ديوان الشاعر سليمان محمد الجابري

ياهل النفاق أخذو حذركم من النار=غريسكم قدامكم تحصدونه
محد ٍ زرع زرع ٍ بلا ورد وثمار=وكلن يبى ينجا الثمر حسب لونه
باعراض خلق الله لكم شان وفكار=ولكم الفخر تقصيرهم تذكرونه
وتقصيركم عنكم بغبات الابحار=تخفوه لو كان البشر يعرفونه
وليا هرج في مجلس ٍ خطو هذار=واللي سواته بالخطاء يلهمونه
سوى على الغافل كواليب وسوار=واللي فعل من خير ما تنطقونه
والله نهى راع النميمه يالاخيار=وش علمكم درب الخطر تسلكونه
أنزلكم رب الملا وعد وأنذار=في محكم التنزيل ماتجهلونه
عفو عن أعراض البشر وبنو الدار=بذكر والتسبيح شدو ركونه
أخير من قول ٍ بلا عرف ونكار=في غايب ٍ لحمه تقل تاكلونه
ياهل النفاق أخذو حذركم من النار=غريسكم قدامكم تحصدونه

فكر ابن أدام في مصيره وقدره=وقر باللي مقبلات ٍ وعايده
أيام لو يعلم عددها يعدها=لانقص ٍ فيها ولا هي بزايده
لابد ما زار الاحبه يزورني=يبى يزاورني ولاني براده
غافل وشيد بيت للعز والامل=الموت بيت العز والامل هاده
دنياك يالمغرور لاتفتخربها=سراب ٍ اقفى وأنت ضامي وارده
لو تملك الدنياء من اوسع ابوابها=تطلع بثوب ابيض والطين ٍ وسايده
أحفظ صلاتك يافتى في خشوعها=من قبل يوم ٍ ماتعود فقايده
أن كان قلبك حي قدامك العبر=في كل يوم اتشيع ارواح بايده
وظهر زكاة المال وحذر من البخل=ترى زكاة المال بركه وفايده
والصوم بعد الفرض ياطيب العمل=تدعى مع الريان والناس حاشده
واسعى وطف فالبيت والدين يكتمل=كالقصر سقفه شامخ ٍ من قواعده

شاقني ريم ٍ نظرته بســوق البايعيــن

يوم شفتــه عـد كبــدي تمـزع مـزع من معلـوقها

سل سيـف المـوت بين الحواجب والجبيــن

والرقاب الخاضعـه حــط سيــفه فــــوقهــــا

قلتلــه رح خلـنـــا نسـلك طــريق المهتــديــن

لاتــودينــا لــدار ٍ بعيــــد عمــــوقهــــا

قال انا العشاق واعرف أسلوب العــاشقيــن

وأعرف رجـال الــولــع مــن صــدى منطـوقهـا

وأنت واسمــك الهـــوى مثــل وســم الاوليــن

والعــذوق الصــفـر لـو شفتهــا مــاتـذوقهــا

قلــت مـوهـوب الفطـانــه منطـوقك ثميـن

واللــه أعلــم كـان امانتـك صنــت حقــوقهــا


دار فـكـري معــه مـاعــرف شمـال ٍ مـن يمــيـــن

مرهـب العشـاق متجاهل ٍ بحقـــوقــهــــا

ثــم روح سـالم ٍ ماكنــه مـن المذبيــــن

مادراى أنه محـدث ٍ بــلبــلاد وســـوقهـــا

ليتنـي يابــومحمـد لهــن مثــل الاميــن

وكـل يــد يابـومحمــد يـد اللــه فــوقهـــا

وليــت من يختــار فيهــن بشــرع المـرسلـيــن

ياخذ اللــي كنـهـا الــريـم فــي مــرموقهــا

يـوم تمــشي تنـور الارض زيـن فـوق زين

بنت من يخلــي ســروج الخيــل مما فـوقهــا

مايزوج من تلبــس بثـــوب الميــــتيــن

طاقة ٍ لفــة علـى الاســرار وبيـن أطروقهـــا

كنهــا في طابق ٍ غلـف عليها ماتبيــن

بيــن ربح وخـاســر ٍ لارفـع طــــابوقهـــا

والصقــور أتخــضع مــن حكـم رب العالميـن

لـو تصيـد القـايـده تنـحــرم مــن ذوقهــا

وأعــذاب القــلب وحــوســة مــريــره

منــك ياللــي لابــس اللبـــس الحضــاري

يــوم عرضلـي وشفتــه فــي مسيــره

راح قلبــي راح مــاهـــو بختــيــاري

لابس ٍ لبـــس الحـــلا زاهــي نظيـــره

شايف ٍ نفســـه عـلى كــل العــذاري

عنــق ريــم اللــي دهــل راس العسيـــره

ماهقـى القنـاص صيــده بلمــذاري

عـن وصـوفـه قلــتلي بلامـر خيــره

وأستطيــع أقــول نايفــهن أجبــاري

قبـل شــوفــه حبهــن صــافي غــديــره

ماطــراى ليـه مـن الهــاجـوس طاري

فـز قلبي فــزة اللـي هـــد سيــــره

فــز يــوم أنـه طـلع جـول الحبـــاري

من كفــوف اللـي يحكمـون الجــزيــره

أطلقــو سيــره وللمطــلاع ضــاري

صيــرمـي ٍ لانحــدر يرعـب صفيــره

حــر ماهـو مــن ســلالات الوكــاري

نومـس اللـي ينقلــه وأسعــد نظيـــره

في فياضٍ وسمهـــا يمــــلا الخبـــاري

ياهل المعروف ضاع الطيب ضاعي=كيف نسلك مع رجال ٍ يدفنونه
فاتحين أفميهم مثل الافاعي=بالرداء والخير صارو يمنعونه
رجلهم حريف في خبث المساعي=عن طريق الحق سد الله عيونه
لو تباهى بالوفاء شين الطباعي=تؤمن الحيه وهو مايايمنونه
دعوجي ٍ له سلوب ٍ بدواعي=يوهم العقال لين يصدقونه
عنده أن النصب والحيله متاعي=مع رجال ٍ تجهله مايعرفونه
للعمامه لبسهم مافيه داعي=والعقال اللي يميل يظلمونه
ليت لطيب وسام ٍ مايباعي=مانزل بسوق ولا يعرضونه
تقصر الرديان عن لبسه مقاعي=وتفرق الطيب علامته ولونه
قول لاهل الطيب لوح بالوداعي=لو يموت الطيب يوم يودعونه

قال الذي قدمه الاحداث منظوره=واخذ بعقله وفكره عبرةٍ فيها
دنياك ماعاد فيها خير ممروه=لو تسهر الليل تبي ذوق حاليها
تعطيك حلواٍ قليل ومر بجذوره=وتعافها كلها اولها وتاليها
حل الطمع وابنة جدرانة وسوره=كلن يبى المال والحيله يسويها
الاخو حاسد لخوه ورايه وشوره=حتى النصيحه عنه وده يخفيها
والجار حاقد على جاره ولا يزوره=متجاهلٍ بالوصيه من وصيها
وابن الشيوخ انحرف عن دينه وطوره=يسن له سنة ٍ ماحدن مشى فيها
وأكثر رجال الزمن كالفلم والصوره=تشوفها وانت مالك مصلحه فيها
والنفس تقتل بغير الحق مقهوره=تقتل على دينها في عمق ارضيها
ماتشوف مايسعدك في دورة الكوره=ياكود دمعة يتيم ٍ في مجاريها
لايازمان طمع في الذيب عصفوره=فيك الثعالب مبينة ٍ تحديهااا
تاكل بالانياب والافعال مستوره=تاكل وتدفن توالي السور بيديها
والحق غطوه لين أنه طفى نوره=في حجةٍ ماتبين عند قاضيها
ياشاهد الزور فيك الناس مغروره=تشهد على حجة ٍ مالك خبر فيها
حاسب ضميرك ترى الخطوات مقصوره=مانت أول الناس موت ولا أنت تاليها
قل الرحم والمواصل وانتهى دوره=كن الاوادم مليك الموت ناسيها

عسى خطاياي يالله منك مغفوره=ذكرت ماشفت وانت اعلم بخافيها