في كل ديرة ذياب. .،.،

قصيدة بعنوان :

(( في كل ديرة ذياب ))


بقلم / فواز بن محسن الزويهري الحربي


〰🍃〰🍃〰🍃〰


العافية زينة ودرب السلامة
لكن بعض الناس ماهو فسلامات

يعارض الصقَّار وذاته حمامه
وليا احتما الميقاف في حثلها بات

ما كل من يلبس عِمَامه .. عَمامه
منسبين ومن حمولٍ ثقيلات

ولا كل قاشع راس جده هلامه
ترا الرجال افعال عند الصعيبات

يا مخايل البارق في داجي غمامه
ما كل بارق له ثعولٍ غزيرات

من ينسج الأوهام يلبس ندامه
وياكثرهم من يلبسون الندامات

واللي يساوي طويق باسفل تهامه
جاهل..وخلق الله تشوف الحقيقات

الطبل و التطبيل ماهو شهامه
ولاهي من صفات الرجال العريبات

يغر.. غروٍ ما يجوّد حزامه
والعارفه يعرف لقدره نهايات

اليا تعد الحد يلقى ملامه
وما دام في حده ينول الكرامات

وشعيل حمله فوق قاسي عظامه
ويبرك لها راع العظام الصليبات

والداهية يلقى من الناس هَامَه
وفي كل ديرة ذياب راع البطولات

وعنتر وأبو زيد الهلالي و سلامه
ومن لا يعرف الناس يحسب فالاموات

والظفر يعرف وين يرمي سهامه
ومن قبل لا يرمي يقيس المسافات

حتى ليا مر الهدف من أمامه
يسدد الرمية ويقنى الجزيلات

ومن لا حسبها صح يفقد مرامه
ويفرك يديه ولا يرد الذي فات

تم الكلام بخير فآخر ختامه
صلوا على محمد سراج الهدايات


➖➖➖➰➖➖➖

واللي يساوي طويق باسفل تهامه

جاهل..وجاهل وخلق الله تشوف الحقيقات

نعم.. صح لسانك ياشاعر الجزاله بيض الله وجهك

(وقل لمن يدعي فالشعر فلسفتن حفضت شعرا وغابت عنك أشياء )

يديك العافيه

صح بدنك وسلم غاليك

لاخلا ولا عدم

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك