ديوان الشاعر عجاب صالح الحنتمي المزيني

ابغاك ياحضي معي ترقب الريع
في كل حاجه بالزمان اتخدمني

وانته عليه صرت شر ومواجيع
ضلمتني والوقت مثلك ضلمني

اثريك لاقفيت مابك منافيع
خليتني لاما زماني لزمني

عاندتني مثل ولد نوح ولكيع
عصيانك الجاير عليه صدمني

ماعاد باقي في حياتي مشاريع
كبرت والوقت المولي خصمني

بعد المرار اللي شربته قراطيع
مايفيدني لو اشرب اليوم سمني

يالله يارازق سباعٍ مجاويع
رحمتك حضي والزمن مارحمني

عجاب صالح الحنتمي

يوم اتمثل في جزيلات الامثال
وكتب جزيل القول من مانقيته

احيان اوجه ماكتبته لرجال
وحيان للجمهور ياللي قريته

والله مادور من الخلق مثقال
يرزقني اللي خفت من ورجيته

عزيز نفس ومن مواريث الابطال
عيال حنتم روس ماهو نبيته

تاريخهم ماضي وحاضر ومازال
بياض وجه لحي حنتم وميته

والناس من خلقت بها خير وبطال
فعل الرجال الطيبه مانفيته

ماقل دل وعن عريضات وطوال
يكفي وراع الطيب يسمع بصيته

عجاب صالح الحنتمي

ياما جرالي بالزمن من عزاير
من شبتي لين اني اليوم شايب

جروحهن دايم بوسط الضماير
وش عادل لو عيدت وسط القرايب

اضحك وقلبي فيه مثل السعاير
اهبي يادنيا العنا والمصايب

اصبح قدم رجلي بها غصب حاير
في جرحها مافاد جهد وطبايب

مامطلبي فيها فلوس وعماير
رزق الفتى من عند ربه وهايب

ماني محسب مكسبي والخساير
اعد للي بعد عوج النصايب

منك العوض يعالمن بالسراير
يكافل الارزاق جزل الوهايب

والله ماغبط بالزمن غير طاير
لاضاق حلق حول غر السحايب

عجاب صالح الحنتمي

اهبي يادورات غبر الليالي
ياما خذة من صفوة الربع رجال

اليوم راحت في كريم السبالي
خلف عساله بين الابرار منزال

مرحوم ياحلو النباء والقبالي
ياطيب الرفقه ويالمعدن العال

عليه ياحزني ويابري حالي
وياعيني اللي دمعها تقل همال

ماهو فقيدي في زماني لحالي
فقيد حرب اهل المكارم والافعال

كريم ساس اكرام بأول وتالي
وشاعر حكيم وفيه مضرب للامثال

وربعه لهم في كل جزله مجالي
خيالة العرفا مواريث الابطال

يوم المعارك والفتن والضلالي
قدام حكم الفيصلي شبل الاشبال

حامينها في مرهفات السلالي
ياما ذبحو من نقوة القوم خيال

عجاب صالح الحنتمي

ياساير سبيل قبل زحمة العيد
سلام من عجاب مثني ومربوع

اخاف تشغلني ضروف ومواعيد
ومعايدة شرواك واجب ومشروع

عيدك مبارك عاده الله تراديد
عليك ياللي فيك لربع منفوع

دايم لهم شامخ مثل نايف الحيد
رايك سديد وبالصعيبات متبوع

رازقك من يرزق صغير على الديد
توه ماكمل فيه حياته والا سبوع

امدحك ياساير من القلب واشيد
وراس مابين المخاليق مرفوع

بوجار نارك والمات البغاديد
وماتقلط الا بالصحن حيل وفروع

راعي كرم ماهي علوم وهرابيد
انشهد انه فيك من صغر مزروع

عجاب صالح الحنتمي

للعيد ياشاري جديد الثيابي
انا عيوني في صباحه حزينه

احاول اخفي في صباحه مصابي
ودله مع اللي غاشيتهم سكينه

مير البلا ياللي تريد الجوابي
اللي يكمل فرحة العيد وينه

من دونها حال الحد والترابي
وقتن تشيب يالعوارف سنيه

يوم النشور ويوم وقت الحسابي
ياعل صفحتها مع الرب زينه

دنيا الشقى بين الخطا والصوابي
كم فرقت بين الضنين وضنيه

كم حي فيها في سجل الغيابي
وكم ميتن ماتقول تحت الدفينه

للاخره من الاذخرله زهابي
لاخير في دنياه لاضاع دينه

عجاب صالح الحنتمي

سبحان من يعلم جميع الخوافي
الواحد المعبود منشي خياله

ليوب سبحانه بعد ضر شافي
دعاه باسمه بعد جاري جراله

وفرعون بعد الغطرسه والتعافي
اطبق عليه الموج جلا جلاله

يالعبد ماكل اليالي عوافي
لقيتها مثل الرشا والمحاله

بقبالها تشرب من الجم صافي
تجيك لو ماتعبت فيها زماله

وبدبارها لو دجت جرد الفيافي
ماتريد ياصعبه ومابعد مناله

عنها ركابي بعد شيبي مقافي
لو اقبلت عجاب قاصر حباله

لايصيب طاردها عليها هرافي
هي زايله والعبد ماقرب زواله

عجاب صالح الحنتمي

انا هوايه من العربان
اهل المعمات والديني

جرى مع الدم والشريان
حبي لهم يالمياميني

اخوان بالدين يالاخوان
ويرجحون الموازيني

مع الموحد رفيع الشان
خاضو جميع المياديني

اليا ذكرو لي وانا نعسان
مادوج النوم في عيني

اهل عوايد وقو ايمان
مايسمجون الدواويني

شتان مابينهم شتان
عن ناس مثل النساويني

اللبس مزري وقل احسان
صاحين مثل المجانيني

اخص ماعم يالشجعان
كثير بالناس وافيني

ومن قال يالحنتمي غلطان
رايي وعندي براهيني

عجاب صالح الحنتمي

البارحه بالكبد مثل السعيره
والقلب يالعذال ماكثر طواريه

سهران لين السبح يطلع نذيره
جفني يخم النوم لحضه ويخطيه

وصبحت من دنيا المتاعب بحيره
يالايمي ماصابني تبتلا فيه

اليا طرولي طيبين السريره
القلب كن بشذرة السيف فاريه

والحال حال اللي تعثر مسيره
والزاد عنه اصوم ماني اباغيه

اللي غدى فيهم لفاني نذيره

لابد ماحين نواعيه تنعيه

يالله حسن الخاتمه والستيره
وعجاب عن منة هل المن تغنيه

ان عاش مايحتاج حبة شعيره
وان مات تمحا سيته في حسانيه
عجاب صالح الحنتمي

ياليتني ماشفت شيبان الاسياح
وماهلت العبره عليهم عيوني

عبر السناب اشوفهم مثل الاشباح
اليا غفيت امرقدي زاوروني

وفز كن بخافقي علط الارماح
وكثرة هواجيسي وكثرة حزوني

من مات يامجري نسانيس الارياح
تغفر ذنوبه يالكريم الحنوني

والحي جعل ايامه اسرور وفراح
مايشتكي ظيم الدهر والغبوني

ياليل فيك الناس ترقد وترتاح
ماهو بمثلي ماتغفي جفوني

يوم اتذكر يالمشاكيل ماراح
أصل من التفكر حد الجنوني

لاتصير ياوقت الشقاء حيل جراح
ارفق على عجاب يمكن تهوني
عجاب صالح الحنتمي