أعـطــونــي الـــراي...

صحيح ماني مثل ما فــات =و ما فـات لا يمـكن لـحـوقـه
ما فات من العمر والأوقـات =صحايـفه طــويت بســوقـه
بـيــديــن أمينة و بسـجــلات =ما يـقـدر الـبايـق يبــوقــه
وله وقـت يطلع بكل إثبــات =وكـلن بعـد ياخـذ حـقـوقـه
بمــاقـــفٍ ما عـنـه لــفــات =ولا مـطرق غير مطـروقه
وسمعت سمعت بدون صوات =نص الخبر قبل منطوقه
وجيت المداوي وأنا فـوات =وقـايسلي الـدم بعـروقـــه
ثم هـز رأسه قــطع هــزات =وقـامت تـقل تومي شدوقه
وقال المهيل فـقـط بالـذات =هـو والدسم خص لا تذوقـه
وشـفـته حـرمني من اللذات =والشعـر قـفـلت صندوقه
وأنا هــــوا بـالي السـجـات =مع نجـد ليا زم زمــلوقـه
وقـالوا عليه المـطر سوقات =ولا يفصل الرعـد وبروقـه
وشـرب المهيل هـكا الحـزات =وتعـلـيق الهرفي بمعـلوقـه
وسمي وعـشقـه من العشـقات =ومن يقـتدر ترك معشوقـه
وأيضا ليا زانـت الجـلسـات =بمجـلس ٍ طـابت وفـــوقـــه
غـالين و حضروا بعد غيبات =وكلامهم بــالـي يشـوقــه
وجـا للـقـوافي مجـال وجـات =وعـدادهـا عــد بــرفـوقـه
وسـاق الفـناجـيل والكاســات =بـيمـنـًا عـسى ما الله يعـوقـه
وقـالوا تفضل هـل العـادات =لمـفـطح ٍ مـالت شـنـوقــه
ومـعـه من الخـير والخـيـرات =اللي أكثره معـرف رنوقـه
بوقـتها مـا اقـدر الصـدات =مثل العـهـد مقدر ابــوقــه
وقـلبي مصمم عـلى الطنخات =و دكتوري يطير حـدوقـه
واحترت بين هــاك وهـات =صار الفضا تقـل يا ضـوقـه
يا هـل التفاكـير والحـيـلات =أعـطوني الـراي بـوثـوقـه
بشعـر ٍ محـكم عن الغـلطات =جــديـد والحـل بعـمـوقـه
معيوف بن عقيل الوهبي=

صح لسانك على الهجيني
ولا زالت فيها بعض الكسور في بيتين او ثلاثه
والله يـعـطـيـك الـعـافيـــــــــــة والقادم اجمل
بيض الله وجهك

مع الأسف سقطت بعض الأحـرف مع السرعة في الكتابة من بعض الأبيات وهي كما يأتي:

بماقـفٍ ما عـنه لـفـــات *** ولا مطـرق غـير طـــاروقـــه

رسمي وعشقـه من العشقات *** ومن يقتدر ترك معشوقـه

واحترت ما بين هاك وهات *** وصار الفضا تـقل يا ضوقـه

لازم تعدل القصيدة ياغالي في نقص في الحروف ياغالي

صح لسانك ياغالي

صح لسانك كثر حروفها واكثر والله

قصيدة جزلة بالحيل ، وكل قاف احسن من الثاني .


تحياتي