ياليت شعري ينفع اليوم ياحمود ......... قصيدة ورد

بسم الله الرحمن الرحيم

سر ياقلم وابذل مع الفكر مجهود=عطنا القوافي لا تناظر عددها
وجّه كلامك يم ابو فارس حمود=الشاعر اللي للجزاله اسدها
ذاك الصديق اللي حوا الطيب بعقود=كل المراجل في صفاته حصدها
قل له صديقك من قسى الحظ ملهود=نار القهر من لين عوده وقدها
ياليت شعري ينفع اليوم ياحمود=ماغير أسلّي نفس عافت نكدها
وياليت شعري يجلي الهم ويجود=وتبرا جروح(ن) جوف صدري ضمدها
لبني قصايد مالها عد محدود=واحفظ قواعدها واثبّت عمدها
وآتلّها تل المواريد للذود=يسمع صداها كل منهو وردها
يدرآبها ناس(ن) مجاميع ووفود=يسلآ بها منهو لسانه نشدها
ومن زود ما بالقلب من شوق ياحمود= سالت مدامع من عيوني رفدها
ما عاد لي بالوقت احساس أو فود=تمشي الليالي كن شي(ن) طردها
غايب ولكنّي مع الناس موجود=أدوج فالدنيا وماني ولدها
غديت كنّي بين راحل ومطرود=يَسري وروحه بالهاوجس لهدها
كم كنت بالماضي بالافراح موعود=والعمر يمضي ما لقينا وعدها
ان جيت أدوّر للسبب ضاع مجهود=مابين ليه وكيف نقوا جهدها
يالله يا منشي هماليل ورعود= تلقى حياتي بزود فضلك سعدها

ناصربن مصلح

الرد من الشاعر حمود بن سعد الحربي (ابو فارس )

يامرحبا ترحيبتةٍ تمشي سنود = مثل المزون اللي ترزّم رعدها
ولاّ كما الطيب الذي بازرق العود = بين الرجال اللي تثبّت عهدها
يابو مشاري جاني القاف مسنود = من شاعر(ن) جزل المعاني وجدها
هيّضت فكري بعد ماقلت ياحمود = نخوتك للصاحب هذي ويش بعدها
يمناي للي مثل شرواك ممدود = والرجل ماتقصر عن اللي قصدها
افزع معك لو ثار بالجو بارود = ارجال تنخاني تراني سندها
لو نهدي اللي لامشت باول الذود = ذلول سمحه فوقها طول يدها
وان كان تشكي ظلم من شخص مقرود = لابد من يوم الزمان يهجدها
عسى الذي يظلمك يرقد بعبرود = من بندق (ن) تو ورّدت من بلدها
وان كان تشكي من عنا الوقت موجود = قبلي وقبلك ناس هم اظطهدها
على ظروف الوقت ماعندنا شهود = ولافيه قاضي للهموم وكبدها
كلاً على مايملك اليو م محسود = والناس شين اخلاقها من حسدها
اليا وردت انزل على طيّب عدود = وابعد عن رسوس الضما لاتعمدها
واطلب من الله عنده الخير والجود = يكفيك نكبات (ن) كثيره عقدها
يوجد ليالي بيض والباقيه سود = لعل حضك بيضها عن سودها
عسى الوناسه عندك تحل وتعود = وأفراح دايم كن ماحداً فقدها

تسجيل تواجد في منبر الجزاله
صحت السنتكم
والله يـعـطـيـكم الـعـافيـــــــــــة
بيض الله وجيهكم

الشاعر ناصر بن مصلح الاحمدي
صح لسانك وعتلا شانك
وصح لسان الشاعر حمود بن سعد الحربي
الله يبيض وجيهكم الجميع

كلام جميل
سلمت.

	المشاركة الأصلية كتبت بواسطة الحب الباقي

	تسجيل تواجد في منبر الجزاله صحت السنتكم والله يـعـطـيـكم الـعـافيـــــــــــة بيض الله وجيهكم

صح بدنك ووجهك ابيض وربي يعافيك ان شاء الله

شكرا لمرورك وكلامك الجميل

	المشاركة الأصلية كتبت بواسطة سعد المحمدي

	الشاعر ناصر بن مصلح الاحمدي صح لسانك وعتلا شانك وصح لسان الشاعر حمود بن سعد الحربي الله يبيض وجيهكم الجميع

صح بدنك ووجهك ابيض ان شاء الله يا شاعر حرب

شكرا لمرورك العذب وكلامك الجميل

	المشاركة الأصلية كتبت بواسطة تكفيني الذكرى

	كلام جميل سلمت.

يسلم غاليك والجميل هو مرورك طال عمرك

شكرا لمرورك اخي الفاضل

صح السانك وبيض الله وجهك

صح الله السنتكم
لاهنت

شاعر القدير
ولاهان منطوقك

ناصر بن مصلح الاحمدي
و
حمود بن سعد الاحمدي
صحت الالسن وطابت القلوب
والله ماشاء عليكم كلام جميل وصوت وصدي
راقت لي كثير هذي المساجله