ديوان الشاعر عجاب صالح الحنتمي المزيني

الله من عينن تزايد صلفها
لاقلت هيدي دمعها كبته كب

بصبيها شوك الهراس وطرفها
من الهموم اللي عليه تعاقب

فكرت في دنيا الفنى مع ترفها
وفكرت في يوم التلاقي مع الرب

وحددت لنفس العفيفه هدفها
وحطيت ماعند الولي لي مطلب

ربي يعوضني بها ويخلفها
بعطفك وعفوك والتجاوز عن الذنب

بعض الاوادم زاد فيها هرفها
قامت على خمسين لونن تقلب

والبعض لاسمع السوالف خطفها
زود عليها كثرها كذب في كذب

وكم واحدن محتاج يطلب سلفها
واليا قضي له نوب قام يتهرب

وكم حاسدن كبده سبايب تلفها
الحسد والغيره وخض المشارب

لاشاف مقفين الخلايق حذفها
عقرب ثرا ومراوغي تقل ثعلب

عجاب صالح الحنتمي

يامل قلبن بين الاضلاع وجعان
تقبل وتقفي فيه عوب الهواجيس

اليا عذلته زادني هم وحزان
وركا عليه حاميات المحاميس

ساعه يذكرني مقاطين بدوان
وعلوم ماتطري عليه مراميس

يوم البيوت السود والنوق والضان
ودارن نعرف ذيابها والتضاريس

وساعه يذكرني مشاريه خلان
ويحطني بين الهدف والنواديس

عفت الونس كني على الناس زعلان
مدري بلاي الوقت والا وساويس

لابد ماياتي للنسان ديان
ماينفع الصاحب وماينفع الكيس

من لازرع للاخره ياهل الشان
تاه الطريق وصار ضمن المفاليس

عجاب صالح الحنتمي

كد قيل من صاد الجراده شواها
والمال ماعز البخيل بحياته

عمره يروح وحاجته ماقضاها
والضيف مايشره على كبش شاته

يطرد ورى دنيا طويلن مداها
ازرا يحقق رغبته وامنياته

بالمال فيها من جهل لو تباها
لامات تبقى سيه وحسناته

كل السنين الي بعمره قضاها
ماتنفعه لعلن وليه مماته

يالعبد وثق مع وليك عراها
زمنك مايعلمك في خافياته

ابيات للارشاد للي قراها
يفطن لها رجال عينه مراته

عجاب صالح الحنتمي

يارب عبدك عيد واجه مصيره
ياحي ياقيوم تغفر ذنوبه

وتجبر مصاب اقاربك بالعشيره
بعده بدنيا فانيه ومحبوبه

ندري بها الاعمار جدن قصيره
بثانيه عند الرحيم امحسوبه

الموت شيب الراس قالو نذيره
وحنا لحانا بالخضاب امخضوبه

حبي لكم ياطيبين السريره
بالقلب باني طوبتن فوق طوبه

وهوب كان الحرب دقو لزيره
عدوهم ماتهب معهم هبوبه

اهل الجوار الزين ستر القصيره
وخويهم لو عاب تدفن عيوبه

اهل كرم واهل مزايا كثيره
في وقت فيه الطيب عسره دروبه

عجاب صالح الحنتمي

مدام باقي بالجسد روح عجاب
ماانسى جميل اللي عليه جميله

يارب قبل الموت قصاف الارقاب
ارد منها شي بيا وسيله

لو ان راع الاوله قفل الباب
وتصدر الموضوع راع الجزيله

مايلحق مهما بذلنا من اسباب
قالوه قبلي طيبين الفصيله

الله يفكه من صواديف ونشاب
طلال عبدالله مزبن دخيله

انشهد انه من عريبين الانساب
بني وهب ياحيها من قبيله

اخوان وصحاب وبني عم واقراب
كلام يكفي عن كثيره قليله
عجاب صالح الحنتمي

الرزق عند اللي بنا السبع الاطباق
والارض بامره جل شانه مهدها

علام مايخفى وماعنه مدراق
فاضايله مافيه مسلم جحدها

ياعاشق الدنيا مقاسيم ورزاق
ماكل من يبغى السعاده وجدها

الا بتقوى عالمن ماب الاعماق
باعث عظامن باليه في لحدها

يالعبد لو ترقب لها كل شوهاق
دون الولي ماينبني لك عمدها

ادري لها جندن من الناس عشاق
تكفر بنعمة ربنا ماتحمدها

يارب عفوك يوم نحشر وننساق
في يوم تترك كل مرضع ولدها

عجاب صالح الحنتمي

مريت وضح لعيد تالي نهارا
ياليت مامريت من بعد موته

دموع عيني فوق خدي تبارا
يوم اتذكر ريف الاجواد صوته

راعي هلا ودلال ملي تبارا
لو كان مايلقى شرابه وقوته

مرحوم يامعطي ضعيف وفقارا
دايم هتاتيش الخلا ماتفوته

رجال له بين النشاما وقارا
ياطيب منطوقه ومطيب سكوته

ابوه قبل حر ماهو ثبارا
لبس المراجل لبس ثوبه وكوته

مافات مايرجع ومصار صارا
سبحان من يرزق بالابحار حوته

عجاب صالح الحنتمي

يالله يامعبود تلطف بحالي
وحيد مالي غير عونك معينين

كبير سن وكل طاري طرالي
وسود الليالي ماعليها مظامين

من بعد مرقب في طويل الجبالي
اليوم دوب ادرج الرجل بهوين

ياحي ياوالي على كل والي
يهازم الكفار في بدر وحنين

انك تثبتني نهار السوالي
اليا دفنوني ثم راحو مقفين

وان عشت في دنيا العنا والزوالي
مااحتاج قاصين العرب والموالين

عزيز نفس وعزتي راس مالي
وياحبتي لطيبين الميامين

زمل الحمول وطيبين القبالي
جيره ودنيا ماتعارض مع الدين

دايم مجالسهم كمال وجمالي
مايمل جانبهم قريب وبعيدين

عجاب صالح الحنتمي

يالعين لو دمعك على وجنتي سال
في حل من عجاب يادمعة العين

عسى يخفف باي حال من الاحوال
همن جرا بالدم عبر الشرايين

بالقلب حط وشال يساتر الحال
اليا ذكرت مرجحين الموازين

اقفت بهم دنيا المتاعب والاهوال
ماتقول سارو فوقها يوم حيين

غير النصايب فوقهم تقل تمثال
عسى جنان الخلد مثوا العزيزين

من بعدهم جسمي تقل فيه سلال
نحيل حال وحالتي بين قوسين

من بعد ماني لثقيلات شيال
ورقب على روس الجبال المعايين

اليوم يالنشاد ماتسرك الحال
ماقول غير الله على وقتي ايعين

اوجزت بعض اللي طرالي على البال
ببيات شاعر جرب العسر والين

عجاب صالح الحنتمي

سجت خلا ياعاذلي بالمداهيل
ارتاح فيها ساعتن في زماني

ياعل يسقيها صدوق الهماليل
من مدلهمن بارقه عقرباني

اخير من فله على شاطي النيل
احدث طراز لفاخرات المباني

مالي هوا ياشاربين الفناجيل
بدنيا دنيه تاليتها هواني

هواي يالنشاد صعب المناويل
عيا ايتحقق يالله المستعاني

وين العدود وين هاك المظاليل
ونجرن ليا دنوه صوته شعاني

وصوت الورود وصوت ذيك المحاحيل
من فوق عدن نارده ريهجاني

عشت البداوه كلها بالتفاصيل
ماتقول عنها غبت عدة ثواني

في نجد جعله للحيا يالمشاكيل
من لامني لاشم ريح الجناني

عجاب صالح الحنتمي