ديوان الشاعر عجاب صالح الحنتمي المزيني

الجود باهل الجود عاده قديمه
نشو عليها من قديم السنيني

توارثوه اهل الكرم والعزيمه
مقدمه للضيف سمن وسميني

ومن وارثينه ريف ضيفه وديمه
كريم ساس اكرام علمن يقيني

الباب فاتح والصحن به وليمه
وصفر الدلال وطيب معدن وديني

وحجاج يضحك والنوايا سليمه
منصى شيوخ وعون للمستعيني

ابن نهار الله لربعه يديمه
من حقي افخر في طويل اليميني

الطيب يامحمد تجي له قسيمه
وراعيه له رب الخلايق يعيني

كم واحدن دونه يذب الخريمه
يابن وهب بك شادو الغانميني

عجاب صالح الحنتمي

بعد السعه دخلت في حقل الانشاب
يالتني فكرت قبل الدخولي

واليوم ياعلام سري والاسباب
مع الندم والياس فيه ذهولي

والعين عافت نومها والفرح غاب
والحال حال مشردن ومعلولي

يمشى بهدنيا على غير ماطاب
حافي قدم فوقه ثقيل الحمولي

يانون عيني علتك روس الاهداب
وانا مكحلهن ثلاثين حولي

اهبي يادنيا تقلب تقلاب
ثوب الغناه اتبدله بالسمولي

الظن في منشى نواشيه مخاب
وان مت جعلي عند ربي قبولي

عند الولي كلن له كتاب وحساب
الباقي الله والخلايق تزولي

عجاب صالح الحنتمي

عندي لكم يسامعين النصايح
نصيحتن ياطيبها من نصيحه

ماسجلت بالانظمه والاوايح
مبغابها عند الخلايق مديحه

اجري على ستار عيب وفضايح
صريح واحب العلوم الصريحه

تسامحو قدام موت وجوايح
الادمي لابد حيه يصيحه

بكره ليا صاحك من الحي صايح
ومالك مع الارحام قومه وطيحه

تنسى وباقي بالصحون الذبايح
ان كان سوو بالعزا لك ذبيحه

الناس مختلفين فكر وشرايح
ومايفيد حنا كف يمنا جريحه

دنيا الفنى فيه الفتى تقل سايح
لابد ماسود اليالي تزيحه

عجاب صالح الحنتمي

لي مطلبن ياعل ربي يهييه
لو كنت ميس ماعلى الله صعيبي

يامدني اللي بالسماوات تدنيه
بعد البطا والبعد يصبح قريبي

للخلق مهما ايصير ماني بشاكيه
شاكيه للي فوق خلقه رقيبي

علام ماتكن الخلايق وتبديه
من رحمته ياعل ليه نصيبي

لناس ماني ياهل العرف مطريه
من عادتي مطلع على الناس غيبي

زمنك يالانسان ماكثر بلاويه
مره معك تخطي ومره تصيبي

الوقت لالقاك مقرن علابيه
تشيب لو ماحان وقت المشيبي

ومن اقبلت دنياه تلقى حواليه
الناس لو انه محدر شعيبي

عجاب صالح الحنتمي

ياسعود للماضي بقلبي موده
يحن له قلبي من الحين للحين

لو كان ماليه مع البدو لده
خالي من الثنتين ضين وبعارين

القلب ماضي فات وقفى يشده
شديد بدون من شفا نجد عجلين

من فوق يابن ابوي زمل الاشده
حدب الضهور مقوسات العرانين

القلب ماله عن هوا نجد صده
ياسعود مع دمي مشى بالشرايين

كم ليلتن فيها ذراعي مخده
انام ماعندي فراش وبطاطين

وصحى قبل ليل الدجا مايقده
نور الصباح وصوت بعض المواذين

نشيط لاسكر ولا في غده
مرتاح بالي لامشاكل والا دين

واليوم حيلي بارد الوجه هده
مكيف الفريون مابين جدرين

عجاب صالح الحنتمي

ياشيب عيني من طوال المراقيب
في روسهن كني مضيع ذهيبه

اطالع الاطلال وقنب كما الذيب
وسود اليال القادمه وش تجيبه

وين الرجال اللي تسابق على الطيب
كلن على قبره تلوح النصيبه

يوم اتذكر طيبين المجاذيب
اون ونت من غدربه قريبه

اليا تكلم خاف هرج الشواذيب
واليا سكت ياكبرها من مصيبه

جرحه لجا خلف الضلوع المحاديب
خافي وحير في زمانه طبيبه

الوقت لاكدر عليك المشاريب
ومريت بظروف الزمان الصعيبه

ردك ورى مافيه شكن والا ريب
لو انت رجالن تصيب الضريبه

واليا اقبلت دنيا الشقاء والتعاجيب
خلتك شيخ ولك مكانه وهيبه

ختامها ياعل ليه مقاضيب
بعراك ياللي كل داعي تجيبه

عجاب صالح الحنتمي

ياللي مواعيدك مواعيد عرقوب
عرقوب مات وصرت عرقوب ثاني

مانته على بعض المواضيع مغصوب
خل النظر قدام يالمودماني

مدام منته بين الاجواد محبوب
لابد ماعشرك تعود ثماني

ودك عليه تلبس الثوب مقلوب
وانا ماحب الواحد المغلطاني

صادق وهرجي لاتكلمت محسوب
مارضى على النفس العفيفه هواني

العبد مهما يجتهد كله ذنوب
يوم اتذكر يالله المستعاني

عفوك ترا الدنيا بها العمر محسوب
جميع ماب الكون لاشك فاني

عجاب صالح الحنتمي

يالله يالمعبود دمر اسراييل
طغو وزادو بالبسيطه فسادي

ارسل عليهم من سما طير ابابيل
على طلوع الشمس والا هجادي

اجعل بهم عبره لجيلن بعد جيل
ابراجهم بمرك تعود رمادي

الغرب يدعمهم بجيش ٍواساطيل
ويرسل عليهم كل ساعه عتادي

ذبح النساء واطفال باقي مجاهيل
من حقدهم على فلسطين عادي

يثالث البيتين صبرك على الويل
لابد ماينادى بيوم الجهادي

ويجيك من كل البسيطه رجاجيل
سنه واهل توحيد دين ومبادي

مايتبعون ايران جمله وتفصيل
الله مهديهم طريق الرشادي

يذنبك المذن ويعدل بك الميل
ويغسل عن الامه جميع السوادي

بالعين من ماشوف مثل الثواليل
اليا غفت ساعه تعيف الرقادي

عليك يامولاي كل التساهيل
انت الوحيد اللي عليه اعتمادي
عجاب صالح الحنتمي

انا معاشي ماغير الفين
وساهر عليهن موازيني

تقول ديان يطلب دين
عند الخطا مايراعيني

لو قلت شايب وصل ستبن
عنده حساب الوراعيني

لو دوب رجلي على البنزين
ادنات غلطه طمع فيني

احاول ايسار ثم يمين
وقول ماعاد يمديني

وغيري ضحايا من الجنسين
ماتنام له بالبلد عيني

لو نخلتن تحتها سيفين
اعميت عينه من سنيني
عجاب صالح الحنتمي

طاف الوعد يازيد وانا اتحراك
مثل الجنود اللي تحرى المعاشي

يازيد لاتعطي رفيقك مقفاك
اطلع سماء خل الوطى للخشاشي

خلك كفو تذكر وتشكر مزاياك
الطيب غالي مايجي بالبلاشي

خل الحيا والصدق والدين مبداك
والحق قوله بالزمن لاتخاشي

مدام خلاق المخاليق عافاك
وعلى قدم رجلك مع الحي ماشي

للاخره شيد مباني بدنياك
وحذرى تطيش ان شفت لك خبل طاشي

اكبح جماح النفس لاتفرح عداك
ولاتستمع في هرج مبغض واشي

يازيد ماينفك هذا والا ذاك
عليك لالفو جديد القماشي

يالله يالمعبود عفوك وحسناك
في يوم مادونه مفر ونقاشي
عجاب صالح الحنتمي