ديوان الشاعر غالب الظاهري

قالت كلامك حلو لكنك تبالغ بالكلام = ماكل وحده بالجمال اللي وصفته نادره
والله لوهي من حكوا عنها وقالوا بالتمام = من مرته هالفاتنه قلبه يروح مصادره
لو شفتها يالشاعر المرهف لتبطي ما تنام = اللي ابهرت كل العيون الوارده والصادره
جمالها ما هو طبيعي ينبش جروح الغرام = وعيو نها بين الرموش اللي تصادم خادره
من زينها كل النساء راحن هكاليله حطام = حضورها خلى اجمل اللي حاضرات مغادره
شف عاد لو مرت عليكم كم رجل منكم يضام = على طعن قلبك وقلب اللي سواتك قادره
بنت الشيوخ اللي حكى التاريخ عنهم للأنام = ما هيب حي الله ولاهي في نسبها حادره
راحت توصفها وعدتها السحايب والغمام = قلت اسئلك باللي خلقك اش اسمها يا مبادره
قالت : (فلانه) قلت : يا دين النبي ليه الملام= هي .. هي .. هي اللي قلت عنها في قصيدي نادره

كيف الوناسه كيفها .. دام الاحوال= وصلت الى الأسوا وكثر التحايل
ما والله القلب يتطمّن ويختال= وهو يشوف الوضع مايل ومايل
الا عقب يكتب رساله للاجيال = قبل ما تكثر بالزمان الهزايل
تكفى كلامي وصله كل رجال= واللي يسوّن بالرجال الجمايل
قل قال ابو قلب التعب قل لهم قال= كل من عليها ربنا قال زايل
الى متى ما نوحّد صفوف يا عيال= ضد المهازل كلها والرذايل
نبي نشوف رجال في سن الاطفال= ونبي تغيب انذال بين العوايل
وأن قالوا المعادله هاذي اهبال = يالله تعجل بالعوض والبدايل
مدامها صارت مساحه للانذال !! = واللي نبيهم في زمنا قلايل !!
قم ياطويل العمر ووقف على جبال = خل الندا .. يسمع بجده وحايل
من حقي أتبرى من اللي على البال= واقول للي طيبهم ما تمايل
كل من تحل المعرفه معه بالحال= لا يعتبرها الا على راس طايل
( فقير ) والا اللي ( قدر يجمع المال ) = الفرق عندي بختلاف الخصايل
ما هو خضوع ٍ للمصالح والاعمال = والا .. نفاقك .. يا لنفوس الذلايل
حلمي وعرّفه معتلي فوق لازال = دايم عيوني صوب حلمي اتخايل
احلم ما ادخل مجلس الا به رجال = افضل رجال بكل ذيك القبايل
ماهوب شرط أنه ولد عم ٍ وخال = أنا ( ولد عمي ) (حميد الفعايل)
مثل الذي به زينوا ضرب الامثال = طيبه يعدّد في جميع الوسايل
كل الرجال لحال والصاحب لحال = حاسب حسابه من حساب الأوايل
في نظري والا ترى مثله ابطال = لو اكتب اسماهم تضيق الرسايل
اغلبهم ما شفته وله قدر واجلال= يا كثر والله طيبين السلايل
جابتهم السمعه لنا عقب الافعال= اللي تعلت وامتلت بالفضايل
ما علت اسماهم بطاقات الاحوال = والا .. الأعلام اللي يجيب الهوايل
والا .. رقم لوحه مميز وجوال = تميزوا في غير رقم الموبايل
لهم احترام وقلبي اليوم ما شال= الا الذي له مخلص القلب شايل

انتفض يالشعر وقــت الأنتفاضه=لا تروح صدورنا مثل الـمـقــابـر
كل وجــهٍ مايـدّور عــن بـيــاضه=والله أنـــه فـي مــذلـه لـو يكـابـر
ياعــرب ياهل النوادي والرياضه=حولوها .. واصعدوا فوق المنابر
فرصة اللي ضايق وزاد امتعاضه=فرصة اللي كان له كم عام صابر
الشجاع يفـرّق الجمـع انقـضـاضه=والجبان افظل سكن له بالــعـنابر
ما عقب لـبـنان والقدس انتهاضه=غـير باللي ياملكنا الشهم خــابر
كل مسلم ليت يضهر من رياضه=بتجاه القدس عـابر خـلـف عـابر
عـــزنــا يالـيـتـنا نــورد حـياضــه=بالسلاح وصـفـنــا فــيـه ( الجــوابر)
ولا نفـكــرباليهودي واعتراضه=بالنهار اللي على سرائيل غــابر
المـهــم أنا نخــلــيـهـا انـتـفاضه=لو ماحد يدفن جثـثـنا بالـمـقـابـر

شفـافيته سحر وكلامه غــذا للـروح=تـغـذى عـلـيه وتنبسط يوم يدهلها
يحصّل امامه كـل باب الـغـلا مفتوح=ويـلـقـى دروبٍ به ترحب من اولها
مـدلل على كيفه متى ما يجـي ويروح=ليا من بغـالـه ديـرةٍ فـي ينـزلها
تضمـه عيـوني والحنايا عليه تنـوح=تحاول تسكت طفلها اللي مبهـذلـهـا
بقلبي مسـويله سـوايا وهـو مسموح=مـدام انـهـا جـت بالنقيضين قابلها
اجل كيف ما أقبل وعطر الهوى له فوح=تنشط عروقي ريحته ويتـخلـلـهـا
وكل المسافه ضمـها خـافـقٍ مجـروح=لقـيـتـه لصالح كل هـاجس محولها
من يقول نجد هناك غـلـطـان يا ممدوح=وانا بالحشا مـن ذيـك الايام مدخـلها
اناجـي لياليها واسـامر هـذاك الضوح=واجيـها بدون انـبـه الناس وادخـلها
اذا ما لقـيـتـوني تراني هـناك اروح=اضـم الأمـاكن فـوق صدري واقبلها
اجـيهـا وانا مجروح وارجع بدون اجروح=واقـول ان مابه غيري اللـي محصلها
لقيت الهوا اللي من هواها غـذا للـروح=يابخت الذي روحه لروحه يوصـلـهـا

يـــــــاراكــــب الــلــي وكـالاتـه لـهــا مـــــده= تــــقـــول زدنــا حســب مــا تـطــلـب اعـداده
مــا فــيــه سيــارةٍ تــوصــف عــلــى حـــــده =فـــي قــــــول مـــن ورده وبــقـــــــول رواده
عـــن غــيـــره نــفــوس نــاس اكـثار منسده= بـــعــــــد تسـيّـــد وصـــــار لأسـمـــه اسياده
خــلــــونــي اوصّــفـه لارحـــــم ابـو جـــــده= واقـــلـــده مــن قــلايــد شعــــري اقـــــــلاده
لــيـــا نــطـــحـــنـــي وتـمــثــالــه عــلى خده =اقـــــول مــا نــاقــص الا تــركــبــه غــــــاده
مــاهـــو عـــلى شــان قــلــبي يـنـفـضح سده=والا عــــــلــى شان احــب (الــكـــزس )زيـــــاده
ابــي يقــــولـــون هــــذا الجـيــب مــن قــــده= كــأن جــــواه صــايـــــر مـــركــــز قــيـــــاده
مــالـــومه الـعــسكــــــري لــوهـو رفـع يــده = يــحــيــي الــلــي عــلـيـه بـثــروتــه قــــــاده
ليا مشى بــالــطـــــريــــق مـجـهـــز الـعـــده= والــلــــي يسـوقــه مـتـكــي لـه عـلى وساده
مـا كــنـه الا صقـــر نــايــــف لــيــا هــــــده= ومـكـــيـــفــه مـــــركــزي تــقـــــول بـــراده
لـيـا تـلامــــع وشمس الـقــيــض مــشــتــده=سـيـفٍ تـلامــع عـقــب جـــرّد مـن اغــمــاده
ولــيــا مــشى بــالـنــفـــود وسايــقــه حــده = يـمـــشي عــلــيـــهــا كــأنــــه فــوق سجاده
مـــا عــــده الا زعــيـــم الـعـــصــر واعــده =مــركــب رجـــالٍ لهـم صـار الــولــع عــاده
قــبــل امس شفـنا اخوه مـحــرك ا ل جـــده= عــلــيــه شـيــخٍ يحـــب الـشـعــب والـقــاده
حـــــجـــاب فـــــوقه كــأنـــه كـــــاسبٍ وده = مـا غـــيــر عــيــنــه تـنـاظــر صوب عداده
مـا حـــركــه لـجــل يــكسـب فـيــه ويــكــده = مـحـــركــه لـجــل عـــلـــمٍ تـعــرف ابـعــاده
نــاخــيــنــه رجـــال حــلــت فـيــهــم الشده= مــا جـــوله الا بـعـــد مـــا سمعوا امجـاده
يـبــون جـــاهـــه قــبــل مـــالـه وهــو مـده = فــي لــيــلــةٍ كـنـهـا مــن لــيــلــة اعــيــاده
عــــز الله أنــه مـا فـيـه احــد وقـــف ضده = كـلــن يـصـفــق لــبــو نـاصــر كمـا الـعـاده
يـسـتـاهـــل الـمــدح لــو هـالـمــدح مايسده=لـيــت الـقــصـيـد أن نـخــيـتـه يـقـدح زناده
والله لـحــط الـجــــواهـــر كلــهــا بــيــــــده = واقــــول تســـتــاهــل اللي قلت و زيـــاده

يالحظات الزمـان اللي تقـل مخلـوقة ٍ من نور=ويا نور المكان اللي حضوره هـم سبب نوره
هـنـا يقف القصيد وشاعره مع عطره المنثور =هنا ننقل لكم صوره جميله .. خوذو الصوره
مدام الحفل .. حفل لحرب واللي حاضره مشكور=اخو أعظم ملك .. حيوا معي حيوا اخو نوره
هلا يا مرحبا ترحيبة ٍ مـن واحـــد ٍ مسرور=مثل ماهي قلـوب الحاضرين اليـوم مسروره
نرحب بالجميع وكل حـربـي بالفرح مغـمـور=كأن ارض المكان اللي عـليه الحفل ممطوره
يا محيـي للـتراث وداعـمه وتمثل افضل دور=لك الشكر الجزيل وكل خطـوة عـز مشكوره
أحـيـيـته في وطنا والوطن داره بدون قصور=وبـه قامت تـزيّـن كل ديـره فيه مشهوره
شف ( أم رقيبه ) اللي كل عـام تفرح الجمهور=يا زيـن المهرجان اللي عـليها كلن يـزوره
رعـيـته يا ولد عبد العزيز سنين مهي شهور=وهو بسم الملك عبد العزبز .. وبـارز ٍ دوره
بذلت جهود وأنت بحب ذيك الغاليه معذور= مدام أنـك تحب اللي بقـول الله مـذكـوره
يا سبحانه خلقها خلق ما يوصف وأنا مبـهـور=من اللي شكلها شكل ٍ عجـيب وكنها اسطوره
وراها يمشي الراعـي ..وراعيها تقـل مسحور =وهي لا( اوده لها) تمشي وراه تقول مسحوره
مثل هاللي امـامـك فـايـزات وأصلهن مخبور= عليهن( وسم حرب) وشكلن موقع على الكوره
يغارن البـنـات ليا وصـفة بـذمــة الدكتور=تراها بذمته وأنا اعـتـذرمن كل دكتوره !!
صحيح أن الجمال يخلي الواحـد بـدون شعـور =مثل هذا الجمال اللي مسوي عـنـدنا ثـوره
تفرج بالرقاب وطولهن .. من روسهن للـزور=ما شبرن باليـدين بنظرة اهل العرف مشبوره
عليهن روس تقـل مكـبرات بعدسة نـاظـور=براطمهن تـدلى كنها مـن تحـت مجـروره
واذانيـهن مثل روس الحراب وهن وساع نحور =تقـل مـن تحتهن نـوافـذ ٍ للريح معموره
على صوت( الموده) يعملن في مشيهن طـابور=ليا جـن مع بعظهن كنهن بالدرب مقطـوره
عليهن حطو الهودج وحـط الماء وحط الكـور=قبل تطلع بـقـيـق وقبـل تطلع راس تنوره
وبهن مهر الكريمه .. يوم مابه غش مابه زور=يعادل للذهب يوم الذهب من غير فاتوره
وبهن تنقـذ رقاب من القصاص وينقذ المأسور=يا كثر اللي قرينا من قصص بالكتب منشوره
وبهن ناقة رسول الله محمد وسمها مشهور=يقول المصطفى عنها ( دعوها فهي مأموره )
عليه افضل صـلاة اللي دعـانـا للهدى والنور= معي صلوا عليه وسلموا.. يا طيب دستوره
ومدام الحفل حفل لحرب واللي حاضره مشكور=اخو اعظم ملك .. حيوا معي حيوا اخو نوره

ياربعنا قصة دخيل البلالي = ما مثلها قصة ولا مثلها صار
هذا دخيل بليله من الليالي = نوى يحنّشل مثل ماكان يختار
وله جارة ٍ ما جابت من العيالي =الا ولد وأصله من مطير الاخيار
قال الولد يا يمه أن كنت غالي= لي اسمحي بروح مع واف الاشبار
ابي اتعلم منه شي ٍ طرالي =ماني صغير وصرت كني على نار
قالت مدامك مع كريم السبالي = ابوصي الحربي مدامه لنا جار
وتخاووا الأثنين صوب الشمالي= يبون كسب اللي يشدًن الانظار
وطاحوا بيد حاكم يحكم الرجالي =ما يعطي اللي ينهب ويسلب انذار
قال اقطعوا لي روسهم بالتوالي= خلوهم عبره لو تجي حرب الاخبار
قال البلالي تكفى .. تكفى ياوالي =اكسب اجر باللي ورا ذيك الاقطار
واسمح لواحد كان فيها مجالي= اللي ورانا مالها كبار وصغار
عجوز ترجي من عزيز الجلالي= يردنا وأنته بهالحكم جبار
قال ايكم قرَب عليه الزوالي =في راسك او راس الولد عجل اختار
قال البلالي خله يسلم بدالي =اذبحني وخل ولدي ذبحته عار
ويوم اقطعوا راس الوفا والمعالي= استغربوا كيف الولد كيف ما انهار
قالوا ابوك وقال ياهملالي =هذا من عيال وسدة حرب الاحرار
وأنا مطيري ماهو عمي وخالي= حفظ وصاة امي وهذا الذي صار
وصاحوا بصوت ٍ هز ذيك الجبالي= كل الرجال اللي هكاليوم حضار
وابن رشيد يقول ليته حكالي = والله ليسلم مير ذا حكم الاقدار
يازينها قصة دخيل البلالي= ما مثلها قصه ولا مثلها صار

يا ملعبه عقب ( معيض العجي ) راح = ولحقه ( رجالله ) عقب مده قصيره
بحزن حربي واحد اتحدت ارواح = قالت خسارتنا كبيره .. كبيره
وصياف حي بوقتها ناح من ناح = على رموز الشعر في كل ديره
واليوم حتى نجمنا الداهيه طاح = اللي يسمى ( المعجزه ) بالجزيره
الموت من ربعي خطف درع وسلاح = يضرب وضربه مثل ضرب الذخيره
صياف بن عواد والكل يرتاح = ان جيب له في ساحة اللعب سيره
الملعبه ما خاضها سب وصياح = ومهاترات اهل النفوس الحقيره
يخوضها بحكمه عظيمه ويجتاح = اكبر جيوش وله مواقف شهيره
تقل بيمنى سيد الشعر مفتاح = ام الرموز الغامضه والعسيره
يزيح عن دربه مصايب وتنزاح = يقوم ابو مفلح وتصبح صغيره
نقضه وفتله لبّس القلطه وشاح = ايام مطلق يوم كانت مثيره
يا وجد ( خلوها ) على صوت ٍ ارتاح = كل البحور اضفى عليها عبيره
ويا وجد ( حرب ) اللي لها سيوف وارماح = عليك ياسيف ٍ وضع في جفيره
عساك بالجنه يا صياف ترتاح = وخليفتك حربي يقود المسيره

قــم يالقصـيد القـومـه اللـي تخـلـيـك = هـنـاك عـنــد الكــــوكب العالي هناك
والله مـدامـي قـــادر احمـيـك لحميك = آمـرك وقـت ووقـت ٍ اخـر بـه انهـاك
ما كل مـن يغــري مـــديحه يعـلـيــك = لـو السبايك حـطـهـا لــك بـــيـمـنـاك
الا الــذي قــالوا لـه : الحـي يـحـيـيـك = وأن شفت وجهه قلت حياك .. حياك
هـذاك مــدحـه ما يجــي فيه تشكيك = بـه يرتفـع يا مـخـاوي الفـكـر معناك
الأقــــربون أولى وأنا يـوم أنـــاديك = أبـيـك تـبـدا فــي مـديـح البطــل ذاك
قــل له ابــن عـمـك قصد يفتخر فيك = هــاك القصيد اللي تزيده فـخـر هـاك
هم يحسبونه يا ابيض الوجه يعطيك = وأنـت الـذي تعطـيـه دامــت عطاياك
غــانــم وفـعـلـك غـــانـم الله يخـليـك = لـلي يـا غــانــم يعـجـبـنه مــــزايــاك
الساميات اللي مـن صغــرك تخـاويك = الشامـخــات الـلـي ما تصلح بـلــيـاك
تـقــل يـقــولن لـك يـالـبـيك لـبــيــك = وانـتـه لـهـن تقـولها جـعـل نـفـداك
وأنــا اتــحــداهــن بــعــد ومتحــديـك = تـنـساهـن لحظه جعله المـوت ينساك
زود ٍ علـى اللي كان فيـهـن مـوصيك = متجــــذرات ٍ فـيــك مـن طيب مجناك
ابــوك عبد الله يــارجــــال يـكـفــيــك = وخــوالـك العـبــاس والنعــم شرواك
الله يـرحـــم مــن تــوفــى ويـبـقــيـك = لـنــا ذخــر لــنــا .. لـنـا لا عــدمـنـاك
وأنته سمي الــلـي حكت عنه هـاذيك = وثـيـقة ٍ مكـتـــوبــه بخــــط الاتــراك
تقــول الى ( فخر القبائل ) وهي ذيك = مـوجـــوده بـديــوان ( فايز ) مـا تخـفـاك
وابـو سمـيـك يـا بــعــيـد المــــداريك = ( احمد ابن رحمه ) ومعروف هــذاك
لـقــب بخـــادم للحـــرمـيــن .. تغنيك = عــن السوالـف كلـهـا اللـي بها اشواك
واللي اسر فـي يــوم خدعه وتكـتـيك = قــتــل بــدولة تـركـيـا والخـبـر جــاك
ما هـمـه الـبـاشــا ولا هـمــه الـبـيـك = مسعــود تــاريخـــه بـالاتــراك فـتــاك
شيخ ٍ مــــن شيوخ المضايين يعطيك = سيره عظيمه يا عسى الرب يـرعـاك
وأنا مادامي واحــــــدٍ مـــــن بنيخيك = لي الفـخــر اكـثـر لـيـا جـيــب طـرياك
عسى يا خـــو نـايـف تـطــول لياليك = واخــوانـك اللي رمــز للطـيـب ذولاك
جـتـك القـصـيده والمـعـانـي معـانـيـك = اهــديــتــها واغــلا الـهـــدايا هـداياك
وأنـت وقصـيد ٍ يـنــكـتـب يا بطل فيك = هـنـاك عـنـد الكـــوكـب العالي هـنـاك

السلام عليكم
.
.
.

الحياه اصبحت بيت الـنـكـد يالكـرامه =كم حـــر ٍ بها يصعب عــلـيــه يتجّول
لو تعلا طــويق ولـو تعلا تـهـــامــــه= لازم أنه من ظــــروف الليالي يحّول
والحمـامـه ومـا أدراك ذيك الحمامـه =خلت النوح وأمست بالـعـلالـي تمّول
كل شيٍ تغير هالـزمن عــــن نظامه= فعلاً الوقت هـــذا وقت فعــلاً يـهـــّول
هذا ردي على اللي قال غالب علامه = مايسوي سوات الناس ويصير الاّول
مادرى أني غني بدون مال وزعامه= ليش أقف عند بابك يالـفـقــير اتسّول
لواكون اخر اهل الارض يوم القيامه= والله أنك ياراسي للــوطــا مــاتحول

تحيات اخوكم / غالب الظاهري