ديوان الشاعر عجاب صالح الحنتمي المزيني

سلام يافيحان فكاك الارقاب
شيخن تنومس كل حربي فعوله

جاهه يفك ابواب ويسكر ابواب
ياطيب هوماته وياطيب قوله

عن ماقفه مايوم راع الوفى غاب
الله رفع شانه ومعطي قبوله

عند الجميع من القرايب والاجناب
لاصعبت القالات توخذ حلوله

من روس حرب ومن عريبين الانساب
جمع النواحل حيهم من حموله

اهل كرم يوم انها خيل وركاب
قدام مانخضع تحت حكم دوله

دولة عدل لفرادها درع وحجاب
تحكم بقول الله وسنة رسوله

وان صاح صياح الصحى فوق مرقاب
ركبو على قحص المهار العجوله

من شافهم عطا عن الذود مجناب
بعد الطمع مايرفعنه رجوله

يابو سعود اقبل تحيات عجاب
ياشامخ الهامه ورمز الرجوله

عجاب الحنتمي

يقول عجاب المزيني بالامثال
ابيات من واقع تجارب سنينه
ماهو وحيد وقال من ضمن من قال
شاعر يحب الهادفه والثمينه
عنده نصيحه يوم تشرا بالاموال
يدفع بها العاقل محاشة يدينه
الدين راس المال في كل الاحوال
لازم حبال العبد بالله متينه
لارضيت من نزل تبارك والانفال
الخلق مرضيها من الناس وينه
مقولتن متوارثه عبر الاجيال
يالله حسن المنقلب والسكينه

عجاب الحنتمي

يالله يامدير الهبايب والافلاك
يارازق الداب العمى بالسراديب
رحمتك يارب المخاليق ورضاك
في يوم مادونه عن الحق تجنيب
من بعد ذكره يابيض الوجه حياك
احلا من عذوق النخيل المراطيب
مدحتني يارشيد في قاف معناك
من طيب راسك ياعسى الراس مايغيب
ربعك فداك اللي من الناس يشناك
ياما ثنو من دون عرش العراقيب
عسل صديق وللعدا سم فتاك
ياعل يفدا الطيبين الزواريب
هذا مردي بآول العيد وعفاك
ياطيب الرفقه بعيد المهاذيب

عجاب الحنتمي

يالله حسن الخاتمه قبل ماموت
ورحمتك في يومن يشيب رضيعه
يارازق النمليه ويرازق الحوت
بعمق البحور والسهال الوسيعه
ياما عليه فات بالعمر ويفوت
العمر صرم واليالي سريعه
يالعبد ماتنفع ندامه والاصوت
اعمل لوجه الله مالك ذريعه
لو عشت في دنيا الفناء بافخم ابيوت
ولك بالبنوك بكل دوله وديعه
اليا قضى عمرك نهايتك تابوت
يالله جنبنا المحن والفجيعه

عجاب الحنتمي

يا الله ياللي معتني بالمخاليق
طالبك وجعل طلبتي مستجابه

يا منزل القرآن يا فارج الضيق
ياللي عن الطلاب ما صك بابه

إنك توفقني بحسن التوافيق
يا رازق الحيين منشي سحابه

من بعد ذكره في جديد الطواريق
ذكرت حلوين النباء والرحابه

أصحابي الغالين ربعن مطاليق
محزم ظفر ورجال عرف وقرابه

وهوب للجزلات عطاشا مشافيق
شيبانهم واللي بزهرة شبابه

عز الرفيق ويحفظون المواثيق
مدحتهم ياللي تريد الاجابه

من تجربه ما لفق الهرج تلفيق
الصدق مثل النور يوضي جنابه


الشاعر / عجاب بن صالح الحنتمي

ياراتبي بعد الغلا والضريبه
يومين خمس ايام والجيب فاضي

صعبت ياحلال الامور الصعيبه
يصعب علي من القصيم الرياضي

وانا بدوين بالديار الرحيبه
اسج لو مملك فلوس المقاضي

مدام ماحطو علي النصيبه
ابغى اتونس في عذي الفياضي

بمن وامان وراس شامخ وهيبه
في حكم حاكم ماعليه اعتراضي

خدام ابيوت الله بمكه وطيبه
اشرف بقاع الارض حاضر وماضي

يالله ياللي كل داعي تجيبه
يعالمن في فرحتي ومتعاضي

الستر في دنيا دنيه مريبه
اعيش فيها كاسبن للبياضي
عجاب صالح الحنتمي

يادار من بعد البطاء جيت مرار
عهدي بشوفك يوم سني صغيري

سبحان من غيرك يادار الاحرار
جف القليب ونش فيك الغديري

الطير هاجر ونحنت روس الاشجار
حتى الورق فيه الهبايب تطيري

اخلا جنابك من مواريث الاخيار
اهل الشبب ومقدرين القصيري

من مات ياجعله مع الناس الابرار
والحي جعله بالف صحه وخيري

مشيت ودموعي على الخد نثار
ادف رجلي دوب رجلي تسيري

والقلب كن بداخله دق مسمار
شكواي للمعبود عالم مصيري

عجاب صالح الحنتمي

الخيل عند اللي عليها يفكون
جرد الرقاب معبسات الشمايل

حمولها ومورده كل مسنون
يوم القبايل مايبون القبايل

بني علي خذ علم صادق ومضمون
عليه من راع القصيده دلايل

قال المطوطح والرجاجيل يوحون
عن دربهم ياليت مالي بدايل

وان حل عند اقطيهن بالنمش كون
ياما اقلعو من طيبات السلايل

في وسطهم للجار للبيت يبنون
والجرب تطلا مابها قول قايل

حاضر وماض يفتخر كل دندون
بفعول ستر امشطات الجدايل

ماني من اللي للحقيقه ايخفون
صادق وماحب الخطا والتحايل

وكل القبيله بنوايب يسدون
حرب الحرايب طيبين الفعايل

افخر بهم واحبهم حب بجنوان
بفعولهم راسي على العز طايل

عجاب صالح الحنتمي

للي رفع سبع السموات مشكاي
اسجد شكر واستغفره كل الاوقات

لاشفت مايكدر حياتي بدنياي
عالجة بكتابه همومن خفيات

في ليلتن عازف فراشي ومركاي
لاطاب نوم اهل الطرب والملذات

علاقتي بمسير الدم بعضاي
اخير وابرك من جميع العلاقات

مالي صديقن غير ديني ومخباي
وبعد النظر وكتابتي بعض الابيات

على النوايا البيض طبعي وممشاي
سيده ماحب الفلفه والحيالات

اليا وطيت افهم على ويش ماطاي
الفكر صاحي والموارد عذيات

عجاب صالح الحنتمي

انا مزيني من قبيلة مزينه
وسامت العرقاه ستر الرعابيب

مع خيرة الامه سكان المدينه
ومن خيرة اصحاب النبي مابها ريب

انشد عن النعمان راع المدينة
تلقاء علوم مخضبين المحاديب

لنا بني سالم جذورن متينه
ومن روس حرب اهل الوفى والمواجيب

مع الحجاز ونجد سقنا الضعينه
نتبع هوا بالوقت حرش العراقيب

كم شيخ عند نحورها جادعينه
بعلط الرماح وحد حدبن معاطيب

من دونها مثل الحصون الحصينه
ونجيبها فوق السبايا مكاسيب

برباعنا للضيف سمن وسمينه
وصفرن بجال النار دايم محاضيب

وقصيرنا يبطي وتبطي سنينه
مايلحقه منا نقاد وعذاريب

ودخيلنا ينعم بامان وسكينه
مايخاف يوم يباغتونه طلاليب

سلم الجدود الاوله مدركينه
شبابنا واللي غطا راسه الشيب

الطيب ياهل الطيب متوارثينه
وماذم غيري ياهل العرف والطيب

بالناس مثل الناس فعله ودينه
والناس فيها مخطي الراي ومصيب

عجاب صالح السالمي