ديوان الشاعر \ نافع الحربي

يالله يامنزل من المزن الامطار




يالله يامنزل من المزن الامطار = يامحيي عروق الهشيم السنية

ياعالم احوال البشر سر واجهار = ياعالم بالبينة والخفية

تجعل لنا بحماك عتقٍ من النار = يوم الحساب ويوم ترك الحمية

سجلت شعري يوم حبر القلم سار = بصحايفٍ من ذم ربعي نقية

بيضٍ عليهن لهل المعرفة كار = من ظلم صُواّم الهواجر برية

ان جيت جيت بملتقى عز وا خيار = أهل الكرم والطيب والشاذلية

وان رحت رحت لديرةٍ غيم وازهار = يطرق هواها شيح نجد العذية

احرار نوفي بالمواجيب الاحرار = والا الردي ماله لزومٍ علية

الحر يحفظ هيبته وقع واطيار = والرجل تعرف قيمته من خويه

هواي بالدنيا طويلين الاشبار = اللي لهم بالمجتمع قابلية

حمايت الساقة بعيدين الانظار = لاعودت شرايد الألف مية

كم واحدٍ تظن فيه الوفاء بار = ونته تعده للظروف القوية

يامل شعرٍ مع نسيم الحياء طار = على شذى ورود الربيع الندية

عزف لي المعنى زماليق واوتار = ببروق غرن من مطرها روية

يتبع سرابٍ في نضيف الفلا حار = يرفع هضابٍ دونها جرهدية

سيري بثر مزنٍ من الوسم مبكار = يلوح باذرها على كل فية

ونومي تحت نجم النعايم اليا دار = في مهمهٍ خضراء المناكب خلية

أخير عندي من رياجيل واديار = وصداقةٍ فيها النوايا ردية

زرعت زرعي في جباجيب واحجار = وجنيت سم الداب من ناب حية

خليتها تعطي خرايم ومعبار = والا لها عندي ثمانين كية





نافع مطر المرواني

ألا ياعاذل القلب المولّع = أطلت العذل مرات ومرارا

كفاية وبتعد مالك ومالي = أنا قررت وصدرت القرارا

داعاني موقعٍ في نجد نأي = قديم العهد مرهوب المزارا

بعيد الدار كن اللال دونه = غديرٍ في قرار الأرض حارا

بيومٍ صايفٍ والهضب كنّه = أنصوب المزن من فوق البحارا

وملمومٍ متونه نايفاتي = عليه بنجد تاريخ و وقارا

يصوّر لي حديث النفس شوفه = على وضح النقاء سر وجهارا

ولولا الوقت والرزق القضيفي = وكدحٍ في عذاب النفس جارا

وقصارٍ أحرب الجوع عنهم = ضعاف الريش جهّالٍ صغارا

تبعت النفس حتى النفس ترضى = أبيت بدار تمهيدً لدارا

على جسرٍ قليل الشكل لونه = كما الياقوت غاشيه احمرارا

يقص الأرض كن الأرض ملكه = يخض الروض عرضٍ بزورارا

أسوقه مع طلوع الصبح حتى = تطيح الشمس ماشبّيت نارا

يروح الوقت كن الوقت عندي = حمامٍ من فروع الدوح طارا

أحقق موقعٍ من بعد موقع = ولا ضيّع دقيقة من نهارا

إلى ليلٍ كما جبال السراتي = لطيف الريح كحليّ الستارا

حبسني وسترحت وشب ضوّي = وطاب الكيف مذعور البهارا

هوا بالي ذعاذيع الصباحي = نسيم الغيث بالنبت القفارا


نافع مطر المرواني

الأم غيثٍ يفرش الأرض بزهار =غرٍاء شعاع البرق يسبق رعدها

عبير وردٍ مع نسيم الهوى سار = أورود قفريٍّ مطرها هجدها

الأم هي شمعة مشاهير الاحرار = تبني لهم صرح المعالي بيدها

كم خفرةٍ تصبر لو إن الدهر جار = من خوف لوعات الزمان لولدها

لو ابنها له مع اهل العرف مقدار = ترعاه لين الدود ياكل جسدها

كنه بيدها عشبة النبع بالغار = في صدر عيطا نايفاتٍ اعردها

ريحانةٍ تزهى عناقيد الاثمار = ما جف من وبل المخايل صردها

الأم قبلي خلدوها بالاشعار = بنوادرٍ يصعب عليّه عددها

أمٍ رقت في مجتمعها للبرار = تلقى جمايل فعلها في لحدها

كم انتجت من عالم العز والكار = وكم صارعت غبر الليالي وحدها

تحية للأم في كل الاقطار = هي الحياة وهي رواسي عمدها


شعر : نافع مطر المرواني

البارحة يوم ادبحن النجومي

البارحة يوم ادبحن النجومي = يوم الثرياء دنقت بالوطى غرب

ركبت من فوق الجديد القحومي = اسرب عليه معذّيات الفلا سرب

لولاي عن بعض الهواجيس اشومي = دخلت حلقة مغلقة مالها درب

قبل تبين الشمس فوق الحزومي = مريت شوية ديرة سبيع من. قرب

نبي فياضٍ مرويتها. الغيومي = ترعابها الاآرام سربٍ ورى سرب

انا وربعٍ باللوازم قرومي = نطاّحت القالات من لابتي حرب

ياطير ياللي بالفيافي تحومي = هي مطربتك الارض والا من الكرب

مرباك بالنايف طويل الرجومي = تتبع نسانيس الهوى بالفضى الرحب

لا وهنيك بالجناحين تومي = وتزور دارٍ ماوطوا. فوقها العرب

بفروعها عيال الجوازي جثومي = ترعى نبات. الظل. بالعالي الطرب

نافع مطر المرواني

البارحة والنجم في غيهب الجــــــو = يتبع مداره في غياهيــــــــــــب جواّ

بدعت لي قافٍ على جذوة الضــــّو = كنه يفصّل من لواهيب ضـــــــــــواّ

دق الضمير وقال لي للزمن ســــــو = شعرٍ على حروف الفواصل ايســواّ

وزهمت مطـــــــروقٍ مثل ديمة النو = نوٍّ على نوٍّ تقفـــــــــــــــــــــاه نواّ

الله على اللي من حفـــــــــيزه لفا تو = توه وصل من يمت الشــــرق تواّ

ربان غراء سيلها يرهـــــــــــج الدو = سهاب نهـــــــــــــــابٍ على كل دواّ

ياهيه ياللي فوق كشـــــــــنه تساوو = الله يجنّب دربكم كل ســـــــــــــــواّ

سوقوه لين الليل يبرد ويحلــــــــــــو = في روضةٍ من زاهي النبت حــــواّ

مرّوا على وقع السحـــاب وتروّوا = من مر في وقع السحاب ايترواّ

كم قبلكم في قمّــــة المجـــــــــد حلّوا = قومٍ بهم لو يقسي الوقت قـــــــواّ

حليب وضحٍ ضــــــيّـــــروهن على بو = ثلاث درّتهن على جلد بــــــــــواّ

ماكنهم في صفحـــة الأرض مـــــرّوا = على طريقٍ للوفاء والمـــــــرواّ

يما على عسر الليــــــالي تخــــــاووا = وحلّوا عقودٍ كالحديد المطــواّ

طابوا وحجّة طيبهـــــــــــــــم ماتورّوا = علم على وضح النقاء مايلــــواّ

بحضورهم تقرءا الصراحة الياجوا = وبغيابهم شيمة وقدر وسمــــواّ


نافع مطر المرواني

البارحة يوم دنّـق النجـم شبّيـت = نـارٍ لعشـاق المعاني تنـيـري

وصحّيت قلـبٍ لاسليـمٍ ولا ميـت = ماله عن اللي بالضمايـر مجيـري

قلت السموحة كاني بحقك اخطيت = عرّضتك الـدرب الطويـل العسيـري

قال التكـل ونـا معـك ماتخليـت = مـدام يحـرم لبسنـا الحـريـري

كنك على ركنٍ من اركـون حلّيـت = ملموم جيـلان المهيـف الوعيـري

قلت الوداعة كان للشعـر مريـت = اقـرءا عليـه رسالتـي وتعبيـري

قلـه ترانـي بالعهـد ماتـرديـت = اقطف زهور ملاعبات العبيري

ماجت لي الدنيـا علـى ماتمنيـت = صار الهوا يمشي على عكس سيري

وسكت عن مابخاطري واستكنّيـت = وسجنت غيضي في مساجن ضميـري

يمـا وردت وبالمواريـد ماشفيـت = صدرت من مارد ضميـري فقيـري

تدفعنـي الهقـوة علـى ماتورّيـت = ويثنيني الصبح الوضوح المنيـري

يما على فـرز الجواهـر تهقويـت = اعسف عاصيها علـى ذوق غيـري

قلبي غلب عقلي على المرتع الهيت = ركب جواده وصـار هـو الأميـري

يما علـى درب الأمانـي تحريـت = ألقى على جـرد الفيافـي غديـري

يامن على عرش البطولة تساويت = ترى الزمن لو زان شره كثيري

ماطوّع الدنيا صمود الزناتيت = ولا قدّرت حق الشجاع الأسيري


نافع مطر المرواني

المراجل صعيبة ما تروم الزهيد


المراجل صعيبة ما تروم الزهيد = ما يشيل الحمول إلا رياجيلها

المراجل تبي عزم يفر الحديد = لين تركب على السنة صواميلها

المراجل تبي مال وعقل رشيد = وسيف حق نذر بالعدل تكميلها

كان مالك وجود بالمصيب الأكيد = لا ترجى ضياها من قناديلها

وكان منته عزيز النفس خلقك حميد = كيف تامن زعلها قبل تدليلها

دوك مني وصايا يقبلنّ المزيد = واقع الوقت ما يسمح بتأجيلها

وقفة بالنهار القمطرير الشديد = بالمهمّات مثمرةٍ محاصيلها

وفزعةٍ للفقير المستعف الوحيد = عند رب الملا ترجح مكاييلها

ولا تفرّط بقرمٍ صافيٍ لك عضيد = لين تقرءا الأدلة وش مداليلها

وطاعة الله هي الحبل المتين الجويد = محكماتٍ حلقها في مقافيلها

وان نصاك ابن عمك من مكانٍ بعيد = فوق من تطوي البيداء محاحيلها

لاتهاون ترى الدرب الصعيب المكيد = يشفي النفس من علّة بهاذيلها

دمعةٍ من ظروف الوقت فوق الجليد = ماتت الكيمياء في سر تحليلها

ونقطتين من دم الوجه عند البليد = تجرح الكبد وتجدد غرابيلها

كان جاهك ومالك مايفك الضهيد = لا تلوم الرجال اللي طفح كيلها

لعنبو الواسطة كم علّقت من هريد = ما يشيل الخشاش إلا زنابيلها

من تجرّع تجاريب الزمن يستفيد = من دروس الحياة وعدلها وميلها

كان مانته برايك صيرميٍّ أمجيد = ونظرتك للأمور يجوز تبديلها

شاور اللي برايه عبقريٍّ سديد = لرسم خطّته قفّل مداخيلها

والسبب لا بذلته قاصدٍ ما تريد = الصعيبات عند الله تساهيلها

والتمني وليت ولو ماهي تفيد = ما تسر الزنود اللي فتر حيلها

وان جفاك الزمان وقام هجره يزيد = غير رب الملا بلواك ما يزيلها

مجلسٍ فيه قدرك ما يغيض الضديد = مسرحٍ للظنون اليا سرجت خيلها

موتت الحر في برج المعزة شهيد = خير له من حياةٍ طال تذليلها

جازلي بيت شعرٍ من بيوت القصيد = حكمةٍ من خلف مشعان ترتيلها

كان مانته وفير المال عندك رصيد = صورتك مايحب الناس تجميلها

ياوجوداه ياجيبٍ يعسف العنيد = ما يهاب الفلاة اللي درج سيلها

لرهجنّ الضلوع وحال وقتك سعيد = عزبتك لربعة في موخره شيلها

ثم سوقه ثمان أيام بالوجه سيد = لين نفسك تطيب وينجلي ليلها

دام بالجسم عزمٍ يحتمل للمديد = الهواية تغنّي لي وغنّي لها

نافع مطر المرواني

لقيت لي بالأرض غراّء جميلة


يسامعين القول صلوا على النبي = عداد مسرب بالفيافي سرابها

مثايلٍ يوم ادبح الليل قلتها = دشّنت من شرد الفرايد كتابها

لقيت لي بالأرض غراّء جميلة = عذرى كرم ريحان الأنوى خضابها

تويق بالطرف الكحيل وتنثني = يضحك لتِباّع الشهاوات نابها

لبست من اللبس المزخرف جديدها = وتخفي شباري غدرها في ثيابها

قلت السلام وطالعت بي بعينها = قلت السلامة منك هي وين بابها

شبنابها وشابوا بها ناس قبلنا = وهي طفلةٍ بزعيتماني شبابها

نزلنا منازل من نزلها وودّعوا = ونرحل وينزل بعدنا من شقابها

عشنابها حلو الليالي ومرها = تجاربٍ شيّب إلحانا اقتلابها

يما عطتنا من عطاها وناسة = في رحلةٍ طيب الوفاء من زهابها

من وادي الشوكي اليا وادي العصل = خضرٍ روابيها عذيٍّ شرابها

سقاها مزن الوسم خمسين ليلة = وثنالها النوّ السماكي سحابها

ثلثين نسناس الهوى من ورودها = غدفٍ نوازيها نضيفٍ اترابها

يموج رياّن الورق في زهورها = غلبا من الأوناس خالي جنابها

صبّحتها والشمس تبدي من الوطى = وطيتها ماقبلي اللي وطابها

راحت مراح اللي اليا راح مارجع = روحٍ قبضها الموت طوّل غيابها

وهاذي هي الدنيا كفاالله شرها = صافي عسلها بين نيبان دابها

ماوفّرت خير البرايا محمد = خير البريّة شيبها مع شبابها

ويماخذت من خيرت القوم فارس = حرٍ الياهز الشطيرة سطابها

مثل شبيب ابن نحيت المسمى = كم مهرةٍ من شوبة الحرب جابها

ويما رمت في طيّب الأصل والحجا = بنحور قومٍ شرها في حرابها

ويما طوت غيدا حنونٍ عفيفة = تنوض من عود الأراكة اعذابها

دنياً نكاضمها على الغيض والرضا = نرجي حلاوتها ونخشى عذابها

وصفها رسول الله في ضل دوحة = قيّل بفيّتها المسافر وسابها

جرّبتها والتجربة تغلب الدوى = تجريب حيٍّ باع فيها وشرابها

اكثر أهلها بين حاسد وشامت = وهراّج غيبة لو كذب مايهابها

أخذنابها ما الله عطانا وقسم لنا = والنفس عند اللي خلقها حسابها

يما بروابيها توشّحت بندقي = صليب عود الخيزرانة اخشابها

مفتولت العبرود مطويّت الحشاء = عديم من صنع الفرنجاء زهابها

نقلتها مع سربةٍ تاصل الحياء = اليامن مبروم الزوايا سرابها

والصبح في خضراء المناكب خليّة = فيها من اجوال ألقطاء ما رعابها

نزلنابها والشمس تفصخ احجابها = حتى سترها عن نظرنا حجابها

اخترت لي من شرّد الصيد رقطاء = جوّدت من راس الشعيرة صوابها

طقيتها بين الجناحين واقرشت = رميتها يوم ان ربي رمابها

ومن جرّب الايام والناس والزمن = يصبر لو ان الهم حاله سطابها

نفسي تروم الطيب واتحارب الردى = وراع الردية مطمعه في عيابها

كم كلمةٍ يفرح بها النذل والعداء = طنّشتها لو كان عندي جوابها

كلمت سفيهٍ مالقت من يجيبها = ناره توقّد في حشاه التهابها

الحر يشهر كل ماضاق به الفضاء = والتبع يخاشر بالوليشة غرابها

اليا ضاق بالي رحت في راس عيطاء = يموج عن روس الفوارع ضبابها

عالي قراها دونها الطرف ينثني = يحوم من فوق الحوايم اعقابها

وقول ماقال المطيري عن الملا = بمثايلٍ يطرب لها من قرابها

اليا صار ما للرجل شاهد من العداء = تراه خوصة حدها من انصابها

تمّت بمطروقٍ مثل صافي العسل = يغوص باعماق المعاني اعرابها

نافع مطر المرواني

-------------



وادي العصل من اودية العرمة ينتهي سيلة في روضة الحيرى غرب نفود الدهناء :
وادي الشوكي من أودية العرمة يسيل شرق وينتهي سيله في روضة التنهات :

عديت راس مشمرخٍ نايف الحجا


عديت راس مشمرخٍ نايف الحجا = للريح بفواه الكهوف زليل

عليه من غر السحايب اليا أمطرت = نوٍّ على غض الورود يسيل

في رأس عيطا حيزم الغيم راسها = في رأسها للضاريات مقيل

خضراء يسر العين زاهي ورودها = والجو مردوم الخيال ضليل

أخيل دارٍ يقصر الشوف دونها = عليها شماليّ النجوم دليل

دارٍ لنا يوم ألهنا يتبع ألهنا = نسيمها عقب السحاب عليل

عشنابها يوم الكرم يعطي الكرم = والجيل يدحم عن طريقه جيل

قومٍ على حلو الليالي ومرها = ما اتميل لو ان الزمان يميل

ياهيه ياللي من اليمامة تروّحوا = على ابيضٍ صاف الحديد جميل

اليا وصلتوا وادي الدوح قيلوا = في ضل طلحة والفراش مسيل

ارموا بنارٍ ينجض الصيد ضوها = صيدٍ من وحوش الفلاة جفيل

وعلى الحمام الورق مرّوا وسلموا = ان كان سمعتم للحمام هديل

ودي بخوّتكم ووقتي يردّني = يما بقلبي والفؤاد غليل

على مراتع مهملٍ عله الحياء = جديد نبته للهموم ايزيل

زوّد هواجيسي وحرّك مشاعري = رفيف برقٍ في انصوب مخيل

اسوق الروابع والروابع تسوقني = على اطلال رسمٍ بالزمان امحيل

النفس عن هراجت الزور شامت = عن كل مسموم اللسان رزيل

خبلٍ لاشاف الخيل عجلٍ جفيلها = مع الخيل ياشقراء بي دون حصيل

ياالله لاتجعل للأنذال وارث = كبار السوالف والحصيل قليل

دفّانت الشيمات طعّانت الظهر = كم لبّسوا ثوب الكريم بخيل

المرجلة كلٍ يبيها ويرومها = لاشك مجهود الهزيل هزيل

ماضن طلاب المدايح يشيلها = حملٍ على غير الكرام ثقيل

المدح مايركب على غير صاحبه = اللي لحمول الواجبات يشيل

درعٍ لربعه كنه الموج دونهم = لابار في حق العميل عميل

والعافية تاجٍ على راس قمة = بوجودها عمر الحياة طويل

كم واحدٍ طيب و وده ولكن = جسمه من اوجاع الزمان عليل

والفقر ذيبٍ للنشامى اليا عوى = يصير به حتى الكريم بخيل

ورجلٍ بلا ربعٍ ردية عزايمة = لو يدّعي بالعز تراه ذليل

ولا دامت الدنيا لقراّعت القنا = نجوم المعارك فوق كل أصيل

يما طوت بايامها شيخ لابة = قدره على قدر الرجال جليل

نافع مطر المرواني

افراد الرحلة


هذه القصيدة بمناسبة طلعتي انا وخوياي في ديوانية العرب حيث طلعنا يوم الجمعة الموافق ١٤/ ٢/ ١٤٣٧ هـ في رحلة برية لجبل قطن واستانسنا في هذه الرحلة مع خويانا بيض الله وجيههم كلهم نشامى ، فاهاضت المشاعر في هذه القصيدة :


سرّيت من دار اليمامة مطيتي = ايسر من نجم الفرقدين عدال

يسوقني هاجوس قلبي وسوقها = على طريق بالدليل شمال

ولولى المعزة والمواجيب والوفى = وحق علينا لخويانا يشال

مادار فوق القار للبعد ويلها = علم ليا صح الصحيح يقال

تشهد لهم بالطيب ديوانية العرب = وشعر بميزان المعاني مال

اختارهم رمز الوفى ابو مشاري = حر على كل المراجل طال

سعد ابن رجاء على الطيب والنقى = الحصني اللي للمكارم نال

رجال جمعهم من شبابة وخنذف = اخوان لا عد الرجال رجال

الكل منهم يكحل الطيب بالوفى = معرب الفرعين عم وخال

كواكب بالطيب ياحي حيهم = مثل الحرار بعاليات اجبال

نقسم بهم جمع الهموم وينجلي = ليل بمكنون الضماير جال

يما بخوتهم قضينا وناسة = بطراف قفر من سحابه سال

بدار يسر العين منظر هضابها = لزهورها فوق النبات اقذال

دار الكرم والعز ملس اجبالها = شوامخ عن الهجير ضلال

قطن مع التاريخ للمجد باقي = يشرح لجيل الحاضرين اجيال

يما ثنوا دونه مشاهير لابة = بشلف يفجن الصدور اطوال

على بنات الريح في حومة الوغى = ياطن على صم العظام اجلال

هذا وموضوعي وماهاض خاطري = واناسة ماتنشرى بالمال

خوة رجال بالمكارم نعدهم = فيهم تطيب من الهموم الحال


نافع مطر المرواني