•√♥ ديـوان الشاعرة شُموخ الحربي ♥√•

ديـوان قصائدي ، مع أمل أن ينال على اعجـابكم ..

*

{ الــساس حــربي }

يامن أخذه القول للعلم نشاد = الساس حربي و المعالي شدادي
وكانك جهلت شموخ وش عاد وش عاد = ماهمها جهلك بها وانت غادي
اسمع كلام اللي لها الحرف ينقاد = بنت ٍ على نظم القوافي تفادي
ماني من اللي في قفى الخلق تصطاد = أسعد لغيري و استعد المدادي
يطيب قلبي مع هل العود و الكاد = وان جيتني بالطيب فالطيب زادي
من روس حرب الروس ياروس الأشهاد = قوم ٍ لهم بالمجد حشد واعتادي
أفخر بهم فخر ٍ عظيم ٍ ولو زاد = فخري بهم ماينتقص لك شدادي

{ وهــن ٍ على وهــنْ }

وهن ٍ على وهن ٍ تقاسين يمه =لجل الضنا يرتاح تزهى لياليه
لا جاك ضايق شده الصدر لمه = ضمة كسير ولا أمان ٍ حواليه
يبكي و تبكي كأنه صياح أُمه = مجتاحها ضيم العدو في غواليه
يا وا هنيه قلب طاهر يضمه =كلما فضى دهره هي اللي تمليه
لا هود الليل و نهاره بكمه =اسمع صداها ترجي الله يخليه
مهما صفت الأيام والخير عمه =هي من عطته جيوش روحه تسليه
أمي لها شان ٍ عظيم و مهمه =رمز السمو من أوله لين تاليه
لا قالت ابشر ياوليدي تتمه = ما تنقض عهود الوفا " تنشده ليه
لا غاب شيخ الدار قامت بهمه =و شموخ صرح العز دايم تعليه
لا عاب ركن البيت تاتي ترمه = من غيرها يا ناس دايم يحليه
ياليت صدري أرض وأقول يمه= هاتي همومك هم هم ٍ وصاليه

{ حقوقـك من يقـاضيهـا }

طبيعة و الطبيعة لا تطبعنا بها زانت=بلا ذيك العلوم اللي تشيّب راس راعيها
ردي الفعل بين الناس منه الناس قد عانت=يا كيف يجوز أبو طبع ٍ عن أفعال ٍ يسويها
تريّث لا تعجل تو مواريها بكم بانت= يا كم شخص ٍ لقى له من حلاله علة ٍ فيها
صبرت الين صبري باح و حزة ساعتك حانت=و لا تحرق لهيب النار سوى رجلين واطيها
و خلك من تصانيف الردى و الشك لا شانت=ترى من عاش بالحيله يوقّع في بلاويها
أبد لا تطلب المخلوق لو دنياك بك خانت=و لا يمكن تعزك غير يمنى أنت واليها
إذا لك حق عند اللي ظلوم ٍ نخوته هانت =طلع خصمك هو القاضي حقوقك من يقاضيها
و اذا فارقت خلانك و لحظة بعدهم حانت =تغرب و احفظ الواجب و لا تنسى مباديها
و لا لك عذر دون الوصل للأرحام لو بانت=حبال الوصل لا تنسى حياتك ما مضى فيها
ألا يا خوي يا ابن ابوي ترى الظهران لو زانت=حجاز العز لك فيها حبايب و انت غاليها

{ الحمــل الـثقيـــل }

العقيم اللي حياته كلها ضيم و مناوي= فات عمره بين أماني خاطره و العمر زايل
زاد حزنه و المصيبه مالقى له من يدواي = ينقفل بابه و عزه في طريق الحظ مايل
العقم عقم الحبيب اللي جفا ماعاد ياوي = استظله من هجير الصيف و الفرقا قوايل
مر بي عام و محبتنا كما السيل النحاوي = اندفق فينا سعدها و الفرح يا ناس هايل
الحبيب اللي يغيب و يفقده قلب ٍ شفاوي =ويش يرجي لا غدا صرح المحبه فيه آيل
كنت أظنه عشق عمري بيننا حب متساوي = ما دريت انه يمثل لي غرامه و ايتحايل
طال صمته والسكوت المر لا طوّول بلاوي =يكشف المستور .. و اذبح مابقى فيها تمايل
يا خسارة عام فيه القلب من همه شقاوي= سبة اللي في خفوقي جرب أنواع العمايل
كنت أحبه موت لكن قلبه امن الحب خاوي= كان حلم ٍ ماله ألا دمع عين ٍ صار سايل
الحشا ما كنّه ألا عزة الحر النداوي=عزته ترقا ويرقى بالوفا ما كان طايل
الزمن يومين يوم ٍ لك ويوم ٍ فيك لاوي =رغم ضحكاته وخيره .. بالعنا ماله مثايل
العقيم اللي حياته كلها ضيم و مناوي = شال حمل ٍ لو وزن ماتحتمله جبال حايل

{ يا روح شموخ يا فزّاع }

بعيني شفتك أعظم شخص وتكبر فيك أحلامي=ترد الروح بعروق الفؤاد ان قلت يا أمي
بعيني يا أمل بكره وفرح ٍ دوم قدامي=اشوفك تكبر بعيني اقول الله وأسمي
عناقك بلسم جروح الخفوق و مجمل الآمي=يكيد الهم بعروقـه يصيح الهم يا همي
تورّث من أبوك الجود وخلك دوم مقدامي=و أنا بجوفي عطيتك درس بقا في ذاكرة دمي
تكّون قبل ما تكمل أحسك مصدر إلهامي=و يوم انه كمل بدرك ظهر مدك على اليمي
يا حلم ٍ مزهر ٍ بالورد يا حلم ٍ فيك إسهامي ِ= تسمى و الإسم (فزّاع) هو اول مانطق فمي
عطيت من الحنان جبال توالت عندك أيامي=يعانقني شعور الام اذا اسمك باإسمي التمي
يا روح شموخ يا (فزّاع) حذاري الدون يالسامي=أنا أدري بك وفي لكن نصيحة أم تهتمي
لو ان العمر بك يقسى توثق شرع الإسلامي=وفيض خشية الرحمن دمعٍٍ كنه الجمي
وعسى الله يبعد عيال الحرام وكل هدّامي =عن دروب المسير و رد روحي قول يا أمي

{ صنـاديـد الرجــال }

ياصاحبي ياللي تعاف المناقيد= قلي وش أحوال الزمان و رجاله ؟
كان الرجال اللي من أول صناديد = أبطى رحيل أيامهم و ارتحاله
خير ٍ بهالدنيا بهم خيرها يزيد = ما هو بخير اللي تفاخر بماله
رجل ٍ يقود الناس بالخير مايحيد = صرح المعالي لو تعلى رقاله
حرٍ تعلى حط له بالعلا ايد =عذب الصفات النيرة من فعاله
ما همته لذّات ساعه و لا يريد = ألا رضا ربه و يكسب مناله
يعامل المرأة على أنها العيد = و من مننا يقدر يفارق وصاله
الود وده ينوجد من ذهب قيد = قيد ٍ يقيد عمر منهي حلاله
لجل البقى يبقى وتبقى بتخليد =ما ينتهي عمر الخلود و مجاله
والله ثم والله و إن قلتها أزيد = إني لأدون كل يوم ٍ رسالة
مضمونها لكل النساء منهن الغيد = واللي على ظلم الرجال يهنا له
للي يصرح كل يوم ٍ بتجديد =حرية المرأة هدف هالحثاله
حملة دفاع ٍ ما ورآها مراديد = فيها تواصيف الرجل مع خصاله
رجّالنا باقي به الخير مايحيد = صرح المعالي لو تعلى رقاله