الحب مايعرف الطيب من اللاشي

لاباس يامن غمرك الحب بارشاشه=واثر على جوك الصافي وهو ماشي
ياشاعر من غريمه مابرد جاشه=الجادل اللي جماله يدهش ادهاشي
ان كان زين الوصايف يصعب نقاشه=ابعد عنه يا سديد الراي وانحاشي
لايجهرك ياوسيع العرف بافلاشه=ما دام هاذي سواته بعه ببلاشي
ترى الهوى يمزع المعلوق لناشه=الحب مايعرف الطيب من اللاشي
وساير زمانك وشوف الوقت ثم ماشه=لاتنخدع في مظاهر كل غشاشي
يقوله اللي من اجلك حزم فراشه=ان ما اقتنعت بكلامه راح طراشي
يروح للي تبي لو طال مطراشه=ويجيب علم وكاد ويبرد الجاشي
في جيبه المال وفي يمناه رشاشه=رهن الاشاره ويدفع للطلب كاشي
قاله رفيق زمانه بالقسى عاشه=صديق مخلص وقلبه كنه الشاشي