ديوان الشاعر عجاب صالح الحنتمي المزيني

للارض يوجد في جبين المصلي
شامه من شهوده نهار القيامه

يوم ان ماتنفع جماعه وخلي
وماينفع المخلوق كثر الندامه

لابد يادنيا الشقى مانولي
فقير والا فيك راعي زعامه

اللي عن دروب الهدايه يزلي
خسران لو دنياه ترفع مقامه

بعد الترف والعافيه والتسلي
اخر مصير العبد يطوى بخامه

بالقبر فوقه من رديده يهلي
تبلى قبل يوم التلاقي عظامه

كلن حسب ماينكتب بالسجلي
يالله حسن الخاتمه والسلامه

عجاب صالح الحنتمي

يالحنتمي باقي على الوسم شهرين
سـتـيـن ليله مـن حسـاب الخلاوي

وتشاهـد الريضـان مـثـل البساتين
يربعون أهـل الـدبـش والشواوي

هذا الكلام اللي عـلـيـه البراهين
إن قـالـهـا الله يابـعـيـد الهقاوي

على الربيع أهـل البوادي حريصين
والحضـر واللي ساكنيـن القراوي

بالدار ست شهور مثل المساجين
تـحـت المكيف وذبحتنا القهاوي

نبي نـسـج أقدامنا يـسـار ويمين
كـلٍ حـسـب شـفـه وماكان ناوي

إتبع هواء نفسك وطعها على الزين
متع نظر عينك على منت هاوي

نمشي على درب العـرب والقوانين
وكـلٍ بـعـقـلـه عارفٍ من يخاوي

عينٍ على الدنياء وعينٍ على الدين
لولا الـثـنـيـن الآدمي وش يساوي
مخلف أباالميخ الوهبي

@@@@@@@@@@@@@

يابن وهب حطيتني بين نارين
والعظم ياريف المشاكيل جاوي

ادفها قدام يابن الكريمين
وترجع ورى وانا بربي رجاوي

علام مانخفي من الزين والشين
وهاجر رزقها بالشعيب السناوي

اليوم شوف البر مايسعد العين
ماهو على مايريد قلب الهواوي

محمي ودونه شبك بامر السلاطين
مايدخله راعي حلال وعراوي

لو فوقه البراق جاله ودادين
ماني لبرقه بالبناخي رجاوي

خالي مراح من الغنم والبعارين
راح الشباب وفي وقتي قساوي

اليوم دوب الحق صلاة المصلين
شوفي شجر والحال طاويه طاوي

هاذي علومي كلها ياحمر العين
عساك سالم من جميع البلاوي

عجاب صالح الحنتمي

يالله ياللي كل كرب ٍ تحله
يفارج الشدات يامشفي ايوب

يارازق الداب العمى في محله
يفارج الشده ويقاضي النوب

تفرج هموم ٍ في حشايه تمله
تقول به كيرٍ من النار مشبوب

لاقلت همه يالاجاويد زله
عود عليه بالبهاذيل مصحوب

اقاومه لاما غدى في خله
لو اني ادري ماجرى شي مكتوب

بالليل عيني بالنجوم المطله
والصبح مثل اللي يدور له ذهوب

اشوف بالمجلاس ليه ممله
والرجل لو سجيتها دوبها دوب

النفس ماعودتها للمذله
رجال مابين الرجاجيل محبوب

عجاب صالح الحنتمي

اللي عطاه الله لايبلش الناس
في كل ليله ضيف تالي نهارا

بطون خلق الله من الفقر يباس
ياكانزين المال توجد طفارا

من لايحس بواقع الغير هلاس
ماله مع اهل الطيب قدر وقارا

ومن لانفع من طاوله هم وتعاس
لايصير له بالحلق مثل الزرارا

خله بحاله يلتقط بعض الانفاس
لاتزيد كسره بالزمان انكسارا

بعض البشر ماعنده ادراك وحساس
ماياكل الا من طعام الفقارا

قال المثل من لابناها على ساس
لو طولت لابد ترجع دمارا

عجاب صالح الحنتمي

يارب تجمعني مع الشيخ ابن باز
بالجنه اللي مابعدها مماتي

حبه بقلبي له مكانه ومركاز
يذكر عليه كل يوم بصلاتي

راعي فتاوي صادقه راعي انجاز
بالدين له حلقات ومولفاتي

بالصدق والاخلاق والمعرفه فاز
قدوه لمن بعده كلام ٍ ثباتي

قلبي لحبه كل الايام منحاز
حبه وحب شيوخ مثله ثقاتي

وكره على ماقيل هماز لماز
بين البشر دايم يحب الشتاتي

اليا حضر في مشكله شعله وقاز
عسى عليه ينوحن النايحاتي

وكرهك ياللي لو حجزناك بحجاز
ماتكب بعض علومك الهافياتي

عجاب صالح الحنتمي

الطيب ياهل الطيب تعرف رجاله
اللي لهم فعلٍ مع الناس وجهود

مثل الكريم اللي عمامه خواله
راع الوفي والكايده محسن سعود

انشهد انه طيب راس ورجاله
يذكر ويشكر راعي الصيت والجود

وبوه وافين الرجال اتعناله
يوم السنين اللي بها العسر والكود

في مجلسه تلقى رجاله الشكاله
وصفر الدلال وزاد وافر وكنبود

رجال عرف ومايحب الهزاله
شوحه سما عن كل خايب ومقرود

وخاله ونعم الخال ياحي فاله
قولٍ على براهان واضح ومشهود

منصى وراعي يالنشاما جماله
فعله مابين الناس يذكر ومحمود
عجاب صالح الحنتمي

مريت عودٍ جاوز العمر سبعين
في غرفته مافيه حي ٍ يسليه

قلت السلام وسابقة دمعة العين
رد السلام الله من الضر يشفيه

لي هز راسه ونحنا شاكي البين
دوبه يحرك من وهن روس الشافيه

وقفيت من عنده وانا خاطري شين
والحال حال اللي عنا الوقت طاويه

يالله ياعدال ميل الموازين
يعالم اللي ماكتمنا ونخفيه

علي لاتضحك خبول ومساكين
في يوم ماعلم سيته من حسانيه

عبرت عن ماصار بالشعر بيتين
بالعين شفته يالعوارف وموحيه

عجاب صالح الحنتمي

مرحوم ياللي ماشكى منه مخلوق
عاش وتوفى ماشنوه الجماعه

طيب وراعي خلق عالي ومنطوق
محبوب عند الناس مابه لكاعه

من صبح بالعبره والاحزان مخنوق
رحل ملهي ماتقل عاش ساعه

يغافل الدنيا ترى الوقت صندوق
مايندرى وش داخله من بضاعه

ماكل مايطرد يقولون ملحوق
نوب الفتى الامال سبة ضياعه

من لامشى في دنيته مشي برفوق
والهاه عن دينه بنين وطماعه

ماينفعه لو منصبه حيل مرموق
لاجاه من كلف بنزع الوداعه

عجاب صالح الحنتمي

يارجل قبل الموت قصاف الاعمار
نبغى نزور اربوعنا وصدقانا

قبل طلوع الصبح في وقت الاسحار
على القصيم الله يسهل خطانا

صلت رحم وصى بها سيد الاخيار
وعن قطعها المختار قوله نهانا

لابد مانرحل جنايز عن الدار
درب ٍ مشوه اجدادنا مع ابانا

يامحيي الاموات حرم على النار
اجسادهم يعالم ٍ من تهانا

يالعبد مادامة لحاكم وتجار
ماحد على روحه مسجل ضمانا

من لاعمل للاخره مثل الاخيار
يندم لاقفو بعد دفنه حزانا

يالله يالمعبود علام الاسرار
جعل لنا من نور هديك بيانا

عجاب صالح الحنتمي

الناس مركبها جديد الجيوبي
وانا حياتي بين ددسن وهيلكس

شهرين ويبين الخلل والعيوبي
حرارة الماطور والا بها عكس

على الورش دايم وبيضاء دروبي
اهب ياحض الفتى لاتعوكس

لو كان من روس الرجال محسوبي
الحض لامنه تنكس تنكس

لاقلت هبي بالفرج يالهبوبي
الياس حبله في يديه تعركس

عليك ياعلام غيب القلوبي
قلبي يحن من العنا حنت السكس

يارب عفوك من جميع الذنوبي
ادفها قدام وتعود العكس

عجاب صالح الحنتمي