ديوان الشاعر عجاب صالح الحنتمي المزيني

قالو مدرج به مزاين بعارين
والناس مجتمعين من كل الاقطار

حول البكار مقوسات العرانين
وانا ومثلي ماملك قيمة حوار

يشري بهن ويبيع راعي ملايين
يفرق بسومه لاحضر بين تجار

وقول يامدرج عساك الودادين
مع اول الوسمي تساقيك الامطار

عيال ضاهر فيك ماضي وهلحين
اهل كرم واهل حميه واهل كار

ان قيل ياهل الخيل بالماقف الشين
يثنون دايم دون حسكات الاوبار

وان صبحوها شاربين الغلاوين
من دونها وقفو على قب الامهار

ضواهره يوم الغزو والاكاوين
عن وسمهم سبارها ياخذ ايسار

عجاب صالح الحنتمي

يارجل مريبي على ذيك الاطلال
نبي نعيد الذكريات القديمه

مع صحصحٍ مايشتغل فيه جوال
بعيد عن شوف الرياض ونسيمه

عن زحمة الاسواق وقفاي وقبال
مع نجد ذبيبي وسيع الخريمه

الماء ومحتاجه من الزاد والمال
وعزبه بها صفر الدلال الحشيمه

فيها ماينقصني يالاجواد مثقال
وفراشي المطوي وقو العزيمه

رحلة نقاهه يامواريث الابطال
قدام تبرك بي مع بالدرب ريمه

يالعبد بالدنيا مسافر ورحال
ماحد مخلد والمنايا محيمه

قدامنا زاحة حضرات وجيال
يعاشق الدنيا تراها وخيمه

كثر التباهي بالمناصب والاموال
وقولت ولد شيخ وكريم وصتيمه

لاغرغرة ياراعي المعدن العال
مال النسب والمال والجاه قيمه

واليا جهلت انشد عن المذن بلال
بشر من المختار جنة نعيمه
عجاب صالح الحنتمي

سبحان من يعلم خفايا عباده
بالكون مايخفى عنه كاين كان

محيي هشيم ٍ صار مثل الرماده
علام مانعلم ورزاق الانسان

مايبلغ الانسان غايت مراده
الا بتوفيق الولي عالي الشان

يالادمي في دين ربك سعاده
النفس لايلعب بها كل شيطان

ماتزرعه من زرع تجني حصاده
من زين والا شين يوزن بميزان

خلك صبور وفيك عزم وجلاده
واكبح جماح النفس في قو الايمان

يالله جنبنا الفتن والقراده
ورحمتك ياواحد عن الغير مزبان

يسامعين القول بعد الافاده
صلو على المختار من نسل عدنان

عجاب صالح الحنتمي

مبروك ياشارع عريب الجدودي
عساه منزل يارفيقي مبارك

الله يفكك شر عين الحسودي
ياعل ماله عينه في ديارك

ياطيب الرفقه قوي العضودي
عن الردا يابعد دايم مسارك

على الكلام اللي ذكرته شهودي
انظر قدم ويمين ونظر يسارك

على المراكي مرتكين الفهودي
بالمجلس الله فيه جينا نبارك

له كل طيب يارفيقي يرودي
مشرعٍ بابه لضيفك وجارك

عساك دايم يارفيقي بزودي
وماتشتكي هم الزمان وعوارك

عجاب صالح الحنتمي

لاهنت يامرسل علي الرسايل
وانته تمشى في نفود الثويرات

ودك تسليني عسى العمر طايل
وانته علي اثرت في فايتن فات

ذكرتني ياشوق ضاف الجدايل
وقتن مضى قدام بث القنوات

بدوٍ لنا سفن الصحاري رحايل
نقطع بها قبل المواثر مسافات

وان لاح براق الحيا بالمخايل
البيض طوٍ للبيوت الذريات

ياما تبعت معبسات الشمايل
مع الدروب البينه والخفيات

واليوم يالدباغ فيه تمايل
الوقت وضروف الزمان الصعيبات

العمر قفى ياعريب السلايل
ماقدر مثل مافات روحه وجيات

ماتشوف عينك يابيض الوجه زايل
قدامنا زالت ملوك وحضرات

صل الفروض وصل معها النفايل
وسج القدم قبل تجي فيه عثرات

عجاب صالح الحنتمي

البارحه ماذاقت النوم عيني
حزين وعيون المشقى حزينه

اقالب الجنبين مثل السجيني
عنده فراج ويحتري ساجنينه

طال انتظاره بين ياس ويقيني
يطلب عسى الاخبار بالحيل زينه

نشد من الحراس وقفى حزيني
سجنه قبل ماينتهي دابلينه

على ماعشته يوم جدة سنيني
والشيب ماله هاك الايام عينه

يمال فرق العين يالسامعيني
اليا ذكر عجاب ماضي سنينه

وين العدود اوين بدوٍ قطيني
لنجورهم بالصبح نسمع رطينه

والجار والاقراب والواليني
واللي بوقم اعمارهم دافنيه

الرابح اللي فاز دنيا وديني
وطريقهم لابدنا سالكينه

عجاب صالح الحنتمي

نواف شيخ وله مكانه وتقدير
لطيب والانصاف دايم زبوني

شهادته فيها افتخر يالمساطير
ماتهون واللي قالها مايهوني

راع الحيسه باليال المعاسير
معروف عن شمر كبار الصحوني

يالله عساني يارفيق المناعر
تثني علي اهل الوفى لاذكروني

مثلك فدوك اهل الحسد والدناقير
فريس هرج وبالنوايب عفوني

على السماء يالشمري تحسد الطير
ابليس مشغلهم بسو الضنوني

اقبل تحياتي وجزل التعابير
ياراس من طيبه تطيب المتوني

عجاب صالح الحنتمي

ياناس ياسرع الليالي والايام
يالله عطنا خيرها عن بلاها

ياسرعها سرعاه عام ٍ بثر عام
تقول دلوٍ مجزله من رشاها

ياصعب فيها نوب تحقيق الاحلام
اليا عطت بعض الخلايق قفاها

نسعى بها لاهين ونحث الاقدام
والنفس نتبع طيشها مع هواها

ومصيرنا نطوى بقطعه من الخام
للاخره ياسعد واحد بناها

راجيك ياعلام ماوسط الارحام
عفوك لادارت فوق راسي رحاها

عبدك وابن عبدك على دين الاسلام
برحمتك نفسه لاتخيب رجاها

عجاب صالح الحنتمي

ياسعود قلبي له سنيني
دق الزمن فيه مسماره

لو ماعزومي توديني
جلست ياسعود بالحاره

ثقل القدم والموازيني
مالت والايام دواره

شوف المرض كيف باريني
بري الخشب عند نجاره

شوفي شجر مايقديني
غير العصا جبت نظاره

عيت وانا صبي تعطيني
دنيا دنيه وغداره

واليوم ماعاد يمديني
ازرع بها زرع وعماره

قناعة النفس تكفيني
عندي تقل كنز وتجاره

عجاب صالح الحنتمي

الحيه اللي ماتربا على الدين
بالمسك لو راع النميمه دهنها

ياناس لو صلى صلاة المصلين
ومصاحف المسجد بحضنه حضنها

خباثته تجري بدم الشرايين
ونفسه عرفنا خبثها من وهنها

فعايله عنها المخاليق دارين
مهما يخفيها تبين عفنها

يضامن الدنيا ترى الخلق فانين
العافيه مافيه حي ٍ ضمنها

ميعادنا في يوم نصب الموازين
انشدك عند مسير الكون عنها

تاخذ من الدنيا من الخام مترين
وتروح جثه هامده في كفنها

لو تملك الدنيا بكثر الملايين
تروح منها مامعك قرش منها

عجاب صالح الحنتمي