ديوان الشاعر/ سعد المحمدي

سلام تسليمه مثل ليلة العيد=عيد ارمضان اليا قضينا صيامه
يفوح منها الطيب فوح البغاديد=بوجار شيخٍ فيه جود وقرامه
ياعيال وايل ذابحين المفاريد =وعوق العديم وساس عرف وزعامه
ياهل الوفاء ماهي هياط وهرابيد=لابه لكم في هامة المجد هامه
ارجال دنيا ودين نعم الاواليد=خوه وجيره مع كرم وستقامه
وان صارت الدعوى بخشم البواريد=والرمح والشلفا وقل السلامه
عاداتكم ذبحة شيوخٍ صناديد= في يوم نجدات الفتى من حزامه
اليا اختلط عج الرمك والعباريد=تثنون يالويلان دون الجهامه
ستر االعذارى لاهبا كل رعديد=في يوم يشدا يوم حرب الرغامه
الطيب ماله ياهل الطيب تحديد=وماكل من يبغاه حقق مرامه
قمة جبل مرقاه صعب ومسانيد=كايد وعن راسه تقطع غمامه
يصعب على راع الهروج السراميد= اللي حياته بين هون ورخامه
ان صملو بالراي قطاعة البيد=اكبر طموحه عند حلة مدامه
يضحك ليا صكن ضحا حوله الغيد=والضيف لاشافه تراقل عضامه
كلام حربيٍ على حق ومفيد=شاعر وله بين الرجال احترامه
ماله ورى ذكر الحقايق مقاصيد=الصدق مثل النور يجلى ظلامه
والظلم ضلما والخطايا مناقيد=يجزى بها الانسان يوم القيامه
يومٍ يشيب فيه من يرضع الديد=والشمس فوق الروس مقدار قامه
يالله يامغيث السهول الجراهيد=انك تجنبنا طريق الملامه
وتجيرنا من شر كل المقاريد=سود القلوب اهل الدرى والغشامه

توضيح حول قصيدة درهوم البقمي في قبيلة حرب

--------------------------------------------------------------------------------

تناولت وسائل التواصل الاجتماعي
قصيده موجهه لقبيله حرب عامه وللشيخ / عواد ابن دهيرم الاحمدي الحربي خاصه ولكل حربي يفتخر بقبيلته التي لها من الامجاد في كل نواحي الطيب والكرم والخوة والشجاعة اضافة الى حسن الجوار الذي تتحدث عنه هذه القصيدة وهذا الموقف النبيل الذي تناقلته وسائل التواصل الاجتماعيمن الشاعر / درهوم البقمي واختفلفت طرق النقل لهذه القصيدة في وسائل التواصل الاجتماعي ويعتبر هذا الفعل شرف لقبيلة حرب ويضاف الى امجاد القبيله حيث جاءت هذه القصيدة رد ثناء من قبيلة البقوم العريقة ونعم بكل القبايل بما فيها من رجالها وامجادها وافعالها

حنا نزلنا منزل وسط الأجواد=
=في ديار حرب امخضبين الهنادي
قصيرنا عواد و نعم بعواد=
=فعله وطيبه مثل فعل المهادي
شيخ علئ العليا فلا هو بكواد=
=يرقئ لها رقيةً طيور الهدادي
بيته علئ مدخال كحله توكاد=
=يمين وبابه للطراقي ينادي
بين ولا يحتاج نشدات نشاد=
=مثل النجم وسط السماء نور بادي
سوالفه مثل العسل طب الاكباد=
=اموفقه ربي بهرجً سدادي
ترفع له البيضاء علئ روس الاشهاد=
=كفً نديه جعلها بزديادي
قلته وانا درهوم من ماكر ناد=
=من الاد سامي محتمين الطرادي
ابقوم سادات علئ كل الأسياد=
=وقصيرنا يهنا بحلو الرقادي
ماهي سوالف هرج وابيات قصاد=
=يشهد علئ ما قول حضر وبوادي
والطيب وفقه كان حظ الفتئ جاد=
=الدين ساسه من خطا الدين غادي
يالله تقدرنا علئ الطيب وانقاد=
=الكل ما يرضيك يا خير هادي
ويا سعود دوك القاف وأمعطر بكاد=
=وامعطر فيه النفل والزبادي
سلم علئ شايبك في ثان الأعياد=
=يالله عسئ عمرة صلاح وعيادي
كل عام وانت بخير يا كفو الافناد=
=وكل عام وانت اقرب لرب العبادي
و يا الله يا جاعل من الحيد الاوتاد=
=تجعل قبر عوده رياض و برادي
واختامها يا جموع صلو ويا افراد=
=علئ شفيع الخلق يوم التنادي

ردي على الشاعر درهوم البقمي

درهوم ياراع الوفاء ساس الامجاد=ياطيب الجيره نصيح الفوادي
مدحة من طيبه على عصرالاجداد= شيخٍ لفعل الطيب مشيه سنادي
له بالكرم والطيب جلسه ومقعاد=للجار والمرار نجره ينادي
وانته كريم تثمن الملح وزاد =انا اشهد انك جار راعي مبادي
ربعك هل النخوه وسيعين الابناد=اهل السيوف الامعات الحادي
جمع البقوم اللي يضدون الاضداد=من دون بالميدان قطم التوادي
يوم القبايل بين طارد وطراد=اما تجيك الصبح والا هجادي
الكسب من دار العدا شقح الاذواد=من فوق خيل مدربه لطرادي
تخلي سروج الخيل في ساحة الماد=وياما اذبحو من شيخ راعي شدادي
ابيوتهم دايم لها الضيف رواد=حقايق ماهي علوم ودوادي
فيها الدلال اللي بها الهيل وقناد=وسمن وسمين وريح عنبر وكادي
في ضلها تلقى مطانيخ الاولاد =شدنا وغيري باهل الطيب شادي
وماقل دل وعد ماحن رعاد =صلو على المرسول لناس هادي

ياراتبي روح عليه غبينه=بين القسايم والفواتير والبنك
ماله بجيبي بعد يومين عينه=والبيت اجار وكل سقفه من الزنك
من قال بشرنا عسى الحال زينه=نقول له في خير لو نشكي الضنك
من لابنا مستقبله في يمينه=لايحتري يعطا جنيهات وفرنك
يالادمي دنياك دنيا مهينه=يمكن بها غالي قرايبك يطعنك
اليا قبلت مثل الفتاه الحسينه=لو فيك مية عيب تحفظ توازنك
وان عاكسة ذقت القهر والغبينه= ماعاد ينفع طيب خالك ومعدنك

لاصحابي الحصنان جبت الجدايد=البايته ماتستوي للمشاكيل
شاعر واجيب من الفرايد فرايد=واترك هزيل القول يلقى مهازيل
ماكل من يكتب جديد القصايد=يطرب مسامع شاربين الفناجيل
الجزل قمة صوح مرقاه كايد =يبقى مع الاجيال جيلٍ بعد جيل
والهزل مابه يالعوارف زوايد=لو قايله غناه شقر ومواويل
الشاعر اللي مابقوله فوايد =يرتاح عند القهوجي والمعاميل
لايزاحم الشعار والحيل بايد=تبرك به الجرباء قبل ياصل النيل
وانا حسب سلم العرب والعوايد=سلام تسليمه مثل ريحة الهيل
قلدتها من كل جزله قلايد = وغلفتها بالمسك والطيب وكليل
لاهل الوفاء من كل دار وبدايد=في محفل الحصنان ذباحة الحيل
اهل النباء الطيب وساع البنايد=حرار ماتصبر على الذل والميل
وريف القصير وماتمد الزهايد=دايم ومدتهم تغيض المباخيل
شجعان في يوم الخطر والمزايد=يوم القبايل باللقى تسرج الخيل
ياما ثنوي دون الضعن بالشدايد=بالرمح والبندق وحد المصاقيل
قبل الامن يصبح على الدار سايد=كم ابلجن عاقوه يوم المصاويل
يتلون شيخٍ هومته للبعايد=تتعب وراه اهل الرمك والجماميل
لاطاب لخدود الرخوم الوسايد=غنايمه عكش الوبر والمضاليل
معروف مايحتاج منا نشايد= فعله وذكره عانقٍ نجمة سهيل
عن منور الاول كتبت الوكايد= وفي منور الثاني تزين التعاليل
شيخٍ لربعه بالصعايب سنايد = فطين ماتمشي عليه المحابيل
عن واجبه راع الكرم مايحايد= بيته لعصمان الشوارب مداهيل
بعيد عن علم الردى والنقايد=هاذا الكلام اللي عليه المعاديل
ماحرك الغربي شجون وجرايد=صلو على من ذلل الشرك تذليل

في حفل مروين النمش والرمح والسيف الشطير=عزوه على الجيران والعاني وساع صدورها
يامرحبا يامرحبا ترحيب مقطوع النظير = من هاجس اللي مايقدم للعوارف سورها
شاعر يعشق الكايده ويعوم بالبحر الغزير= وان حك عود بعود عدوانه يفج نحورها
ترحيبةٍ مثل الذهب والورد مكسيه حرير = على جميع الناس بالقاعه تفوح زهورها
ماجيت عاني من بعيد الدار يالجمع الغفير= الامحبه للرجال اللي وساع صدورها
لو كل داعي لادعاني جيت من شانه مغير= طالت علي المسئله في برها وبحورها
هرج العواذل لاذكرت الصدق ورضيت الضمير=مثل الجنايز يوم ندفنها بوسط اقبورها
يابو حمد ياراعي الجزلات والوجه المنير=تكريمكم سر الرجال اللي طوال اشبورها
تستاهل التكريم والتقدير مع ورد وعبير=والله يجيرك من صودايف الليال وجورها
جمعت بين الدين والدنيا وتقدير القصير =كل العلوم الغانمه نلقاك مع مضهورها
عواد لاعدو رجال الطيب والفعل الشهير=يذكر ويشكر والوفاء سابق تعلى كورها
ربعه ليا زاد الخطر والسيف سل من الجفير=كم ابلجن عاقوه بالميدان دون ان شورها
اهل الكرم والطيب والمعروف عون المستجير=احامده ماينكسر يوم اللقى طابورها
على الشريف وعسكر الباشه عذابٍ مستطير=وحمر الطواقي من جهتها ماتنام اسبورها
لهم على الفقره سياده ماجهل فيها بصير =ماحد تعلا يوم صولات القبايل طورها
الزير لادقوه وقت الحرب باليوم الكبير=تنطح وجيه القوم ماتلتف خلف ظهورها
وفي نجد ياما جندلو من دون حلوات الدرير=عقيد قومٍ بالمعارك مايهاب شرورها
لاشافهم راع الطمع دون العشاير يستخير=يوم المشاكل بين خلق الله تفوح قدورها
عون الرفيق مدلهين الجار معطين الفقير=اكرام ساس اكرام واهل النور نظهرنورها
يقوله اللي يعرف الفراش ويعرف المدير=والناس في هرجه وشعره مايمس اشعورها

من هاجس الشاعر اللي يعشق المستحيل= يختار جزل البيوت وترك اهزالها
عينه عن النادره ماله ومال الهزيل =والطيبه بيض الله وجه من قالها
سلام بالعيد الاول ريح عنبر وهيل =والذ من در من ترزم على اعيالها
وحلا من التمره اللي في عذوق النخيل= مع دلةٍ شف راع الكيف فنجالها
يالعزوه اللي لكم بالمجد باعٍ طويل= كل المسره كبار القوم وشبالها
ياطيبين النباء ياحافظين الجميل = ياعزوةٍ يامن المطلوب في جالها
وثني سلامي على شيخٍ شجاع ونبيل=وان بان بالقوم خله يستر احوالها
الشيخ مطلق زبون الكايده والدخيل =الله يجيره من الايام واهوالها
ياعل من خلفه في يوم كشف الحصيل =ايضله الله مع الابرار بضلالها
للطيب والعرف والنوماس دايم عميل =كريم سبلا فعول الخير يسعالها
لين جنابه بحال وحال صعب وثقيل=وتشوم نفسه عن الرديان وفعالها
من بيت شيخه قديمه في صحيح الدليل=ماهي بحب الخشوم ونصب وريالها
جاته بضرب المشوك والنمش والصقيل=يوم السبايا تعرف القوم خيالها
حفيد شيخٍ لصاحن ماشطات الجديل=ياما ثنى دون ذود القوم وحلالها
يرعى الخطر في ديار القوم ماهو ذليل=لاقال وين المسره صاحة ارجالها
يدب بهم روس قومٍ يشعلون الفتيل=في يوم ياصل عسامه قمة اجبالها
ياسعد من هو حزامه بالنهار المهيل= اليا اختلف منطق العدوان وشكالها
اليا نزلو ديره الاخصام عنهم تشيل=للسود البيوت الضليله دنت اجمالها
اهل الكرم والرجوله جيل من بعد جيل=الطيبه دونها ماتقصر احبالها
وختامها ياعظيم الشان ربٍِ جليل =احفض وطنا من الاشرار وعمالها
الامن ماله ثمن لو نفعل المستحيل=كلمه عسى كل شعب الدار يصحالها
من حولنا كم من شرد وكمن قتيل=ياناس هاذي فتن مافالنا فالها

الله يبيض ياعرب وجه فايز=ويكفيه ربي من صواديف الايام
انشهد انه راعي الطيب حايز=على العلوم الساميه نسل الاكرام
قمة جبل مايحركه كل رايز=دون القبيله بالزمن درع وحزام
عزيز من ربعٍ علينا عزايز=يستاهل التكريم والمدح ووسام
يفداه من يروي كلام العجايز=ماله بتوثيق الخبر بصمة ابهام
وماله بجزلات السوالف خزايز=عايش على قلب الحقايق وهدام
كلام حربي مايحب اللفايز= وان حك عود بعود شاعر ومقدام

مريت واد الحمض عشره من الشهر=والدمع من عيني على خدي انحدر
حاولت اخفي دمع عيني وضيقتي =من خوف عدواني من الغرب والجبر
تفرح عليه من حسدها وغيضها =وانا على كل الفريقين منتصر
مبكى عيوني غير عشقى لديرتي=عسى عليها صادق النو ينهمر
للولد فيها افعال ماهي بدوبها= اللي يحاول حصرها صعب تنحصر
متيه حمرٍ شبا السيف دونها=وشلفٍ مضاربهن على القلب والنحر
نتبع هواها باول الوقت واخره=نرعابها يوم الخطر ديرة الخطر
كم شيخ صبحنا على راس عزوته=وان شافنا بطرافها يعطي الظهر
الواو في يوم المصيقر قصيدته= تبقى مثل نقشٍ على عالي الصخر
ابيات تبقى ياهل الشان خالده =ماقال غير الصدق ياسامع الخبر
على الفقير ساقو الزلم يمنا =اجموع مثل الموج في غبة البحر
حنا نهار الكون تسعه وكثرها=من فعلنا كم ابلجٍ طاح وانكسر
بعد الطمع قفت مع البيد خيلهم=ماذمهم فيهم جساره مع الظفر
والترك جونا بالمدافع تجرها=من قو سطوتهم للاخصام تحتقر
يوم اسندو مع وادي احراض وانتهاء=بالشرف قمنا نصهر الجمع وانصهر
وكون الغرابه راحة القوم هاربه=كتايب الاخوان نثارة الحمر
على طلوع الشمس جونا بخيلهم= والعصر يبغون السلامات والمفر
وبعد السنه عادو على الخيل والنضاء= يبغون ثار العام حاديهم القهر
على النصيع وماوراها ودونها = مثل الجراد اللي مع الوادي انتشر
خلو عقيد القوم من ضرب شلفنا=ينزف صوابه بعد ماطاح وانعثر
حذف الجنايز بيمن النزل ويسره=يومٍ على الاخوان مامر بالدهر
على الضييقه والجفر قام حضنا=وفي يوم شجوه وام عرقوب نفتخر
وفي راس ريع امدرجه جعلها الحيا=دون المليحا فعلنا مدهش البشر
ويوم الحوير حن من هول ماجرى=امبشره بامه عسى قبره المطر
رد الوسيق اللي بعيدٍ مردها=ماطاع هرج العود من زايد السطر
وبواط فيها والفويرع افزوعنا =كم طامعٍ من ضربهم قام يحتضر
وفي وادي الصفراء من الترك كسبنا=فوق اربعين من الزمل تحمل السفر
عطيت روس اقلام عن فعل لابتي=جبت الكلام اللي موثق ومختصر
واليوم دار القوم مخلي جنابها= الارض جفت وانحنا شامخ الشجر
قلت منافعها وجفت عدودها=جميع مافيها من الوقت مندثر

انتشر مقظع لبعض الشباب اللي يقضون رحله خارج الوطن ويتحدثون عن جو المليليح وشجوه والفرق بينه وبين الجو اللي هم فيه بالخارج ورد الشاعر محمد عياد العروي الجهني بقصيده
وذكر ان شجوه والمليليح لقبيلة عروه من جهينه مع العلم ان تشاطرهم فيها قبيلة ولد محمد من حرب وخاصه السواعد والتمم والسعادين وعندما سمعت القصيده رديت على الشاعر محمد العروي
وبعد وصول قصيدني له رد بقصيده اعتذار واعتذاره من شيم الرجال النبلا وهذا حق الجار على الجار وقبيلة عروه تربطنا فيها علاقات كثيره من جيره ونسب واصدقاء وغيرها نعم بقبيلة عروه وجهينه عامه وكل القبايل

يالشله اللي يم بنكوت غادين=ماهي وطنكم لو عجبكم هواها
ياللي تسبون المليليح غاوين=وشجوه بعد ماضرها من هجاها
يالشرذمه ياللي عن الدرب حادين=خابت هقاويكم وخايب رجاها
هذي ديار اللي على الحق رابين=سكانها عروه يذري ذراها
اهل الكرم والطيب بالعسر واللين=نفخر بديرتنا ونعشق ثراها
يوم اشهب الدخان وسط الميادين=عروه حموها والعدو ماحماها
سكانها اللي يلحقون المخلين=نفخر بماضيها وفيه انتباها
برادها مع شمسها يالمساكين=عاشو بها ارجالٍ تكرم الحاها
تاريخها تشهد عليه السلاطين=الحمض يبراها والاجرد وراها
على ارضهاعشنا على الحق ماشين=نفخر بها ماضرها من هجاها

ردي على الشاعر محمد عياد العروي

ياجار جيب البينه والبراهين=عن العلوم اللي سمعنا صداها
للجار يالجيران حق وقوانين= مثل النجوم الامعه في سماها
انتم وحنا ياهل المذهب الزين=جيران في شح السنين ورخاها
مقداركم عالي على الراس والعين=طبعي رجال الجود مجحد ثناها
والغلطه اللي سجلت بين قوسين=قريتها والغير مثلي قراها
ياجب على محمد وريث الكريمين=تصحيح غلطه عيبها في حشاها
الدار منتم في كنفها وحيدين=ايمين واد الحمض ربعي احماها
فيها السواعد والتمم والسعادين=قومٍ يعيف اطرادها من غزاها
ياما اذبحو فريس ماهو بسيطين =دون البكار اللي طويله اذرها
ماقل دل وماكتبنا عناوين=والناس يعرف طيبها من رداها

رد الشاعر محمد العروي

يامرحبا ترحيبةٍ عن ملايين= مني لبن دومان عجله اخطاها
وتعم حرب اللي تكيد المعادين=لطامة اللي بشدايد شناها
وتخص ولد محمد اللي موالين= ازحول الرجال اللي تعز اقصراها
المعذره ياصحابنا يالميامين=يالعزوه اللي عاليٍ مستواها
مانقبل الزله من اول وهالحين=وان كان فاتت حرص بطفي سناها
ماهو قصور بحقكم يالشريفين= هاذي معاذيري عساها عساها
قافٍ كتبته ياعرب قبل يومين=من شان ناسٍ يقلع الله مداها
بينت قاقي ياجماعه بثنتين=الحمض يبراها والاجرد وراها
اديارنا ودياركم يالشياهين=مانطاوع اللي بالنوايا نواها
انتم وحنا فوق هالارض ناشين= متقاسمين المرجله في حماها
والمعذره ياصحابنا يالموالين=عن زلةٍ من شاعرٍ مانواها

يابو سعد رب المخاليق يكفيك=من شر غبر ايامنا والليالي
لاجفت الاقلام جعله ينجيك=في يوم ما ينفع عمام وخوالي
انشهد انه يرفع الراس طاريك=لك تشهد الاجناب قبل الموالي
حربي على فعل الجمايل مباديك= تذكر وتشكر ياكريم السبالي
يافزعة المحتاج وان جاك ناصيك=عليه لاضاقت وساع السهالي
وده يقوم وطاح وسط الشرابيك=اليا عتدل حمله تعثر ومالي
هذا كلام الصدق مافيه تشكيك= موثقه مافيه كذب وخيالي
مالي ورى ماقلت يسعد لياليك=اهداف تذكر يابعيد المدالي
في خير جعل الله يعزك ويبقيك=من فضل ياغازي عظيم الجلالي
لكن طيبك طيب الله مساعيك=خلاني اكتب بالقلم ماطرالي