ديوان الشاعر عجاب صالح الحنتمي المزيني

يالادمي دنياك دنيا وخيمه
دوراتها عبر الايالي والايام

زاحت عروش اهل العروش العظيمه
وين الملوك وين كسرى وصدام

الخلق فاني والليالي مقيمه
ياناس مادامت لتاجر وحكام

كم واحدن عنده طموح وعزيمه
واصبح عليه الصبح يشكي ومن ضام

منها السلامه للعوارف غنيمه
وبعض الامور اللي على دين الاسلام

من بعدها شفي بذب الخريمه
مع نجد جعله بالحيا كل الاعوام

برفقة نشاما والنوايا سليمه
وعند الشدايد كلهم درع وحزام

بعدن عن الرديان واهل النميمه
مكسب وراحة بال عن كل نمام

النفس ماعودتها للهزيمه
وماشيد المبنى على زيف الاحلام

عجاب صالح الحنتمي

يامن يسلم لي على نايف سنيد
سلام من دافع محبه لنايف

والله مالي فيه بعض المقاصيد
من خوف هرج اهل النفوس الضعايف

طيب وفي طيبه يبا يشيد وشيد
اهل الوفى من كل دار وطوايف

الطيب يانايف مثل شرد الصيد
في روس عسرات الجبال النوايف

عليه مايقدر منافق وهربيد
له بالردى والهون عدة وضايف

مايقدرونه غير روس الاواليد
مثلك عسى عنك المخاطر تسايف

ياعل يفدونك جميع الحواسيد
سود القلوب مفرقين الولايف

عجاب صالح الحنتمي

بالقلب من وقتي مثل جمرة الكير
مدري مثل دله على النار مركاه

بوجار من يفرح بشوف المسايير
خلوق يضحك لنشاما محياه

من غير جيرانه يجونه خطاطير
عامر محله لين ربه تولاه

واليوم عن وقتن مضى شايفه غير
ياقل من تقدر مع الصبح تنصاه

ماتو رجال ٍ قبل مايسرح الطير
لنجورهم ياهل المعاني ملالاه

قبورهم تذرى عليها المعاصير
ماباقي الا ذكرهم ياحلولاه

وجدي عليهم وجد راعي مغاتير
مرباعهن مداجبه راعي الشاه

العشب من فضل الولي له نواوير
تقول بستانن على حده احماه

وشافوه غزو ٍ للعشاير مداوير
ورموه رميه قاتله والله انجاه

لكن ساقه من فشقهم شعاثير
حاول يقوم وطاح من كبر بلواه

وامسى عليه الليل مامن تباشير
ماغير ذيبٍ زلزل الضلع بعواه

عجاب صالح الحنتمي

شهر التسامح والعباده على الباب
شهر ٍ تربط فيه كل الشياطين

فيه الحضيض اللي عن المعصيه تاب
وصامه وصلا مع جموع المصلين

ويبعد عن اللي للمقفين يغتاب
بعروضهم لاقفو تقل حد سكين

البعد عن حاسد وحاقد وكذاب
اكبر غنيمه يالرجال الفطينين

رافق هل التقوي من اقراب وجناب
اهل الوفى ومرجحين الموازين

نصيحة مجرب بعد عارضه شاب
ماهي تجارب من سنه لاسنتين

ستين عام وفوقها عدة حساب
اصارع الدنيا عسى ربي ايعين

الله يافيها مضى لي من اتعاب
تزين عام وتقطع الحبل عامين

عجاب صالح الحنتمي

يالله يامعبود قدام الافطار
يامسير الافلاك داخل بحرها

يواحدٍ تعلم خفيات الاسرار
علام مافي برها مع بحرها

كدر حياة الاش مسموم الافكار
لاما عليه تضيق واسع ديرها

يعيش بين الذل والقهر والعار
وماتشوف عينه شمسها مع قمرها

وان مات مايلقى من الناس قبار
اجنازته مافيه مسلم حضرها

عن النعيم الله يجازيه بالنار
في يوم فيه الناس يشخص بصرها

هذا جزا ظالم وحاسد وفجار
يالله حقق دعوتي في شهرها

عجاب صالح الحنتمي

سلام يامكرم الضيفان
عداد زوار الاهرامي

ممزوج بالورد والريحان
سامي وفيه الهدف سامي

مالي ورا مدح ابو راكان
غير الوفى نسل الاكرامي

انشهد انه ويسع ابطان
رجال محبوب وعصامي

ماله حليٍ مع العربان
ياكود صاهود ابن لامي

والله لمدح رفيع الشان
راع الكرم مدحه الزامي

الطيب لو كان بالمجان
شرهة على الطيب الاقزامي


غنيت في سالم القيفان
الصدق مايجرح اصيامي

والكذب بيتٍ بلا سيسان
لابد مايرجع احطامي

عجاب صالح الحنتمي

يوم اتذكر مامضى تبكي العين
همالها من فوق خدي يسيلي

والقلب كن بثومته حد سكين
والحال يالنشاد صاير هزيلي

عبر الزمان اللي به الزين والشين
على المتون اشيل حمل ٍ ثقيلي

ماظن تقدر له ظهور البعارين
وشلته وانا دربي صعيب وطويلي

وفقدت فيه من القريبين غالين
وياما فقدت من المعارف زميلي

في داخلي تشبه مجازر فلسطين
يوم اتذكر ياهل العرف جيلي

اللي رحل واللي عجز يالفطينين
واللي مربط للفراش الرحيلي

يوم الحساب ويوم نصب الموازين
ياعل حسناتي بذنبي تميلي

عجاب صالح الحنتمي

يذكر عليه صبح الاعياد غالين
العام ياالاجواد واللي ورى العام

والعيد هذا يالرجال العزيزين
ماباقي الا ذكرهم عبر الايام

لاحد يلوم العين لو تبكي العين
امالها صارت مثل طيف الاحلام

اكيد ماحنا عليها مقيمين
لابد مانطوى بقطعه من الخام

الربح فيها راحت البال والدين
خوة طليق حجاج وافي ومقدام

قدام ماب الحي تفتح دكاكين
مع وادي مافيه ضجه ولا زحام

ناخذ لنا عن زحمت السوق يومين
متونسين الله لايزيل الانعام

ومتواعدين لمثلها يالكريمين
قدام مايلوذ على الروح هدام
عجاب صالح الحنتمي

ارتاح ياطير الرخم فود عوجان
مالك قبول من اول العمر لشيب

بالمجتمع دايم تقل فار سيسان
ضاري على الهزله وشذب العراقيب

عساك فدوه بالزمن لبو راكان
والطيبين مكملين المواجيب

ذباحتن لضيف حيل ٍ وقعدان
رجالهم ماهو قريب محاضيب

اهل هلا يامرحبا واهل ايمان
ارجال دين وجود ماهو زواريب

ياليت مالك بين الاجواد مسكان
عن دارهم بديار قشرا واجانيب

فرقاك مثل العيد في كل الازمان
وان جيت مالك عند الاجواد ترحيب

عجاب صالح الحنتمي

مريت صدفه بعد عيد ارمضاني
بعد العصر قدام وقت المغيبي

عابر سبيل وشوف عيني دهاني
مجالس اهل الطيب عون القريبي

عيال حي الصيت لو كان فاني
من رحمة المولى عسى له نصيبي

درهوم ابن جدعان قدر ومكاني
على حياته دوم صدره رحيبي

خلف عيال ٍ مامشو بالهواني
شبابهم واللي بسن المشيبي

والنعم من قلبي نطقها لساني
ترجمتها ببيات شعر ٍ امصيبي

المدح يزها طيبين المجاني
والا الردي مدحه يقولون عيبي

والنعم بالغربان قاصي وداني
اهل الكرم ومدلهين الغريبي

اليا عتلو سرج الفرس والحصاني
يردون حوض الموت ورد القليبي

عجاب صالح الحنتمي