا كلامـي بذكـر الله=من بعد ذكره بدعت القاف
واثني سلامي انـا كلّـه=للشاعر الغالي الطـواف
الطوّاف=
راعي الأدب يوم ما نملّـه=الصاحب اللي كريم اوصاف
نحشّـمـه دوم ونجـلّـه=يامرحبا بطيّـب الميقـاف
ناصربن مصلح=
الطيب من طيبـك إنهلّـه=يرقى على عالي المشراف
والمشتكى جيـت ابفتلّـه=وسط الورق بالنظر ينشاف
الطوّاف=
إفتل كما شئـت او فِلُّـه=آنا وغزر المعاني ولاف
وكل عود ياقف على ظِلُّه=وانت الذي ماعليك خلاف
ناصربن مصلح=
روحي بالاشـواق معتلّـه=والياس بين الحشا رفّـاف
من خل سهم الجفا سلّـه=يحلف وينقض كثير احلاف
الطوّاف=
من واجب الخل مع خلُّه=يعامله بلطف واستلطاف
وان كان درب الوفا زلُّه=العقل في حكمته صراف
ناصربن مصلح=
المشكله كيف أناوصلّـه=والبعد ما بيننـا ينعـاف
أمشي على مذهب وملّـه=لكن لقيت الجواب إجحاف
الطوّاف=
نقّاض الايمـان مانحلُّـه=يحمل ذنوبه على الأكتاف
ومن عاشره ويش بانقولُّه=لاترتجي صدق من حلاّف

الطوّاف=
براجع حسابي الجـاري=واجرّد البنـد واصفّيـه
مادام حتى ابو مشـاري=ماعاد في المنتدى نرعيه
ناصربن مصلح=
ان غبت ينشد عن اخباري=الصاحب اللي أنا أغليـه
دايم على الطيّبه ضـاري=طوّافنا ياعسـى مابكيـه
الطوّاف=
عليك بشكي خطأ جاري=اللي المقدر بلاني فيـه
دايم يدوّر على اكداري=مآسي القلب ومآذيـه
ناصربن مصلح=
الجار له حق واجباري=بالطيّبه دايـم إتلآقيـه
وانا على حسب منظاري=بالصبر من علّته تشفيه
الطوّف=
عايش معـه دايـم مـداري=طيبي وحسن الأدب معطيـه
لكـن علـى الشـر دوّاري=فاض الصبر من كثر ماارجيه
ناصربن مصلح=
ان كان بالجار محتـاري=وفكري انا اليوم تستفتيه
دامك على حق ووقـاري=خل الزمن لا عصف يكويه
وان كثّر بفعل الاضراري=بيع الردي والوفي اشريه
ماقـدّر الله بـالاقـداري=مكتوب لا بد مـا توحيـه

ناصربن مصلح=
سلام من طيب أنفاسه=طابت بها نفس مرسلها
للشاعر اللي بإحساسه=أحلا المعاني يترجمهـا
الطواف=
ترحيب باللي سَعَد ناسه=وافرح حضوره خواطرها
دايم على الطيب نبراسه=هاذي حقيقه ماننكرهـا
ناصربن مصلح=
ياصقر معروف قرناسـه=معزّتـك أنـت خابرهـا
في داخل الروح هوجاسه=من عبر الابيات بكتبهـا
الطواف=
ياكاسب الطيب من ساسه = ومن ربع زينه مخابرها
توْ المثل ما صفي كاسه = ابدي معانيك وانشرها
ناصربن مصلح=
ياصاحب الناس محتاسه=خوف وقلق صار حاضرها
قالوا (كرونا) قوي باسه=وامراض كثرت مخاطرها
الطواف=
هذا ( بلى ) دقت اجراسه = فأيام كثرت مناكرها
والمرء لايزيد وسواسه = الإستقامه يدرّكها
ناصربن مصلح=
قالوا بلا فكر ودراسه=النوق هي من سبايبها
عزالله ضاعت بنا الطاسه=دام اليماني مصدّقها
الطواف=
هاذي دراسات وفْراسه = والمختبر زاد قررها
كلاً يحسس على راسه = من عنده نياق يحجرها
ناصربن مصلح=
المختبر الخطأ داسه = وفيه الاشاعات نظّمها
لو جاز له يوم مجلاسه = في أرضها كان لازمها
الطواف=
انته رجل حلم وكْياسه = والمايله ماتسايرها
مادام الاخطار حواسه = كلاتنا لزوم نحذرها
ومادامها البل دساسه = للداء لابد نحصرها
قرار صادر من الساسه = واجب ننفذ اوامرها