ديوان الشاعر عجاب صالح الحنتمي المزيني

اول حياتي بالغنم والبعارين
اسرح مع الغبشه قبل يسرح الطير

الزاد تمره والضما والحفا شين
حياه صعبه يوم وقت المضاهير

وكبرت قلت ارتاح من سرحة الضين
وسجلت جندي بالحرس يالمناعير

واخذة فيه من الزمن عدة سنين
مارتحت والدنيا حضوض ومقادير

الفجر تلقاني بوسط الميادين
وبالليل اداقش بالخفاره من عصير

قلت اتصبر لاكسبت الملايين
اصير وسط السوق ضمن الهوامير

وطلعت ماعندي عقار وبساتين
ماغير ددسن لسرعت تقطع السير

عجاب صالح الحنتمي

ماني بغابط غير في دنيتي عيد
لاضاق صدره تلها لزبيره

الديره اللي جعلها يالاجاويد
بغر المزون الضافيه والغزيره

احبها واحب فيها صناديد
اهل الكرم والطيب ستر القصيره

متوارثين الطيب من دون تحديد
تلقى لهم في صفحة المجد سيره

ياعيد لامريت راع البغاديد
مدهال هتاش الخلا والعشيره

نافع كفاه الله شر الحواسيد
اقره سلامي يانضيف السريره

لو ماب رجلي من وهنا تقل قيد
لاجيه لو دونه تطول المسيره

عجاب صالح الحنتمي

يارشيد ماباقي من العمر يارشيد
اكثر من اللي يافتى الجود راحي

اقفت بنا عوص النجايب مع البيد
اقفاي مزنٍ مقتفيته رياحي

بعد الشباب تقول بقدامنا قيد
والشوف مامن شوف والحيل راحي

من بعد مانرقب على نايف الحيد
والبدو باقي ضينها بالمراحي

ياليت للاعمار بالوقت تجديد
وعوض اللي فات وفرد جناحي

ادري ياليت ولو تذكر وماتفيد
مثل المنا يارشيد مابه صلاحي

يالله جنبنا دورب المناقيد
وبالاخره راجين منه السماحي

شبنا وبانت بالوجيه التجاعيد
وذقنا هماجه بعد شرب القراحي

عجاب صالح الحنتمي

ذكرتني ياقبيس صبح الربوعي
رجم الهيازع ياعسى فاله السيل

وذيك الديار الطيبه والنجوعي
وذيك العدود ايام وقت المحاويل

انشدك عن بدوٍ تقود الجموعي
حوله قبل يطلع على جيلنا جيل

ياعل تسقى ماوطوه الرجوعي
امين ياعلام غيب المقابيل

لو عودة الماضي مثل حب كوعي
ياشيب عيني لاذكرت الرجاجيل

مسحت بشماغي غوالي دموعي
من شان ماتفرح علي المهابيل

اللي لهم هرج النميمه قذوعي
تلحقك لو انك ورا الجدي وسهيل

ماني عن الماضي دلوه وقنوعي
لاتكثرون علومكم ولاقاويل

عجاب صالح الحنتمي

حضيض من عمره بسن الرضاعي
عليه ماتسجل ذنوب وخطيه

ماهو بمثلي ذاق سم الافاعي
من وقت كبل من شبابي يديه

بيني وبينه طول عمري نزاعي
لاما حناني غصب حني الحنيه

لارقبت في راس الطويل الرفاعي
هبت علي ظروفي الموسميه

وماكنت حالم به تبدد وضاعي
والنفس من ماصار ماهي خليه

لويت ياوقت البلاوي ذراعي
اشكيك للمعبود رب البريه

من كثر صكاتك شكيت الصداعي
حتى عرفني راعي الصيدليه

للهم قلبي صار صك ٍ مشاعي
يسرح ويمرح فيه صبح وعشيه

عجاب صالح الحنتمي

الله ياكثر التمني والاحلام
وفاة القطار وماتحقق منايه

في السنين تسير عامٍ ورى عام
بعد شبابي سلمني عصايه

مافاتني كنت اتحراه قدام
وعلى كذا حتى وصلت النهايه

بنيت بأمالي مثل هاك الاهرام
في كل ديره مزرعه مع بنايه

وقامت تلاشا من يمنها ليا الشام
حكايةَ ياطولها من حكايه

ليه اتضايق والزمن خان صدام
بالعيد ضحابه قليل الهدايه

يالله ياعلام ماوسط الارحام
عونك بيوم ٍ فيه تقصر خطايه

عجاب صالح الحنتمي

ابو بدر راع الكرم طيب الصيت
يمدح قبيله حرب جعله يدومي

سمعت له عدة قصايد ورديت
عليه من باب الادب والسلومي

عداد حيين المخاليق والميت
يامرحبا وعيدها كل يومي

يالشمري في مدحكم لو تقصيت
ماوفيك حقك يالحصان العزومي

قولي ثبات ومايبي زود تثبيت
والله وسبع انعام فيكم عمومي

ستر العذارى لاهبا كل خرتيت
ان طار ستر ام الحلق والوشومي

وانته ورثت المشيخه بيت من بيت
وبوك شيخ ومن خيار القرومي

عجاب صالح الحنتمي

تمشي بنا الايام يوم ٍ بعد يوم
وماراح من عمر الفتى مايعودي

اوصيك ياغافل ترى الامر محسوم
لابد ماتسكن ضلام الحودي

مدامة الدنيا لباشات وقروم
فانين ماباقي عليها وجودي

تجي بها وتروح منها بلا هدوم
غير العمل مالك صديقٍ يرودي

الناس فيها بين معطى ومحروم
اما انزلت والا رقتبك سنودي

الله على وادي من الوسم ماسوم
سجه معه تشفي جميع الهودي

مع خوة سنافي وعاقل وشغموم
ضاري على السجات وسط النفودي

عجاب صالح الحنتمي

من يجحد المعروف ثورٍ ٍ ولد ثور
مافيه خير وماب راسه نعاره

عساه يونسها على مشة الزور
راميه عنده بالرمايه مهاره

مافيه ينفع طب قاري ودكتور
وسو العمل بالاخره بنتظاره

الكذب حبله كل الاوقات مبتور
مافيه يالانذال طيب وشطاره

دايم وراع الطيب يشكر ومذكور
مع الرجال تحصله بالصداره

راعيه مهما خانه الوقت منصور
لو ذاق من كذبان وقته مراره

عبرت عن شي ٍ حصلي على الفور
والحر يفهم مقصدي بالاشاره

عجاب صالح الحنتمي

ياشريم لو تنفخ على النار يومين
ماانته مولعها على مايقولون

مثل ونسمع فيه ماضي وهلحين
صايب وفيه الناس دايم يهرجون

مايبلش اهل الطيب غير الرديين
اللي سوالفهم تجي دون في دون

تلقى لهم لجه بوسط الدواوين
حضار لكن بالنوايب يغيبون

على يسارك حطهم ياحمر العين
عليك بمصاحب حياوي ودندون

كريم سبلا من هل الطيب ودين
عليه جيرانه والاقراب يثنون

الناس واجد والنوادر قليلين
هذا الصحيح اللي عن الكذب مضمون

عجاب صالح الحنتمي