ديوان/// الشاعر مسند بن عامرالحويفي

قال الحويفـي يبـدع القـاف ويقـول=يبدع مـن الأمثـال وجـزل القوافـي
يالله عسى هرجي مع النـاس مقبـول=مثل المطر ماهـو عجـاج وسوافـي
وسامكم مثل الذهـب صـار مصقـول=مثـل الذهـب يغنيـك لاجـاك كافـي
وخلاف ذلك و إسمعوا صامـل القـول=هـرج ً منـزه عـن كثيـر الرجافـي
أبمـدح رجـال المراويـن وزحــول=يـوم المغـازي والليـال العجـافـي
لاهللوا مـن فـوق ذربـات وخيـول=مامنهم اللـي هـو شـرود ً وخافـي
على العدو شـر ً مسلـط ومرسـول=وممنـوع مايطـرون قـول النكافـي
لو كل منهـم عـارف اليـوم مقتـول=مـن عربـة ماقيـل قدمـه يطـافـي
هم لابتن من حرب وحرب ً على الطول=كلـه شيـوخ ً بالمواقـيـف تـافـي
لو كبر حمله حملـه اليـوم مشيـول=تشبـه لـذود ً درهمـت بالفيـافـي
وحربي مدح ربعـه بغيثـن وهملـول=حربن هلـي لوهـم بحـد الضفافـي
ولا أقول أنا هالطيب مخصص ومقلول=كـل القبايـل بــه ردي وسنـافـي
واليوم فـي خيـر ونعمـه ومكفـول=بحكم السعـود وكـل مـي ً وصافـي
صقر الجزيره حام في نجـد ويجـول=فـوق الركايـب والسيـوف الرهافـي
خلف صقورا ً بانـت اليـوم بفعـول=هذاك أبو متعب على الشعـب ضافـي
رحمه على شعبـه ولا قـال مشغـول=رحـب بـزواره ومـن جـاه لافــي
ندعي عسى سلطـان وعكاتـه تـزول=عسـاه فـي صحـه ودوم متشـافـي
في عودتك نفرح كمـا فرحـة سيـول=مثل الحيا بـالأرض وخيـرك يشافـي
وصلاة ربي عد عرضـه مـع الطـول=علـى نبيـاً عـد سعـي وطـوافـي

حياك الله يا ابو عامر والشكرك علي
طرحك للقصايد الجزله
اخوك ابو راشد
ال ،،،،،،،،،،،،،،،،،،،،،،،،

اخي العزيز ابو راشد اشكركم على مروركم الجميل وصح بدنكم وكل عام وانتم بخير والله يحفظكم

ياصاحبي دنياي ماجت على الكيف=شفني اصارع ميلها والعذابي
شفني اصارع حره ولاهب الصيف=وزادت جروح القلب وكثر الصوابي
ياعزتي للحال ومن حال ياحيف=راحو هل الفزعه وطال الغيابي
من بعدهم ما ذقت لذه ولا كيف=وحزني سكن بين الضلوع ولجابي
وقاسيت جرح(ن) يشبه لطعنة السيف=حتى زملت وخفت واخشى واهابي
لو نسنس الذعذاع مع نسمة الطيف=ما كنه إلا شبه حلمن سرابي
اسرح مع الهوجاس وارقى المشاريف=واكن ما بالجوف ولا احدن درابي
يالله مخرج من الجذع لك لليف=ومن النخل تمر (ن) لذيذ(ن )و طابي
ياجامعن بين القلوب المواليف=وعلى النبي منزل عظيم الكتابي
يامنشين غر المزون المراهيف=وبرقن تقادح بالمزن والسحابي
تبري جروحن بالحشاء هي مراديف=دايم معي في حضرته ما تغابي
تعكر صفاء جوي وكل السواليف=يامعطي المؤمن جزيل الثوابي
تفرج وتغفر كل مااخطيت واهيف=واقبل دعاء من شاب راسه وشابي
وصلحت فنجالن على الكيف من كيف=ولا كل مجلس به تنوخ ركابي
مما يشوفك شي لاتقول ياحيف=والحر مايسكن بوسط الخرابي
لاتسب ولاتشم ولاتقول ياكيف=والله يحاسب كل سلبن واجابي
وصلاة ربي عد رمل (ن) على السيف=على النبي صلوا صلاتن بادابي

ياصا حبي والسر لصار مكتوم =
كتمه ترى افضل لو يعقب حراره=
وياطير وشبك بالسماء صار لك حوم=
ما تعز من شالك وشيلك خساره=
وعزاه ياعينن جفت حالي النوم=
تسهر بلليله لين تشرق نهاره=
من علتن في داخل الجفن وهموم=
احيان ابهر دلتي فوق ناره=
واحيان احس بكل ضيقه و مكتوم =
واحيان ابي موضوع ولا انهي قراره=
واحيان احس بظلم واحيان مظلوم=
واحيان بي نشوة نشاط وسطاره=
ناسن سعيد وناس شاقي ومكلوم=
واللي مسك دينه وجود مساره =
يرتاح لو بالبر و الضلع و حزوم =
اعانه الله يوم نور بصاره=
دنيا نفكربه ولكنها حلوم=
ماقالوا اللي قبلنا به تجاره =
كلن بها مسافر ونخشى من اللوم =
وابحتاط عن حر الجحيم وحراره=
والموت حق (ن)لا محاله ومحتوم=
مار البلا حي( ن) تجرع مراره=
موته ترى اقشر من حياته ومذموم=
اللي خسر ثنتين وزاد انحداره=
اللي عصى الله ما يوفق و محروم =
محروم يوم الدرب ضيع مداره=
لو طالت الدنيا ترى العمر مايدوم=
وصلوا على المرسل بخير وبشاره=
عد الرمل واعداد ما تظهر نجوم=

قال الـذي عنـده سلـوم ومبـادي
ماغير المبـداء والا احـدن يفـره
ولصار ريموت (ن) بيـد العبـادي
ريموت بحث ليا انتهى البحـث وره
متربين بالعـز وركـب الشـدادي
مــن ربعـتـن واقــول لله دره
في نجد واسئل في جميع البلادي
من ضاف حرب اشاد فعوله تسره
خيـرن وشـرا للعـدو والمعـادي
وبعض العرب يكثر هرجـن يكـره
مغرور لو صـوت لشـره ينـادي
مـا ينعطـاء وجهـن وذيله يجـره
عده يشوف الناس بعينـه رمـادي
مايفهم سلـوم العـرب لـو تشـره
عاقـل ولاتهمـن كثيـر الـدوادي
اصفح واعذر اللـي بلانـي بشـره
الا ان تمادى جيت مثـل الجيـادي
يعذرنـي الخالـق لكونـه وبــره
وما يمدح الرجـال بكثـر العنـادي
والعاقـل ان زاد الخطـا مايـقـره
ياقف على رجـم السنـع مايقـادي
ولايزهم الشيطـان بقولـن يشـره
ياهيه قل لابنـك وخـذه انفـرادي
يركد مـادام إن النفـوس استقـره
ما ابغى وفاء لو راح مالي نفـادي
وصل الرحم ياهيه ما اقطـع مبـره
إلا المهونـه مـن يهضـم النكـادي
رفيق لكـن هـو لا حقنـي بشـره
مالي خشير الروح بالروح غـادي
وين الضمير اللي خشى الله واقـره
ياجاحدن للمال ومخفـي السـدادي
ومال العفن لو هو تعـدى المجـره
ما فاد شف حالـه وكـره العبـادي
مالـن يعـز الرجـل وإلا يحـره
والاخسـاره جمـع مالـك وكـادي
وافرح وعيد فـي نهـار المسـره
خل الشقى وافـرح نهـار العيـادي
والله يحاسـب كـل مالـن تصـره
الخلـق كلـه للفـنـاء والنـفـادي
امـا نعيمـ بخيـر والا مـضـره
امـا بيـاض بوجـه والا سـوادي
وعلى الحجيج يضيع من اشياء ودره
وماضـاع يلقـونه بيـوم التـنـادي
مار التعجرف يوجـع الكبـد مـره
والفوز بالطاعه وطيـب الفـؤادي
لاتتعب الاجـواد بصوتـن تجـره
كم دعوتن بالليل تقفي هجـادي
وكلن يحاسب يـوم صوتـه يجـره
وصلوا على المرسل رسولن وهادي

[/frame][/QUOTE]

==========

اكبر فجيعه عندنا مـوت سلطـان=وفجعتنـا فـي والـي العهـد نايـف
ياموت لو شكلك على صورة انسـان=عـزالله ابنطحـك ولا انـي بخايـف
ادافع عن الحكـام صقـرن وشيهـان=ادافع ولو راحـت حياتـي قصايـف
مار البلا الرماي لصاب نيشـان=عزرائل ما يطوف ليا مر طايف
يامـوت ياشينـك ولا انتـه بليهـان=حتى زعيـم القـوم تمـره وحايـف
يالله عساهـم فـي نعيمـك وسكـان=وقبورهم خضراء به الـورد هايـف
والله صدمنا موت نايـف والاعـلان=ولا ينوصف بالقاف ولا له وصايـف
ماينوصف فرقى زعيمن وله شـان=ياما اخرس البدع بكل الطوايف
ياما اخرس الشيعه ليا ثار بركان=لو مات نايـف باقي له ولايـف
الرافضي واللي يحرف باالاديان =الله يشتت شملهم والزلايف
وعز الحكم عن كل مغرض وعدوان=وعز البلد وابعد جميع الكلايف
وصلوا على اللي كمل الدين ما انهـان=شفيعنـا يـوم الحشـر والكسـايـف

البارحه قالوا عسى ما تذكرت=عساك سالي عن جميع الهمومي
ياناشدن عن حالتي لو تكدرت=ابشرحه كانك تسد للزومي
وكانه حجي منك استبيح وتعذرت=ابعرض عن الموضوع واقفل علومي
خلاص من جور الليالي تعلمت=وشفرت موضوعي بعدت رقومي
ما كل من صافح يميني وسلمت=اعده صديق ومن عزيز القرومي
عاشرت كم ناس ومنهم تندمت=الله يجير اللي يعاشر رخومي
كبير شره لو غلطت وتكلمت =يشره ولايشره ردي العزومي
عزالله انك خايبن ماتجملت=راع الرداء يشبه لجرد الهدومي
لو غسله غسال والا تأملت = مايغير الغسال جرد الهدومي
واقرا الخطاب اللي وصلك و تسلمت=بعدك ترى عيدن وقرب ثلومي
وكانك تبي رد المعاني تؤلمت =اقبل وانا بحر القوافي اعومي

ياليت مابه تغطيه عنـد هـداج=ولا يغطيه بث(ن) يزيـد انزعاجـه
عما يقيض النفس والشوف ينباج=وأقطن على هداج بواسع فجاجـه
والبيت مابه لمبة (ن) عنده سـراج=ونفطر على بر( ن) يصلح بساجه
وش ضر الاول علمهم خوش منهاج= الصدق فيهم وابتسامة حجاجـه
قلوبن توالف مابها غيض وعواج=والكل منهم صافين في مزاجـه
واليوم في نعمه وبه خير وهـاج=بس الحسد واجد ودينك علاجه
ونوع الماكول مع قشطة التاج=والتمر بدل بين فستق وباجه
ماغير اوضاع العرب يابن فراج=وضاقت عليهم مثل عنق الزجاجه
كثر التباغض والوشايه وهراج=الجار مايزورك و عده خواجه
يصد عن جاره تقل خايف احراج= خايف من الواجب ولو هي دجاجه
لله در الطيب لو صاحبه داج=مايسهج الواجب وعيب(ن) سهاجه
ماهو شبيه اللي صعد رؤس الابراج =اللي صعد بالكذب غبار(ن) عجاجه
ويالله يارازق ضعيف(ن) ومحتاج=رزقك ولانطلب من الخلق حاجه

ياشوق انـا ممـا جـرى منـك تعبـان=وراك غـامـض والحبـايـب يـبـونـك
مــدري كــذا وإلا تـغـلاء وزعـــلان=اغليـك مانـي مثـل مـن يجرحـونـك
اول حروفـك جــو هــادي وبسـتـان=واخر حروفك به رعـد مـن مزونـك
هــذي ثــلاث ايــام غـايـب ولـهـان=ودي برمشـن سلهمـت بـه عيونـك
لاتتـرك المحبـوب جايـع وعطشـان=ولاتهيض الاشواق بكثرت شجونك
الحـب مثـل النـوم غالـب وسلطـان=دشـن غـرامـك واغرقتـنـي فنـونـك