ديوان الشاعر(بخيتان البشري)

فهد عواضة =
زند المشاريـه مقباسـه=بااعمي البصيره يولع نار
الوقت يفشي خفاء ناسـه=فلاج لمسـدل الاستـار
بخيتان البشري=
كلٍ بقيسه ومقياسه = والحق راعيه له دوار
بعض العرب وقتنا حاسه = واظهر حفيره ودق الطار
فهد عواضة=
ميعادنا عند من ساسـه=طيب وملزوم بالمحضار
عوج الفكر جابها لراسه=يبغى يرقع فتوق كثـار
بخيتان البشري=
يامن لفظ كامـل أنفاسـه=لاباس لك ماتشوف أضرار
اخوك فالصـدر مجلاسـه=الأوله ما عليهـا خيـار
فهد عواضه =
هو جهل ولا تغطراسه=يالله ياكافي الاشـرار
يوم الطلب دق بجراسه=اقفيت عنا بلا معـذار
بخيتان البشري=
وقت الطلب جيت بسياسه=ومطلوبكم عندنا مابـار
الحر دايم قـوي باسـه=لازال قايم لـك المقـدار
فهد عواضه =
قـلـت العـلاقـات منحـاسـه=وش صار مدري وش اللي صار
بـنـك حرقـتـه بمحـمـاسـه=يامعرضـن بـه لهيـب الـنـار
بخيتان البشري=
بّرِد بالليمون لـك كاسـه=من خوف لاعصابكم تنهار
اقرِيـك وتـدّور لحاسـه=وفنجال دلتك جانا آبـزار

القاسي الأول=
لن كان وان الغرام يضر = مافــــيه مثلي تضرربه
طول السـنه والليال تمر = وانا خـيامي على دربه
بخيتان=
ياكم غيرك تجرع مُر = يأكل ويرقد ويشربه
وتقول ما بيّ مايذكر =هذاك به نار مشتبه
القاسي الأول=
انا ادري ان الغرام يحر = واللي مشابه تأثربه
لكن بي حال لو يمر = على اهل الشرق عذبه
بخيتان =
كثير عاشه لكن مستّر = شاف التهاويل من غُلبه
وياكم من ذا الهوى هستر=ماميز الشرق من غربه

بخيـتـان الـبـشـري =
سـلام لمحمـد القاسـي=يرقى معه للمعالي فـوق
ياللي لكم قيس وقياسـي=ومطوقين المعاني طـوق
الــقــاســـي الأول =
يامرحبـا عـد نسناسـي=ياوافي القيـل والمنطـوق
انتم وحنا علـى ساسـي=مابيننا في الـزوم فـروق
بخيـتـان الـبـشـري =
تبقى وقدرك على رأسـي=مابيننا فالوفـا مسبـوق
اليوم من زود هوجاسـي=الفكر عيّا معـي لايـروق
الــقــاســـي الأول =
نعرفك من نـار مقباسـي=نيل المكاسب لكم معشوق
ونكان بك حـال حساسـي=الان سوق المطايا سـوق
بخيـتـان الـبـشـري =
من خيرة الناس جُلاسـي=شرواك يالصاحب المرموق
والمال ماسبـب اتعاسـي=كل البلا من غرام وشـوق
القاسي الأول=
الان يـاصـقــر قـرنــاســي=واجه وقوع الحدث برفوق
وابــدا تعـامـلـك بسـيـاسـي=بالصبرتكسب أجر وحقوق
بخيتان البشري =
اخذت فالصبـر مرواسـي=ولافاد في حالة المخنـوق
ضيع شُعوري مع احساسي=اللي فؤادي معه محـروق
القاسي الأول=
ذا حــال مـالـوف لنـاسـي=أهم شي صاحبـك موثـوق
لن كان من صيغة الماسي=تقنـاه ماتعرضـه فالـسـوق
بخيتان البشري =
لولاه كاتم علـى انفاسـي=بطيب اصله وحسن الذوق
ماكنت فالأمـر محتاسـي=قانيه واشكي معه من عوق

القاسي الأول=
ليه عتب يصحبه تأنيب = عسى العتب كان في حله
يرقى صروح الامل ويصيب = وان كان ماصاب لاولله
بأنب النفس لين اشيب = ويمكن بطول العمر كله
سبت ثقه مادخلها ريب = حسيت جهده معي قله
بخيتان البشري=
دّور معه فالأمر لا تسيب = دامك مع الدرب توصله
اسم العتب ينبعث من طيب =لاهو ملامة ولا خله
لايودي الفكر لك ويجيب =لو ينعقد حبلها تحله
قدام تعجل ومثلك ذيب=معروف حكمك شمل عدله

فاقدة غالي=
للماضي ارجوك لا تنبش = وتحيي جمرة بوجداني
انت تـروح وانا ابلش = اطفي نيران احزاني
بخيتان=
إن كنت بتعيش له طنش =لاتكون فالأمر حيراني
من قبل داخلك لا ينقش = ازود من اللي بكم كاني

القاسي=
ياصاحبي نوم طرفي ضاع = مفقود جــاله ثلاث ايام
تقلبت فـــوقي الاوجاع = ذكرت حال (ن) مضاله عام
بخيتان=
يالقاسي ارجوك لا تلتاع = لاتلتفت والخطـى قـدام
الناس قالوا وبالأجمـاع = ذكرى قديمة تجيب اسقام
رد القاسي=
انــا رهـيـف الحـشـا مـيــلاع = مثـل الــورق ترسـمـه بـاقـلام
ذكـرنـي الـحــرف والابـــداع = وامسيت متعب بشكل (ن)عام
رد بخيتان=
انته رهيف وانـا فنـزاع = روحي على حرفك المنظام
جيتك بسبل الوفا فـزاع =مالـوم روحـي ولاتـلام
ردالقاسي=
امشـي طبيعـي بــدون اقـنـاع = والوقت ماشي معي في اصدام
والـيــا تنـاسـيـت جـامـذيــاع = حـرك شجونـي علـى الانـغـام

القاسي =
سؤال واضح ولايصعب = في خاطري للجميع ابديه
يامن سبحتو في بحر الحب = في موج عاتي وفي صافيه
له بحر واحــد وله مركب = كل المحبين تركب فـــيه
والا له فروع ومشعب = كل (ن) على رغبته يمشيه
بخيتان=
جواب لجلك وما تطلب =للخاطر اللي نوى مافيه
بنفيد من ماضي مجرب = حسب الذي قلبنا يوحيه
الحب بحره عذاب وطب =ياما ضحايا على شاطيه
احد ن غرق فيه قبل يطب =واحدن فغبه ولايكفيه

سكري بريدة=
الصاحب اللي سقاني الشهد = اقفــــــــى وعيني له ملده
الــــروح اقفــــــــــت معه تمتد = من بعـــــد راح اظلمت جده
بخيتان البشري=
إن كان فالقلب لك مقعد = لابد يرجع على عهده
درب المودة حشا ينسد = فموّد صادق معك وده
سكري بريدة=
اول وفي و العرب تشهــــد = والحين مدري سبب بعده
ليته يتلطـــــــــف علينا يـــرد = ويبين اسباب للصــــــــده
بخيتان البشري=
واجب عن اسبابها تنشد =دامه وفي بالوفا مده
احسب ومثلك يجيد العد =قدام لا بنيك تهده
سكري بريدة=
لوصالها سائلن ومجــــد = ادري حبيبي على وعده
لكن صرف الليالي بجـــد = احرق فــؤادي قبل خده
بخيتان البشري=
خل الوعد للأمل مسند = زرعك ومستعجل تجده
مرات ترخي ونوب تشد=الدرب مفتوح لا تسده

بخيتان البشري=
والله يلو كان بي تدري = وتعلم بما يحتويه القلب
إنك عليّه تجي تجري = يكفي كياني قلبته قلب
القاسي الأول=
ذكرتني حــــال من بدري = نفس المأسي ونفس الغلــب
واصبح عن الحال مايدري = ولما درى صب دمعه صب
بخيتان البشري=
ذا الحال ماهو لنا حصري=ولحدٍ ذكر فالهوى له طب
ياكيف نعالج الأمري = من شان راعي الهوى يرغب
القاسي الأول=
احساس في مزرع الصدري = مخصوص له نهج له مذهب
له طــــب لكن من حصـــري = في قــــرب من كان متسبب
بخيتان البشري=
ياكيف يعلم بما يجري =ويترجم احساس له مطلب
ولايتعب اللي قضى العمري =مهموم فالود ومعذب
القاسي الأول=
الان مع وقتنا العصري = بسلوب مدروس ومهذب
تعمل مابين الجزر جسري = ذا حل في نظرتي أنسب
بخيتان البشري=
ياصاحب الرأي والفكري = ذا حل معقول ما ينكب
والآن اقدم لكم شكري=واهني اهل الهوى والحب

فايز ال محيسن=
سلام يا حر له صولات = ياحر من ذخر الاجوادي
مشهور بالطيب والفزعات = ومعروف من عهد الاجدادي
شاكي اسايه لكم بذات = في بادي الامر والبادي
الصدر مكتوم بالونات = والدم سيل على الوادي
والعين هلت من العبرات = وكيل القدر كال بزيادي
وان رحت مايعود اللي فات = ولو يرجع للحد انا لحادي
وعد نفسي من الموات = واكتب وصيه على اولادي
ما طلوبي ياراعي الوقفات = تاقف معي وقفت اشهادي
والعفو يكتب لكم لوحات = لوحات باالفخر تزدادي
وانتم كفو ياهل الطالات = تعفون وتقرون لزادي
ويارب تغفر للي مات = ياهادي من غيرك الهادي
بخيتان البشري=
ترحيب من صافي النيات = دايم للأجواد ينقادي
اللي لهم فالوفا جولات =وتاريخ حافل بالأمجادي
يا شاكى الهم واللوعات =الله لايجيب الأنكادي
انتم وحنا مع الأوقات =مانختلف درع وسنادي
والوقت لابد له ميلات=وماراح ماعاد ينعادي
عسى العواقب لماهو آت=تفرحك وتعيش فأعيادي
الكل مناعلى ميقات= لو نجتمع جمع وافرادي
هيهات نغيره هيهات =فالغيب لله مارادي
قدام تكتب لنا الأبيات =الجهد مبذول بوكادي
والله يفرج لنا الكربات =ويبدل الحزن بسعادي
انتم وحنا على الهقوات =فالخير نسعى والأرشادي