يانجم ياللي بالسما تلهب إلهاب

يسعدني ويشرفني أن أقدم بين أيديكم هذه القصيده المتواضعه
:
:
:

يانجم ياللي بالسما تلهب إلهاب=نورك رغم طول المسافه وصلي
عالي ومتعلي على كل مرقاب=دايم على كل البسيطه مطلي
سبحان من خلاك باهر وجذاب=تخزي بليس وللمسافر تدلي
يانجم أنا باسألك دام إننا أصحاب=عشاق ليل من السهر مانملي
ماشفت ماعينتلي زين الاهداب=اللي أخذ عقلي وقلبي وكلي
الجادل اللي ولع القلب ثم غاب=اللي يتل علاقة الزول تللي
هذاك خلي سيد تلعات الارقاب=سبحان من سواه عز وجلي
هو الذي غير مضامين الاعراب=من السكون لحكم ليت وعلي
من أول(ن) للود ماحسب حساب=داله وعن درب الموده مولي
مااعرف سهر الليل ولاعندي أتعاب= مطوع(ن) في الوقت صايم مصلي
واليوم من عقبه غدى القلب منصاب=ودموع عيني فوق خدي تهلي
أفرح ليا شفته وازعل ليا غاب=ولاأهنى بطعم الزاد من دون خلي
الله يكافينا البلاوي والاسباب=طيفه يضيع خشعتي يوم أصلي
لامر في عيني أضمه بالاهداب=وأرحل معه في كوكب(ن)مستقلي
ليه وله لغيرنا مافتح باب=مافيه مخلوق(ن) لقاله محلي
عشاق في عالم محبين واحباب=واغلى ترانيم الهوى تستهلي
طيفه يسليني وكلي به إعجاب=ولوكثرو العربان مالي مسلي
مع العرب جالس بلا مخ واعصاب=مع العرب ماغير جسمي وظلي
ياويل قلبي من هوى الزين ماطاب=ولافيه أحد يوصل حبالي بخلي
دقيت لجل الوصل جميع الابواب=لكن وصل حبيبي ماحصلي
مدري متى بيجتمع شمل الاحباب=والهم والغربال عنا يولي