ديوان الشاكر ابو سامي / قسم القصائد

انت شاعر =
يقولون أنت شاعر قلت شاعر ضمن هالشعار = أجيد الشعر بانواعه وأقوله من صغر سني
أجيد النظم والقلطة وأجيد الشقر لاهل الكار = وليه في الفصيح لسان والكسرات والفني
وداري عن بحور الشعر واوزانه وارد الشار = لقوم الشار واجيب القصيد اللي يجملني
في باب النصح والارشاد لاهلا العرف والافكار = وتوجيهات لاهل الشعر واللي يستمع مني
وهالايام كثروا ناظمين النثر والاشعار = حقوق الشعر محفوظة وكم في الشعر متعني
وياكاف البلاء في المنتدايات انظروا وش صار = اشادات ومدح لاشعار تهدر كسر وتحني
تريدون الحقيقة قُدّم الاخفاء على الاظهار= وابو تمام مايدري عن اللي قال ابن جني
بامانه والامانه لانغير تجرة التجار = ولا نبسط بها في سوق كاسد يكسر القني

عودة سيدي سلطان معافى =


مرحبا ياقايد الجيش والقوات سلطان بن عبد العزيز= عدت للمملكة سالم معافى وغانم بالشفاء والسلامه
كل شعب المملكه ينتظر هذا اللقاء حتى الرضيع الركيز = اصدحي ياطيور وغردي عذب اللحون وغرهدي ياحمامه
والملك عبد الله الله يطول عمره أعطاكم العلم الوجيز = اصدر المرسوم عفواعن المحتاج والمسجون واضفى كلامه
انظروا قوة تلاحم حكومتنا بهذا الشعب ياهالعجم والانجليز =والعرب دايم لهم شوكة عظمى وقوة في نظام وشهامه
والله انا شعب واحد وتربطنا علاقه عنها مانحيز = مع حكومتنا وعن ديننا نحمي حمىالاوطان حتى القيامه
الفرح في كل ديره بعودة سيدي سلطان والشرع للفرحة يجيز=والعلم خفاق رفرف وعالي على قصر اليمامه

هذه القصيدة في يوم الخميس الموافق /19 / 12/1428 هـ=
رحنا أنا وخوياني بواجب لاخونا صلاح المطرفي=
بمناسبة شفاء ابنه عادل =
من الكسر والحادث الذي تعرض له=

أول المبدا سلام بردة فواحه = طعمها سكر نبات وريحها ريحاني
من هجوس الشاعر اللي ماتعرف الراحه = قبل ماتوفي حقوق الواحد الدياني
ثم حق الوادين اللي صعيب انجاحه = مايكمل حقهم ريض ولاعجلاني
ثم حق الصاحب اللي نفرح من افراحه = مع حقوق الضيف والصدقان والجيراني
بعدها تلقى هجوسي هاديه مرتاحه = كن وبل الغيث غاشيها من الامزاني
كل باب من الشعر يطرق معي مفتاحه = غير باب يجيك معه الريح والدخاني
والله اني ماطرقه لو قالوا المزاحه = غير أزيده قفل ثاني واقفله بالعاني
والحقيقه جيت أشارك والدلي مياحه = كل واحد يدلي بدلوه من الاخواني
جيت اشارك مجلس عامر وجني ارباحه = بالنيابه كان أجازوني هنا خوياني
بعد ماعادل جبر كسره وطاب جراحه = يحفظه ربي من الشيطان والاعياني
والهموم اللي قبل كانت هنا منزاحه = من صدور اصحاب ابوه ورعه الهذلاني
واسمحوا لي كان شعري مارتقى بوشاحه = كان صار قصور عند الشاكر الفرحاني

اسمحوا لي =

جيت ضيف وسامحوني واسمحوا لي ودي أمشي = يم دارٍ ماشناني وان شناني ماشنيته
خيلت عيني بروق وصار جسمي فيه رعشي= قلت يمكن حلم وأثره علم بعيوني رأيته
والسحاب اللي نظرته في العشيه صار عمشي = والرعد زلزال حسه بس كني ماوحيته
والعذر منكم بعد عيني قذاها اليوم رمشي = كيف رمش العين ياهل الخير يهدم مابنيته
والله اني ماحسبت الرمش للاسرار يفشي = قبل هذا اليوم وأعلن عن حديث مانويته
أحسب ان النصح والمعروف بين الناس ينشي = ليت وان النصح للي مايعرفه ماهديته
الجنيه جنيه والاّ القرش ياهل العرف قرشي = كلها عمله ولكن الجنيه اللي بغيته
والحوار اللي رغا وسط المراغه جاه هرشي = شامخ النيبان بان وبان بين الناس صيته
واسمحوا لي بالرحيل وعندكم خليت عفشي = مامعي غير الشماغ اللي على راسي طويته

قصيدة بلغز =

معي لغز جديد ولا احـد عـن رمعتـه ممنـوع=دقيق برمعته واخص مجموعـة مـن الشعـار

هي عذراء فريدة مالها ثانـي وجنـس ونـوع=اصيله مجهمـة فـي وصفهـا لابـد مانحتـار

مصفصف صف وصف اللغز ماجت رمعته مرفوع=ترى لو جت بغيـر وصـف مايقبـل المسعـار

اقول ارمع ياسامعني معك مهله سنـه واسبـوع=نقول الله يوفقكـم علـى الرمعـات يالحضـار

وصفها الخالق الرحمن في المكتوب والمسمـوع=وثنى الوصف واخفى واحدة منهن عن الانظـار

أحدهن في هذي الدنيا والاخرى علمها مقطـوع=به الشك ولبعض المسلميـن وغاضـت الكفـار
وحل اللغـز وسـط اللغـز يانافـع ويامنفـوع=نبا واحد يغوص ويظهر اللؤلـؤ مـن المحـار



ترى لغزي بعيد وقيد لغزي مثني ومربوع = يفكه من يفك الرمز والاقفال والاسرار

ولا هو من مخاليق الاله ولاهو بمصنوع = قديم ومستمر ودوره يابدر باستمرار

أبــــــــــو ســـــامـــــي =

قلطة =

محاورة طلال المعبدي مع الشاكر=
ياسـلام الله عليكـم مـن بنـي عـمـرو الديـاقـا=يارجالاً ماتهاب من الخطر وقت الخطورة
الزمن تـدرج رحاته بليام وبالفراقا=والخلايق في زمنها وقـت يسرٍ وإمعسورة
.الشاكر أبو سامي=
مرحبـا ترحيبـة مــن عــوف تعشقـهـا عشـاقـا=يالمسلم من بني عمرو ومن شرّف حضوره
الـزمـن بـاقـي عـلــى مـاكــان والـعـالـم سـبـاقـا=فــي زمنـهـا ياعمـيـل الخـيـر والــدار معـمـوره
طلال المعبدي=
البقابـك ياعميـلٍ حافـظ شـروط الصـداقـا=مايغلق عنه غيرة وإن بدى غلق فأمورة
مايسابقنا على العليا يكود أهل الحماقـا=الله يـديـم الأســود الـلـي يـعـرفـون الـنـمـورة
.الشاكر أبو سامي=
يـاعـساك تدوم يازيزوم لربوعـك رواقا=والصداقة باقية ماهي سراب ولعب كوره
لاتروح بك الظنون بعيد عن حوز النطاقا=استشير وشاور أهل الراي واصحاب المشوره
.طلال المعبدي=
ياعسى بحمولهـا الليلـة تقـوم مـع الرفاقـا=ذا السنـه كـلٍ لحـالـه وأول الــدار مخـشـورة
الحقايق واضحة وانت ما تسرقها سراقـا=ربعي ثابت فعلهم وأجيال جتنا ومغمورة
.الشاكر أبو سامي=
الجمال اللي تشيل الحمل دايم ماتساقـا=قيدة وقت الشديد وقايدة وقت الضروره
والحقايق واضحة ياذيـب مافيـه انطراقـا=الله يديم الامـان ويسلمـون أخـوان نـوره
.طلال المعبدي=
وش نصيب مسيلمة اللي تنبـأ بالعلاقـة=كــان عـيـا لايـتـوب نـعـزرة نمـنـع شــرورة
وانت والله من رجالٍ فيك درقه سِد فاقه=نـور جــلاي الـظـلام الـيـوم يـاربـي فـنـورة
.الشاكر أبو سامي=
ياعـسـى مايسلـمـون أهــل المـشـاكـل والنـفـاقـا=والكذوب مسيلمه له في القفا عشريـن صـوره
مـاعـلـيــكــم زود والافـــكــــار تــمـــتـــد وتــــلاقــــا=والبيوت اللي بدون ظلال في القيض مهجوره
.طلال المعبدي=
الــدعــاوي مـاتـنـاصـا بـابـنــا مــاهـــو بـطــاقــا=والحمية عرق في وجه الرجل واليـوم دورة
والحديـث إلــه رجـالـه مــا لــك إبعـيـرٍ ونـاقـا=وانت لاتِزعِل رجال وترضي اليوم البزورة
.الشاكر أبو سامي=
كــم واحــد ياعمـيـل الخـيـر فـــي دمـــه انـحـراقـا=وان ظهـر عـرق الحميـة فيـه ماتعـرف ظهـوره
دام مالي خص في بعض الحديـث اللـي يواقـا=من زعل يضرب براسه في جبل تفجع صخوره
.طلال المعبدي=
انظـروا لـه فالجنـوب وثـم شصـوا لـه وثـاقـا=دورا له يـارفيقي قبل حنا لاندورة
مـن يغلـق دون حالـه عنـه يرفـون الوسـاقـا=وانت راعي علم مايخفاك عالم في حبورة
.الشاكر أبو سامي=
ياوسيـع العـرف ماحـنـا عـلـى شـوفـه شفـاقـا=لـيـه نبـحـث عـنـه مانبـغـى يــزور ولا نــزوره
لانتثر ما الوجه فوق الارض مايمكن يحاقا=والقعـيـد الـلــي ورا الـســدة يـسـدونـه سـبــوره
.طلال المعبدي=
يـادســمــيــن الــســبـــال وريــاجـــيـــل الــحـــذاقـــا=حشمة الطيب عن البطال ماهي بمغرورة
عـلـم يـبـدا بالـوفـا تـلـقـى الـوفــا دايـــم غـلاقــا=مانذمـك وانـت حـر الحـر ماتهـفـي صـقـورة
.الشاكر أبو سامي=
العسـل حالـي لكـن الحنضلـه مــر المـذاقـا=يفرق الطيب عن البطال فـي مـدة شبـوره
يالله تديـم الوفـاء وانـا علـى ركبـة وسـاقـا=عاقل الركبة وثاني ساق والراس محسوره

شعر المراسلات =
قصيدة فهد الهلالي =

الشمس تشرق كل يوم بجديدي = وانا جديدي ازرق الدمع هليت
لاشك ربعي شوفهم يوم عيدي = نسوني اللي في حياتي تمنيت
منطوقهم عذب الكلام المفيدي = في خيمة (الالغاز) حيوا وحييت
اصغرهم اللي لاحضر قلت سيدي =حيثه بليغ يعجز الوصف بالبيت
وطاب السمر والليل ليته يزيدي = ما يوم واحد قلت للربع مليت
اسج مع الطاروق وابعد بعيدي = وافرح اليا مني على اللغز حليت
فرحة صغير ٍ جاه لبس ٍ جديدي = انا اشهد اني بفرحته ماتساويت
فرحي كبير وحان وقت الشديدي= اشد ارحالي يم لغز ٍ به ابديت
ياويش عودٍ هو قديم عنيدي = له موقف بالشرع ماقالوا اخطيت
باع الحلال وخلا ورعن فريدي= خلاه عند القوم ماقال ياليت
شهد اشهود يم ورعه يعيدي = مايمنعه لاقال للورع حنيت
مدري خيال الناس مدري اكيدي = واصبح مثل بين الخلايق له اوحيت
المجاراة من الشاكر أبو سامي=
ياللي على الطاروق غنى النشيدي = أنا على طاروقك اليوم غنيت
ابشر بهيل وبن معها العويدي = وزعفران أشقر منقى وله صيت
شكواك جتنا عبر خط البريدي = تشكي من النسيان لك وانت ماخطيت
والله يفعل بالبشر مايريدي= ولافضاله العظمى لواتعد مااحصيت
ولا أنت مابين الناس هذي وحيدي= ولك قدر بين الكل لن رحت وان جيت
وانت دم الشريان وسط الوريدي =في خيمة المكشات لااخذت واعطيت
ومن خبرتك كل العرب تستفيدي = ياكم لهم من واسع الخبرة أهديت
ولا يستمع للنصح غير الرشيدي = والحي وألا الميت خله مع الميت
ولغزك ثمين وفي المثل له رديدي = ويمكن سبقني واحد فيه واثنيت
قالوا جحا باع المحل الوديدي = وخلا به المسمار في جدر هالبيت
وكل يوم يضوي له عساه الثميدي = ويقول عن مسماري انحيت وابطيت
واخذ بدال اللغز لغز عميدي = لو كان في لغزي عليكم تماديت
انشدك عن ورعين في وسط قيدي = واخوانهم ورعين مثل أنت مااوحيت
حبس موقت بامر عمرو وزيدي = يعزل خليل عن موده بتوقيت
وان كان ربعك جوه خطلان الايدي = حلو قيود الحبس يوفون واوفيت

معارضة قصيدة ابن زويبن الحربي =

يامل قلب كفخ مع طلعة الكنه = كفخة حرار على روس المراقيبي

عيت ضلوعي الحواني لايردنه = وبقيت محتار بين الشك والريبي

أخشى العواصف ونجم الشهب ينهنه = بعد نوى الهجر والسجه وتعذيبي

إن جيت أفكر ولا انه مشتقي وانه = يصلاه في وقتنا مثل الملاهيبي

أحداث وأهوال حدنه وهدنه = يشيبن الرضيع من العواقيبي

القن والعرف يثننه وياطنه = مثل البكار الصعافيق المهاذيبي

حتى المؤمل نجاته يخلفن ظنه = ويغيرنه بتكدير المشاريبي

إن مابلاه الرفيق الشين يبلنه = هوج وعوج وسيعات التلابيبي

يوم القيامه قرب والبعث لكنه = تبقى له الشمس في المطلاع وتغيبي

الله ياونتي منّه مية ونه = ويابط بطن الغريب ويافري جيبي

والمسلم اللي هموم الخلق همنه = هذا صديقي وبارسل له مكاتيبي

واللي له القن والله ماانتقص قنه = لاوفيه قنه شمام بلا مطاليبي

عارضت شعرا هجوس الشعر جابنه = لابن زويبن ووثقت المناسيبي

ترحيبية =سلام الله سلام معطره فلٍ وريحاني = على كل الحضور أهل المواقيف اللفاويه
وأبارك للعريس من الشعور وفيض وجداني = من الأعماق يالله ترزقه صحه وذريه
ويجمع ربنا مابينهم في خير وإحساني = ويجمعهم وينجيهم من الشيطان والسيه
بعدها مرحبا في حفل منصور البنياني = حفل منصور بن صالح وربي يصلح النيه
نيابه عن معازيب الكرم والجود وأخواني = وأنا خال المعزب والمعزب من بنيخيه
فهيد أبن نصير إللي سواة الضلع ورقاني = كريم الجاه من منشاه فيه الجود ماريه
وأنا في ماقفى ماني غريب وولد لقماني = وتجمعنا صله وأرحام والغيبات محميه
أبفرح من فرح ربع نقاة طوال الإيماني = عسى الأفراح دوم ودوم والرايه سعوديه

قصيدة تهنيئة=سلام الله سلام معطره بالورد والكادي = على من جابته دعوة معزبنا وداعيها
سلام من الهجوس إللي لها مصدر وميرادي = هجوس الشاعر إللي ينتقى في أرقى معانيها
وأبارك للعريس إللي جمعنا ليل الإسعادي = فهد حمدي عريب الجد فارسها وراعيها
عسى الله بينهم يجمع بخير بكل الأبعادي = ويصلحهم ويرزقهم ونيتهم يسويها
وأرحب بالضيوف نيابه عن حمدي البادي = ولد مبروك يوم انه بدا في أعلى مراقيها
وأنا حربي وهذا ماقفى مع ضمن الأجوادي = وحفظاً للصداقه في أول الهجره وتاليها
بعدها ياهجوس سيري في كل مسنادي = على حره تدرهم بالسنع والرب مهديها
تحليها سحابه ممطره في جوها الهادي = على ذيك الديار المسنيه بالغيث تسقيها
غنيمه للكبار ومفرحه فلذات الأكبادي = تناقل ذكرها البدوان والعساس يوحيها
وأوردها على العد الرهى بزود وعنادي = وأصدرها بعد ماتبهج الجمه وترويها
وأعرجها على تونس ومصر ونهر بغدادي = عساها تأخذ العبره من الخبره وتعطيها
وتهديها على كل الشعوب بموجة الرادي = وتوصيها التلاحم مع قيادات تعليها
وحنا والله انا في أمان وخير يزدادي = بفضل الله وثم آل السعود ونهج بانيها
حبيب الشعب عبدالله على منهاج الأجدادي = على نهج الشريعه مايغير في مباديها
وندعي له بطول العمر والصحه والأمجادي = ومادمتم خير أنا بخير وفكروا فيها
كلام ردده حتى سمعه اصديق ومعادي = صداه أزعل عداه وصار يغضبها ويوذيها
أبو متعب عسى الله يحفظه عن كل الأنكادي = وعسى الله يحفظ بلاد السعوديه وأهاليها
وأبختمها بذكر الله وذكر محمد الهادي = عدد نبت البراري والصلاة إللي نصليها