ديوان الشاعر \ نافع الحربي

الله من قلبٍ على هاجــــــــسه سج = على طريق أهل المواجيب ســـــجاّ

بقصى غضاريف الضلوع ايتوهّج = يخج غضات المعاليق خــــــــــــجاّ

رسم لي الرحلة على النور الابلــج = صبحٍ بدا من مطلع الشمـــس فجاّ

حتى وصل بي ديرةٍ كلـــــها عـــج = غيّر معالمها معاصـــــــــــــير عجاّ

عهدي بها من رايح المـــزن ترتج = يرجها وبل المــــــــــــــزابير رجاّ

دوالحٍ فيـــــــها رزيز الرعد لــــج = يلج صوته مع صدى الارض لجاّ

اليوم زايرها اليا شـــــــافها هــــج = عن ما يغيض العين غمّــض وهجاّ

يلوف ذاريها مع الجــــو الاهـــوج = غصنٍ منوّل بوّل الوســــــــــم نجاّ

دارٍ شــــواها الوقـــت زواّرها دج = يتبع سرابٍ مع هوى الريـح دجاّ

ياسج حالــــي بعد ماشفتها ســــج = سج الخريش بدار الاجــــناب سجاّ

من حر لسب الخيزرانة تعــــــرّج = تطوي ضلام الليل فيــــــــها عرجاّ

عشنابها يوم الحياء برضها مـــج = عذبٍ على خضر الروابي ايمــــجاّ

زاهي ورقها بالفروع ايتغنــــــــّج = عليه ثجـــــــــــــــــاج الرويات ثجاّ

قلبي على نبت القفاري امبـــرمج = ولا لوم قلبٍ شجّه الود شـــــــــــجاّ

ازورها من فوق ملجم ومســـرج = اليامن واديها من السيل كـــــــــــجاّ

خالي وطنها مابها صــوت مزعج = إلا طيور الصبح من غير صــــجاّ

اضن جروحي من هواها تعــــالج = واكتب على صفحة وطنها مســجاّ

امشي ودرّج خطـــــــوتي وتدرّج = ولغير رحمة خالقي ماتـــــــــــرجاّ


نافع مطر المرواني

طوَّل غيابك يا هوا البال لا تغيــب = لولا غيابك ماجرم الشـــــعر فـــــيّا

لي وعليّه في حضـــورك مواجيــب = باللوح كتــــبن في حياتي علـــــيّا

ماتشوفني عن نفسي اسج وغيـــب = مع الخــــــيال أغيب ماني هنــــيّا

اركب على متون الرياح اللواهيـــب = اطوي تضاريس المسافات طــــيّا

يسوقني وقتــــي على غيـــر ترتيب = بليلٍ شحيح النور مافـــيه ضـــيّا

طرقت بابٍ يسمع الصوت مايجــــيب = اسمعت لو ناديت ياصـــــوت حيّا

من دون حلمي جاثم النمر والذيـــب = عياّ على طول الزمان ايتـــهــــياّ

دربي طـــويل وحال دونه غياهيـــــب = وزادي قلــــيل ولا معــي لتر ميّا

هواي روس النايفـــات المراقيــــــب = قبّة شــــــريفٍ في ذعاذيــع فيّا

مجدٍ يصادم مبـــرمات اللواليــــــــــب = له شاهدٍ بين القــــــــمر والثرياء

ان ماجزينا راعي الطـــيب بالطـــــيب = يحرم علينا لبســــــــــــنا كل زيّا

أنا من حرب معرّبين المــــناسيـــــــب = قبيلةٍ ينطـــــــــــــــح بها كل هيّا

مثل السحاب اللي انصوبه محــــاديب = يروي غشـينه يابس الارض ريّا

ون جت على روس النوازي جناديب = وعقيدها عن واجب الصلح عيّا

ركبوا عشاشيق البنات الرعابيــــــــب = من فوق حــــــجلٍ زادن الني نيّا

نقسم بهم ترسانة الحرب لاهيــــــــــب = لاصاح صياح الغضـــــب للحميّا

كم نافلة وضحٍ عليها الدباديـــــــــــــب = نكويبها وجيه البغيـــــــضين كيّا


نافع مطر المرواني

كلن تخيرله من الشعر مرماع


كلن تخيرله من الشعــــــر مرماع = يرسم عليه اللي يكنّه ضمـــــــــــيره

من مستكنن في دهاليز الاضــــلاع = له في ضلام الجوف عزفٍ ونيــــره

اقيس هاجوس الروابع بلاوجــــاع = وتبع سراب اللال وشـــــرب غديره

يسوقني وقتي على روس الاكواع = عسى طريق أهل الوفى فيه خــــيرة

كتبت بطراف الانامل ولا اصــباع = حرفٍ يذعذع بالنسايم عبيـــــــره

واقلبي اللي من حجا مركزه زاع = زوع الحمام الورق من ضل شيـــرة

صفقهن العبرود من كف طمــــــاع = وطارن ماغير أم الجناح الكســـــيرة

تمزّعن من ما ذعرهن تمـــــــــزاّع = كلن لها مع روجة الحوم سيـــــــرة

الناس تحكمها المبادي ولاوضـــاع = ومن لا حكم بالعدل ضيّع مسيـــــره

اسرجت من خيل الحشى كل مطواع = حجل اليدين مصادمات المغــــيرة

ورّدتهن مي السماء عقـــب مرباع = واسقيتهن من نبع عيطاء وعيــرة

جلد الحوافر يوم يمشـن على القاع = جلد السحاب اللي تحـــــدّر غزيره

مزنٍ سناء برقه بلا ابصــــار لماّع = كن المحيط الاطلسي في محـــــــيره

هذا وسلم لي على زين الاطــــــباع = اللي نوادر لابته تستشــــــــــــــيره

اليا هرج له بالمواجيب ســــــــماّع = واليا سكت له في سكوته بصيـــرة

الذيب يدمي راس نابه اليا جــــــاع = والحر ماياقع على غير طيـــــــــره

تمت بمقفيٍّ من الشعر مايبـــــــــاع = سجلت في بيض الصحايف مصيره

وصلاة ربي كل ماهب ذعــــــــذاع = على رسول الله في كل ديـــــــــــــرة


نافع مطر المرواني

ياهضبة محيّوة بالموقع السهـــــــلِ = شمال واد الرمة أطلـــــــــــــــــتي السكنِ

استوطنت شرق أبان وطاب مـنزِلُها = جنوب غنيجان حلّت ماعــــــــــــنه طمنِ

هل أنتي اللي ذكرها الشعر من زمنٍ = في سالف العصـــــــــــر ولأوان والزمنِ

شعرٍ كما صافي الياقوت حاصلــــــهُ = مفتول جزل المعـــــــــــــاني غالي الثمنِ

كنزٍ آلاف الليالي ماتبيــــــــــــــــّدُه = كأنه النايفات العيـــــــــــــــــــط من قطنِ

أسألك يامحيوة باللي بسط ســــــــبعٍ = وسبعٍ رفعهــــــــــــن عن الأنام والوطنِ

وين البراعيم والشيّط وعيهـــــــــمهُ = وصفر وفرشٍ ويمئودٍ وذالــــــــــــرعنِ

قد اختفن واختفى بالأرض شاهدهن = كما اختفى ماتقــــــــــــول النفس بالبدنِ

ضاعن بحومانةٍ صعبٍ معالمــــــــها = يضيع فيها الدليل الحــــــــــــاذق الفطنِ

دارٍ لقومٍ ثنوا من دونهـــــــــــــا زمنٍ = قاموا على حفضـــــــها ردحٍ من الزمنِ

حامينها في سِلالاتٍ معــــــــــــــرّبةً = أصائل من كرام الشــــــــــــــام واليمنِ

شبّوا وشابوا على الطولات وارتحلوا = منها إليها ضيوف اللحــــــــــــد والكفنِ

سألتها عن جواب اللغز مانطقــــــــت = إلا بي معلم وحل اللغز مؤتمــــــــــــــنِ

ياحسرتي كيف مجهودي يبلّغــــــــني = من دارسٍ غامض الآيات والســـــــــننِ

ماغير طخفة تباريني شوامخـــــــــها = كن المراقيب منها ناشــــــــــــــي المُزُنِ

الإنس والجن والأنعام تعرِفُـــــــــــها = عرف المحازة شمال الشرق من حضنِ

نافع مطر المرواني

يامــل شعرٍ رفــع بالقــــلب رايتــــــهُ = شــربت حبـــه شراب الأرض للعــــرِمِِ

مهندساتٍ سياج القــــلب حارُسهـــــا = مارخص ثمنها لغير البــوك والقـــلــمِ

ماقولها في فتاة الحــــي أغازلُهـــــا = لـو البرد فــي رحيــق الـورد منتضـــمِ

ولايشكي العم وابن العــــم جائرُهــــا = لو زعلـــوني بــهــرجٍ غيــر محــــترمِ

إن كان يابن الحلال الحــــق تعلــمـــهُ = لاتظلم الــناس وانت اعلم بمن ظلـــــمِ

الظلم ذنبٍ على من حل ســــــاحــــته =كم اُهلــكوا با لمظالــم سالــف الأمــــــمِ

منت الوحيد الذي حقـق بـــــطولتــــه = ولانت المبرّاء من ألآفـــات والتهــــــمِ

لاترفع الراس فوق الناس مفتخـــــــرٍ = في مـــاعــطـاك الذي صخــرلك النعــمِ

مـن غير حـولٍ ولاقــــــوة ولاجــهـــدٍ = تنـــعم بحكــم الولـي بالــعــز والكــــرمِ

مذللاتٍ عـلى الـــــوجهين تقطُفُـــهـــا = وانت الضعيف المريض الخامل الهـرمِ

كم خيّرٍ حاربت عينه مضاجِعُـــهـــــا = امــا ســرا الــليل ولا باخــره جــهــــمِ

إذا غفى قام ستر الوجه وايقضـــــــهُ = كنــه علــى جــمر وقـــادٍ من الســلــمِ

قضّى حياته وضيق العيش طـــــابِعُها = عـوجــا تعض الأنامل دونـــها الهمــمِ

ماكل من يتعــب الأقدام تـــــــوصُلـــهُ = دارٍ يـــــرفرف عــلى جناتهـــا العــــلمِ

الله خـلق عالــمِ بالكـــــــون كافِلُهــــا = أضل واهدى وعافى وامرض وقســــمِ

قسّم اشهورالسنة واجزل فضائلهــــا = اثنى عشر واربعة من بينهن حــــــُرُمِ

يامــعذب النفــس مهـــلاًً لاتعذبُهـــا = قسمك بدنيــاك مالـــــه عنك مغتنـــــمِ

لاترجي النـــاس حــــاجاتٍ تؤملــــها = رجواك للـناس ذلٍ يكــسر العضــــــمِ

رزقك على اللي جميع الخلق يرزقهم = ليسى علــــى حاسدٍ با لــــسر ينتقـــمِ

شان الزمان وكشر وابدى نواجـــــذُه = وزورّ واسكت اهل المعروف والشيمِ

النــــاس مــابين مأكــولٍ وآكلــــــــه = ومعذّبٍ في عروض الـــناس يظــطرمِ


شعـر\ نـافـع مـطـر المرواني

من قاعدة نجد حن القلب والزمنــي


هذه ألقصيده رثاء في خواني صالح وصويلح الله يغفر لهم ويرحمهم
وهي على بحور الشعـــــر القديم الفصيح
هذا الشعر يعتمد على الحركات وليس على الحروف فقط فأرجو الإنتباه لذالك


من قاعدة نجد حن القلب والزمنـــــي = بمعرّبات سليمات من الخــــــــلـــــــلِِ

يطويني الحزن طي امئبـــد عـــــــدل = يطويه بنزٍ جديد الصُنع مكتمـــــــــلِ

اتيتكم من مدار سهيل متجــهـــــــــا = بين الحجاجين نجم الجدي يشتعــــلِ

كني على مثل جـــمر الرا ك ملتــهبا = يرسم لي الدرب ضل الهائم الوجـــــلِ

سمعت صوت خيوط الحزن تخنـــقه = صوت يقول ان صالح حاشه الااجلِ

يارب ترحم دخيل جاك مرتجـــــفـــــا = في قعر صدع جديد اللبن والرمــــــلِ

امسا حليف الكفن والقبر موطنـــــــه = وحــــــــيد لا زائرٍ زا ئر ولا أهل

ابكيه ما غنّت الو رقا على غصـــــــن = في رقرق من نبات الوسم مشتمـــــلِ

وابكيه ما تبكي الخنساء على صخـــرٍ = ولا لي بحكم القضا ذمٍ ولا زعــــــلِ

كما بكينا صويلح قبله بسنـــــــــــــــةٍ = أبو مطر طيب الأفعـــال والخصــــــلِ

يا ما ذرفنا غزير الدمع منـــــسكــــبٍ = دمعٍ بدم المحاجـر فائرٍ هطــــــــــــــلِ

لا وخواني طويل الهجر غيــــبهـــــــم = ما تقل ردّوا قريض المبرد الفصــــــلِ

ولا كنهم في مراسيم الفرح حضـــروا = في معشرٍ في صباح العيد محتفــــــــلِ

راحوا كما حلا م ليلٍ مر نائمــــــــــــه = طول النهار بتعيب الكد والكلــــــــــــلِ

يا وي صقرين ما لمثالهم ثمــــــــــــنٍ = الكل منهم على ا لعدوان كالـجـبـــــــلِِ

كواكبٍ شامخٍ بالمجد بيرقهـــــــــــــــم = عسرين مّرين حلوينٍ كما العســــــــلِ

إن ألمنيه إذا سلت مخالبــــهـــــــــــــا = ما تا خذ إلا سراة ألنخبه الجلــــــــــلِ

والحي لابد سيف المــــــوت يدركـــــهُ = لو اعتصم عن محيط الأرض في زُحلِ

وين النبيـيـن وهل العلـــم ما لبـــــــثوا = إلا قليلٍ من الأيــــــــام مُــــر تـحـــلِ

وين الملوك الذي ربدٍ كــتائبــــــهـــــم = ما تقل ركبوا سروج القرّح الحـجـــــلِ

وين الحسان الذي شقرٍ ضفائـرهـــــن = من فوق حورٍ وساعٍ نعّـسٍ نـجــــــلِ

يدفعهم الوقت والآجال تجـــــذ بهـــــم = والموت قــــــــدامهم والقبر والعـــمــلِ

هذا وقد خلق الإنسانُ من عجـــــــــــلٍ = من خلقت آدم وهو من طبعه العجــــــلِ

واستغفر الله عن ما قلــــــتُ من زلـــلٍ = ما ني بريّـــن من النقصـــــان والزلـلِ

الباقي الله رب العرش نحمــــــــــــــد ه = اللي عليمٍ بمن يرحــــــل ومن نــــزلِ

شعر \ نافع مطر المرواني

سلامي كل ماحبر القـلم بـا السـامـــــريـه سـار= يسجل موقف الابطال حاضرها وماضــــيها

تحياتٍ آعطرهـا بعـود اليـاسـميـن اجـهـــــــــار= على يوم الوطن والمملكة بحلا لياليـــــــها

ترى يوم الوطن رمزٍ لفعـل الطيـبـين اشـــــعـار= ملوك المملكة صرح البطولة من هقاويــها

رجال السـيف حكـّام الجزيـره مصـدر القـــــرار= اهل التاريخ والامجاد والديرة وراعيــــــها

عـيال الحاكم الضـرغام مـروي سلّـة الـبتــــــار= حكيم المعرفة صقر الجزيرة عز أهاليـــــها

شجاعٍ قايدٍ حرٍ بمـدحه تصدق الاشعـــــــــــــار= له الفضل القديم بجمع حاضرها وباديهـــا

جمعـها بعـد ما كـانت ضحية بيـن جــوع ونـار= بها السبع القوي المفترس ياكل ضعافيــها

على سير الجهل تمشـي شتات بمسرح الاخطـار= لبسها الجوع وفناها الدمار ولج عاويهــــا

رحـمها ربها ورسلّـها صـنـديـده الـمغــــــــــوار= اخو نورة زعيم المملكة مرسي حواميــــها

تولاّها الايمام بـسيـف عـزمٍ للـدهــــر صــــــبـار= ولاجاته بحب خشوم مير اطفـــــى بلاويها

ثـنى من دونها خمسين عـامٍ ماعـليهـا اغــبــــار= يصارع دونها الابطال ويثبت رواسيـــــــها

أطاعت وستـقـرّت وعـلـنت تاريخهـا المعــطـــار= على حكم الشريعة قام بالتوحيد يبنيــــــــها

عسى عبد العزيز الصيـرميّ في جـنـة الاابـــرار= بجنات الخلود اللي حميداتٍ مساعيــــــــــها

فهاذي مـملكـتـنا من افـعوله مركـز الانـضــــــار= من البحر الحمر إلى الخليج العز كاسيــــها

تـفاخـر باالفهـد وخـوانه الغـيّـاب والحـضــــــّـار= وتنعم بالحضارة والرخا في عهد حاميـــــها

حماها فهـد ابن عـبد العزيـز من العـدوّ الضــــار= وصارت تحفةٍ بين الدول محدٍ يحاليـــــــــها

تـبـسّـم للـشـروق بوجه صبـحٍ كـنـّه النـــــــــواّر= كما زهور الربيع اللي نصوب المزن تسقيها


شعر \ نافع مطر المرواني

ألاياسحاب الوسم فوق الجــــــــــــــزيرة ذوب = على ديرةٍ بالوقت شهبٍ مناكــــــــــبهـا

يسوق الخيال وبارقه كنه الشبـــــــــــــــــــوب = يرفرف بغر ينطح الريح ساكبــــــــــــها

سحاب عـلى خصب المنابت ركبها ركــــــــوب = يرج الفيافي لين تطفح عناكبـــــــــــــها

يساقي قرارة نجد بالبارد المسكــــــــــــــــــوب = ثلا ثين يوم الشمس ماشيف حاجبـــــها

من الغرب الى الشمال الى الشرق الى الجـنوب = يعل الوسيعه لين تبرد لواهبــــــــــــــها

هواالبال وسميٍّّ عليه السحاب انصـــــــوب = نبت في رغاب الارض وسرج غواربهـا

يداعب نسيم الريح بالعشـــــــب والنبنــــــــوب = عليه الخزا مى فايحاتن ذوايبـــــــــــهــا

ربيع كمل نبته على غــــــــاية المطلـــــــــــوب = على ديرةٍ خالي من الناس جانبــــــــها

ما غير أم سالم ترفع الصوت بالمسحــــــــوب = لحن سامريّ باالزغاريد يطـــــــــــربهـا

على فروع سدرماوطى برضها العرقــــــــــوب = كما خيل دهمٍ مسرجات مراكبــــــــــهـا

زها نبتها واستوطنت مهمـــــــــــــل مرهـــوب = عذيّ الهوا ولارض عذبٍ مـــــــشاربها

الاواهني من زارها فوق شيــــــــــــخ اجيــوب = من اطـــــــــــراز فكسار جديد يقرّ بهـا

تحدر وسنّد وصطفق كنه الرعبــــــــــــــــــوب = تصاديد غراء تو زمّت ترا يبــــــــها

ابمشي عليه ليااقبل الليل والغــــــــــــــــــروب = انا وربعة في نجد ماديس واجبـــــــــهـا

ابجلى هموم كنها شعلة اللا هـــــــــــــــــــوب = تجوب الضماير والضماير تجــــاوبهـا

وجودي على قفر بها ضوّنا مشبــــــــــــــــوب = تدارج حباريها مخامير ارانبـــــــــــــهـا

وطاها حقاق الوسم في صيّب مصـــــــــــبـوب = وزل السماك وماطر الصيف يضـــــربها

شعر \ نافع مطر المرواني

غنيٍّ عن وضيع القول قـــــــولي = مادام الصبــــــــــر له عندي مكاني

اعرف اللي له اهــــــــدافٍ ردية = يموت بعظم ماحرّك كـــــــــــــــياني

عرفت بنجد كل اسلاح ناجـــح = شموخ النفس و الهام المعــــــــاني

عزيز النفس مرباه القـــــــفاري = نضيف الأرض مسكن كل هانــــــي

اليا من الحياء باكر وطــــــــــنها = فروع الغري مثل الأرجــــــــواني

عبير الورد لاذعذع هـــــــــواها = و مزنٍ الغيث فوق الأرض داني

يروف الحال ويخفف عــــــناها = وتنعم بالسكيــــــــــــنة والآماني

مضالي في زهور العمر غفـــــلة = يوم ان الوقت وقتـــــــي والزماني

ذرعت الارض حتى الارض كلّت = على متن الجديد البهبـــــــــــهاني

اسوقه مع شروق الشمس حتــى = يشيل الهضب موج الضحضـــحاني

على مد النظر باللال كنـــــــــــــه = اسطولٍ بالمحيط ابلا مـــــــواني

حريٍّ بالوفاء ماشــــــــال خايب = مريض القلب ندّاس العـــــــــواني

لحوم الناس تنقط من شدوقه = يريد العز من درب والهـــــــــــواني

الا يا الله جنبني صفــــــــــــــــاته = وعن ذا الخُلق يا الله اتحمــــــاني

حبست النفس حتى العمر طـــرّف = ولا لي غير ماحصّـــــــــــلت ثاني

عرفت اوجيه بوجــــــــــيهٍ وراها = عليها من مواريها بيــــــــــــــاني

وكيف أسف على وقتٍ ظلمــــني = مدام الظالم والمظـــــــــــلوم فاني


نافع مطر المرواني

ماهمني بالناس ريس ومريوس = ولا نافخٍ نفسه على غير طالة

ان ماحفض لي صاحبي كل ناموس = وحالي تساوي بالوفا مثل حاله

صديت لو ان الضماير بها موس = والصد عن بعض الاوادم جمالة

الله خلق بالارض كثبان وضروس = وقفرٍ بعيدٍ عن جنوبه شماله

ليلة حلل في رقرقٍ غير مانوس = الا ارتكاز البرق يقسم اخياله

أحب عندي من خناثير دنفوس = خبلٍ يلولس بالردية حباله

وراعي لي ببيته تراحيب واجلوس = أعز من شيخٍ حقرني قباله

الطيب مايجيبه مشاعيب وافلوس = يصعب على بعض الشوارب مناله

والروس ماتخضع تحت هيمنت روس = مدام سيف العدل تصقل اسلاله

وانفوس ماتقبل معاذيرها انفوس = وكلن حسب زاده يحمّل رحاله

اقطف زهور الورد من نهر طرطوس = واتصير في ملح الصباخي احثالة

شعرٍ نقيته مادخل حرفه السوس = رفعت حرفه عن علوم السفالة

أخاف من رب الملا يحوسني حوس = من دعوةٍ باليل لجّت جباله

قام ايحدانا الوقت عن مانبي جوس = ومن لاصبر للوقت قل احتماله

الموج يصفق بالدغاليب متروس = والجال لاصك المحيط ارتكاله

هداج يغني عن ضحاضيح وارسوس = عد الروى ما هز جمه محاله

سبعة عشر قامة بها الحبل ممسوس = حيامٍ ضواميها على طي جاله


نافع مطر المرواني