ديوان الشاعر عجاب صالح الحنتمي المزيني

يومٍ كلّن على التِكتك قضى ليله
عجاب من ضيقته ما نام سهراني

ما فيه من يفهمه لا ضاق يشكيله
صديق صادق يبدد عنه الأحزاني

لو ما صلاته وتكبيره وتهليله
ودله من الكيف فوق الجمر رسلاني

وسجت خلا فوق موتر لا درج ويله
يطوي بعيد الفيافي صنع ياباني

لا ون ونّت ضعيف الحيل والحيله
كبير سنه وطاح بدار عدواني

الوقت لا قام ينصب لي محابيله
فوضت بامري مسير دم شرياني

ماني ضعيف الروابع لا نقص كيله
ضاقت عليه الوسيعه بين جدراني

أنا من اللي تعدل الحمل وتشيله
أبوي صالح وجدي طير حوراني

أسمن لمع بالجزيره في زمن جيله
سند بعيد المغازي يوم الأكواني

كلام عندي شهوده مع دواليله
لا خير بالهرجه اللي دون برهاني

عجاب صالح الحنتمي

البارحه بالعين مثل الثواليل
منها غزير الدمع مثل الغشيني

والحال حال اللي جرت له غرابيل
وصبحت من لوعات بقعا حزيني

يوم اتذكر بالمقابر رجاجيل
اقفت بهم دورات شهب السنيني
اولهم اللي يتعب الجيش ولخيل
سند اخو ثنوا شجاعه وديني

ومطلق وشافي مبعدين المصاويل
ومحسن ابو صاطي طويل اليميني

ومن غيرهم بالوقت فاقد حلاحيل
من خيرة الاصحاب والقربيني

وجدي عليهم والتوجد غرابيل
لو التوجد يجرح الصابريني

وجد الخليل بشوفة ابنه سماعيل
سبحان من يجمع ضنين بضنيني

يالله ياعلام غيب المقابيل
ترحم عبادك يارحم الراحميني

انت الوحيد اللي جلا ظلمة الليل
بنور الصباح وتبعث الميتيني

عجاب صالح الحنتمي

البارحه سهران لاوقت الاصباح
وصبي عيني فيه مثل الاخله

الليل قضيته كوابيس وشباح
وذليت لو ماني براعي مذله

والقلب كن بداخله زند قداح
بين الضلوع العوج همه يتله

تلعب به الدنيا تقل لعب مسباح
يفوح من جور الزمن فوح دله

ماهو هوا اللي خدها تقل مصباح
ربي جمع فيها حلا الغيد كله

بلاه يوم ارقب على راس لولاح
وعيد ماضي ذكرياتي وفله

وين الرجال اللي لهم صيت ومداح
اللي بهم فعل الجمايل جبله

وين العدود اللي لها الورد مياح
واهل الركاب مهاوزات الاظله

وسود البيوت ودلتين ومفواح
ونارن سناها كل طرقي يدله

ياليتني باقي مع البدو سراح
بين الفيافي والجبال المطله

عجاب صالح الحنتمي

القصر ماهو لرجاجيل ذارب
ماعيب الحجاج ذيب الغداري

ذكره سطع في شرقها والمغارب
الرافدين اودع حراره حباري

والطول ياكرام الحا والشوارب
على الزرافه دل شهبن ضواري

مايضيف لرجال نقطة تقارب
بالطيب واخلاق الفتى والحماري

ياوقت لاتغثرب جميع المشارب
يكفي بقلبي منك مثل الشباري

اسقيتني سم الحنش والعقارب
اشكيك للي ماخفى فيه داري

يقوله اللي عاش وقته تجارب
على الوفى ومزارق الطيب ضاري

قبل البيوت العامره والكهارب
اول حياته عاشها بالصحاري

عجاب صالح الحنتمي

البارحه من خلف عوجن حواني
يفر قلبي فر فرخ الشياهين

والعين من ماتشوف باخر زماني
افضل الراحل عن اللي مقيمين

عاشو وماتو يالله المستعاني
قبل المسارح والطرب والمغنين

مع الصحاري من مكان لمكاني
خلف الضعن فوق الرمك والبعارين

للجار والخطار فيهم لياني
وخويهم قدره على الراس والعين

مايتبعون اهل الردى والهواني
وعلى المحارم والكرامه حريصين

يامنزل الرحمه وسبع المثاني
تغفرلهم يفارج الهم والبين

اللي لغير الله مع الوقت فاني
العمر يطوى والمخاليق لاهين

النفس ماعندك عليها ضماني
يعاشق الدنيا ويامهمل الدين

رحمتك ياربي نهار امتحاني
خايف بحسناتي تخف الموازين

عجاب صالح الحنتمي

بين الشباب وبين سن الطفوله
عدت الشريط وحن قلبي لماضيه

اخذت لي في هجعة الناس جوله
وذكرت ماني تالي العمر ناسيه

ياموتري عجاب نفسه ميوله
للماضي اللي ينعش القلب طاريه

خذ بي مع الاسياح صوله وجوله
ابغى اتذكر مامضى لي وحييه

ياطيب دار اهل الكرم والرجوله
علمي بها وانا اقضب العلم وخطيه

واليوم شايب والذلول امعقوله
ماكل دربن تقدر الرجل تمشيه

يانفسي اللي بعد كبري زعوله
وياقلبي اللي زاد همه وطاريه

ماريد ياصعبه ومصعب وصوله
طاف القطار وشان وقتي ومافيه

عجاب صالح الحنتمي

الله من قلبن تقل فيه طاعون
بين الضلوع العوج ينزف صوابه

رحت الطبيب وقال قرحه وقالون
وكتب لي الوصفه حبوبن تشابه

قلت البلا ماني يدكتور مبطون
تشخيصك الخاطي يثير الغرابه

انا بلايه ماعنه ناس يدرون
يدريبه المعبود منشي سحابه

سبحانه اللي من عدم كون الكون
وعلى رسول الحق نزل كتابه

البارحه كني مقيد ومسجون
من ماتشوف العين جتني كئابه

وانا ابدوي ماني مشرع لقانون
تابع لدين المصطفى والصحابه

اغير والاحرار مثلي يغيرون
على سلوم اهل الشرف والمهابه

ياهل الرعيه حذركم لاتغفلون
اشوف بالجال المقابل ذيابه

اليا عثت فيها على مايقولون
ماينفع الفزاع عصب العصابه

عجاب صالح الحنتمي

السلام عليكم
يرقد شاعرنا الكبير عجاب صالح الحنتمي

على السرير الابيض اثر جلطه دماغيه دعواتكم له بالشفاء

الابيات هاذي ارسلها عليه وهو مرقد بالمستشفى


يالله تشفيني وتلطف بحالي
اشكي عليك الحال ياساتر الحال

من بعد مرقب نايفات الجبالي
ومد شوفي بين وديان وجبال

ارقد بمستفى بها ضاق بالي
الوقت فيها طال وعلاجهم طال

ابغى المسير وكن فيه عقالي
صابتني الجلطه قبل عدة اليال

يارب يامنشي حقوق الخيالي
ماعنك يخفى كل الاوقات مثقال

عجاب عبدك ياعظيم الجلالي
يطلبك عافه ياعليمن بالاحوال

يبغى على الاقدام يمشي عدالي
ماتهمه الدنيا وماهمه المال

عجاب صالح الحنتمي

الله يبيض بالزمن وجه سلطان
الروقي اللي نالني منه معروف

نسل الرجال مرويه حد شامان
يوم القبايل بين حاذف ومحذوف

لطامة العايل وذباحة الضان
عتبان مافيهم مساكين وضعوف

فزعاتهم تروي ضما كل ضميان
ومزبان للي ماتهنى من الخوف

طلابته لوهم بني عم وخوان
دونه تعن الخيل وتجرد سيوف

امدح رجال الطيب ذربين الايمان
والمدح باهل الطيب جايز ومالوف

وختامها مني تحيه وعرفان
ياطيب الخوه سعد كل ملهوف
عجاب صالح الحنتمي

يامتعب ابن حمود يامنبع الجود
ياطيب الرفقه كريم السبالي

يالحنتمي ماقفك واضح ومشهود
يتاج راسي يابعيد المدالي

ابوك قبلك يابيض الوجه محمود
يشكر ويذكر من قديم اليالي

ارجال مافيكم مذمه ومنقود
يعيال حنتم طيبين العيالي

انسى المرض بوجودكم علم ماكود
يامحزمي كان الزمن في مالي
حبل الرجا بمكون الكون معقود
ممل بربي خير يلطف بحالي

عندي يقين وعمر الانسان محدود
يالله تثبتني نهار السوالي

عجاب صالح الحنتمي