قصيدة : معاناة خريجة ( إهداء لكل معلمة عاطلة عن العمل )

بدء
..
لاشك ستتساقط الشاعرية أن لم تحكي الواقع والمعاناة
والشعر لن يكون له جدوى إن لم يكن لسان كل همومنا
لهذا استشعرت هموم كل خريجة اجتهدت وتفوقت وتخرجت
بامتياز ولكن كان التكريم لهذا التميز هو منحها شهادة
بائسة عنوانها ( عاطلة عن العمل)
ربما الواقع ومأساة كل فتاة تدعو كل شاعر لوقفة أخوية نبيلة
مع كل خريجة وأنا بدوري اكتب هذه القصيدة بلسان أي خريجة
فقدت الأمل بقرار توظيف غير عادل

يالله ياللي عالم بكل الأحوال=يارب يارحمن ارأف بحالي
ارحم عيون(ن) دمعها دوم همّال=تشكي لك هموم (ن) تهد الجبالي
همّ الوظيفة أشغل القلب والبال=رافقته بحسرة ودون احتمالي
كم فكرة(ن) تخطر وكم هاجس(ن) جال=وأصبحت من همي أحاكي ظلالي
أحلام تتلاشى وتتحطم آمال=وحلم الوظيفة صار حلم خيالي
شهادتي : دمعي إذا شفتها سال=صارت مثل منظر قديم(ن) وبالي
وش استفيد ودامها مثل تمثال=ووش فايدة علمي وهو رأس مالي؟؟
كل الدروب بصدق أنا عنها ضال=وين الطريق أمشيه واحزم رحالي
من حقي اشعر أن لي دور فعال=أبغى وجودي بس مافي مجالي
مليت هالجدران ومليت الأغلال=ومليت صبر(ن) لو تكلم رثى لي
عامين راحت قلت يتبدل الحال=يمكن احصل نور يقتل ظلالي
يمكن ويمكن طال ترديدها طال=متى ألاقي حل : هذا سؤالي
فرصة وحيدة لو تبيعونها بمال=أدفع ثمنها حتى لو كان غالي
عند البشر والباب موصود بإقفال=غير الوعد مافيه شي(ن) قبالي
ومادام رزقي بيد علاّم الأحوال=ماخاب عبد مّد يمه حبالي