قصيدتي في حفل تكريم الشيخ/عوادبن دهيرم الاحمدي الحربي

بسم الله الرحمن الرحيم

بسم الله اللي عالم السر والغيب= قصيدةٍ باسم الولي مبتداها
من بعدها مليون مليون ترحيب= عنّي وعن ربعي وفي ملتقاها
ترحيب للجمهور ربع وأصاحيب=من شاعرٍ جزل المعاني نقاها
احامده حنّا بعاد المحاضيب = ونفوسنا وضح النقاء من نماها
من صخر ولاّ من صميد النواجيب= ورجال صادق يحفظ الله نباها
ورجالنا عند المهمات ما تغيب = متشاركين بمرّها مع حلاها
من حرب حنّا من كرام المناسيب = الغانمين الفايزين بجناها
الراسخين الظاهرين الغواليب = بين القبايل عاليِ مستواها
حرب العريبه هم زحول المعاطيب = بيض الوجيه الله يحيّي نماها
هم حصننا يوم الليالي لواهيب = ماخاب منهو بالشدايد نخاها
تاريخهم بالمجد سوّا الاعاجيب = فيها الفخر من زود الاعجاب جاها
لطّامة العايل كعام المغاضيب = بشلف الحراب اليا بغت من صلاها
فيها الرجال اللي تسن المخاليب= يلقى الكرم والجود منهو نصاها
من سالم ومسروح شفنا الاعاجيب= عند الشدايد جمّل الله عطاها
بصعب المواقف جامعين الاساليب= ينهونها لو هي صعيبه قواها
اليا افتقوها بالقنا والمشاعيب = كم فارس وخيّال يلحق وراها
يومٍ كلِ بوقت عوج العراقيب = لو راحت الاعمار قالوا فداها
صوله وجوله شرقها والمغاريب = واللي يعرف إصقورها ماشتواها
واليوم عواّد الوفاء منبع الطيب= كل المراجل نالها واحتواها
ابن دهيرم مابها شك او ريب= درب الفضايل بن دهيرم مشاها
يرقى كما يرقى على المرقب الذيب = ويمناه دايم بالكرم ماثناها
في مجلسه تلقى جميل التراحيب=اللي تنومس كل منهو لقاها
نرفع له البيضاء حميد العواقيب=وطيب الفعايل عند ربي جزاها
حتّى عياله بالمكارم مهاذيب=مثل النجوم العاليه في سماها
صقور حرب اهل السيوف المحاديب= اللي تقلّط للنشامى قراها
ولا هانت رجال الوفا والاصاحيب =عند اللوازم بانت بمحتواها
ومنا نويشي بدون شكٍ ولا ريب = كلاٍ يعرف أهدافه اللي رماها
ومنّا البلالي قصته دوم ماتغيب=قصّة وفاء للكل ياصل صداها
ومنّا ابن ولمان في ساعة الريب=كل المخاطر يوم ثارت وطاها
وابن جزاء وقت الليالي المصاعيبب= كاد العدو وعيونه ربعه رأها
وزيد الفضيلي يوم جات النواشيب=اديار ربعه بالفرنجي حماها
شيخٍ معرّب ماضيٍٍ له تجاريب= في ماضي الازمان كلاً قراها
ومحسن و اخو جوزا صقور المراقيب=افعالهم طول الزمن مامحاها
ومنا الذويبي يوم لبّا المطاليب= يطلب مصالح ديرته من غلاها
وابن نحيت اللي به الظن مايخيب=كم من قضيه بين ربعه نهاها
ومنا ابن ناحل كريم المعازيب= من جزل فعله جيلنا ما نساها
وصلاح ابو صالح وفيّ المواجيب = روس المعالي بجزل فعله رقاها
حربي زبالي من كرام المناسيب =نسل الصقور اللي بعيدٍ مداها
فعايله تطلق حجاج المناديب= وكم راس أعتق قبل تلقى قضاها
من دون قاصر في طوال الاشانيب= وكل القبايل والنعم في لحاها
ومن ما شرا للمرجله قبل لا يشيب=يقضي حياته كلها ما اشتراها
والطيب باقي والليالي دواليب=وكلٍ يموت وحاجته ماقضاها
وحنّا لأل سعود درع وحواجيب = على العهد والدين نحمي حماها
وعداد ما تبرا الجروح المعاطيب = وعداد مابالكون من حجم ماها
صلوا على اللي شال جثّة جليبيب = قصة صحابي ابن مالك رواها

ناصر بن مصلح الاحمدي

تسجيل تواجد في منبر الجزاله
صح لساانكـ
بيض الله وجهك

صح السانك لاهنت
وبيض الله وجهك

	المشاركة الأصلية كتبت بواسطة الحب الباقي

	تسجيل تواجد في منبر الجزاله صح لساانكـ بيض الله وجهك

صح بدنك ووجهك ابيض

شكرا لك ولمرورك العذب

	المشاركة الأصلية كتبت بواسطة نديم المجرة

	صح السانك لاهنت وبيض الله وجهك

صح بدنك ووجهك ابيض

شكرا لك ولمرورك العذب

الشاعر الجزل
ناصر مصلح الاحمدي
صح لسانك وعتلا شانك
قصيده جزله
والشيخ عواد الاحمدي
معروف بالدين والاخلاق النبيله وبحسن الجوار
ويستاهل التكريم

الشاعر القدير ناصر الاحمدي صح السانك ويستاهل التكريم والمدح الله يعافيك

	المشاركة الأصلية كتبت بواسطة سعد المحمدي

	الشاعر الجزل ناصر مصلح الاحمدي صح لسانك وعتلا شانك قصيده جزله والشيخ عواد الاحمدي معروف بالدين والاخلاق النبيله وبحسن الجوار ويستاهل التكريم

صح بدنك يابو تركي وسلمت كلك يابن العم

شكرا لك ولمرورك العطر وكلامك الجميل

	المشاركة الأصلية كتبت بواسطة فايزموسى البشري

	الشاعر القدير ناصر الاحمدي صح السانك ويستاهل التكريم والمدح الله يعافيك

صح بدنك يابن العم وسلمت كلك حفظك الله

شكرا لك ولمرورك العطر وكلامك الجميل

صح الله لسانك
ولاهنت
وسلم فكرك وبنانك
دمت برعاية الله وحفظة