ديـوان الشـاعـر.../ مـضـحـي بـن جـمـران الـحـربـي.

الا يامهجرس من غثاء النت انا مليت=ولولا رجالٍ مثل شرواك كبيته
لامنك مدحت الطيب اللي صنع له صيت=ردي البخت يزعل لياشيدو صيته
يجي مثل منجوم الضحى كنه الخرتيت=يحاسبك كنك مجرمٍ طامر بيته
وانا يالشدادي مثل مانته بليت ابليت=بشخصٍ عكس سيده وجاء مطفيٍ ٍليته
قليل بحقه كان سميته العفريت=امجمع عفاريت البشر مع عفاريته
من اللي هواهم قبست النار بالكبريت=ودايم بجيبه ولع ناره وكبريته
يعيد ليامنه على النار صب الزيت=لياشافها خفت سكب فوقها زيته
مبوز تقل مسقاء من الصبر والحلتيت=قلاصٍ مزود حب صبره وحلتيته
يابا الفيت ماغيره رياجيل يابا الفيت=ودايم وعنزه يامهجرس مخاويته
وانا لو اعرفه مع هل الملتقى ماجيت=ومتصفحٍ به قاصر الشبح ماجيته
لو الله بحقه مااذكر اني سبق واخطيت=ومن فضل ربي ايمن الدرب ماخطيته
ولا مره المعروف في حضرته سويت=لاانه بغير اهله خطا كان سويته
مالومك ليا منك عن الملتقى صديت=ليا شفت به من يدبل الكبد خليته
ليا ضيقو صدرك دفوش البشر صكيت=بوجه الدفوش مودي العلم صكيته
ولا لك بغرات العرب حيها والميت=ومن لااحترم حييه ماهو محترم ميته
لكن السنافي منك يكفيه لاهليت=وكلمة هلا يامرحبا منك كافيته
ويدمح خطاك اللي بداء منك لازليت=يراعى النشاما والنشاما مراعيته
وهذا الزمن لاقال فيه الحكيم ازريت=تحيرت مع ناسه والاشكال مانهيته
صدق والخطا يقول راعيه مارضيت=ولاهو براعي حق ويموت مارضيته
وفي منتهى قولي على المصطفى صليت=شفيع امةٍ في ساعة الهول داعيته

الرد



رد الشاعر الكبير /دليم بن مرزوق الشدادي الحربي (مهجرس الحرف)

الا ياصحيبي يوم غنيت وش ضنيت=اكيد الوفاء حيث الوفاء فيك ضنيته
وعلي الملامه كان صديت مارديت=وانا الصدق ابن جمران لله حبيته
أعزه معزه لو مارحت معه وجيت=على شان ذكره يطلق الوجه عزيته
والا ياهجوسي جمليني اليا غنيت=ابا اشكوي اللي ماسبقلي وشكويته
رفيقٍ شكالي دبلة الكبد عل وليت=اجاريه باللي حسب عرفي توريته
وعلي ابذل المجهود والبيت مثله بيت=توفقت والا شرهته لو تناسيته
وانا والله اني لوتقصيت ماداويت=الهودٍ بابن جمران بالصدر شاويته
قبس نارها الخرتيت واخطاء الدليله هيت=على غير يمه عنز خبل مسريته
تخمه على مدحت هل الطيب بالتشميت=تغيضه فعول الطيب من غيرحاشيته
وخبول البشر تشبه سلاحٍ بلا توقيت=سلاحٍ يثور بدون عبرود من كيته
على ماتجي يقبعبها كيت والا كيت=غشيمٍ على نفسه يثور دناميته
وترا سبيت ماله بيت ياللي تعرف سبيت=ولوعاش بين الناس ماحدٍعرف بيته
ورجلٍ يغط النور ماحدٍ يقول اقديت=تعود على راسه ولوكان مخطيته
يصح الصحيح وتعرف الناس ويش كميت=واهل امراه طار كميت لأسباب كاميته
وتبى الصدق بعض الصد حكمه اليا صديت=لقيته وغيري ناس بالناس لاقيته

هذه الكلمات من مرسلاتي بجهاز الارسال مثل الكنود والايكم مع اهل الابل عندما ربعو بضواحي الخفجي وكان لنا موجه خاصه نتراسل معهم كل ليله ونتسامر معهم وكانو نعم الرجال وعلومهم كلها طيبه الله يذكرهم بالخير وكان اكثرهم من الروقه ومن ضمنهم ضيف الله بن ملافخ الروقي وزيد بن سعود الغربي ومجموعه اهل ابل اخرين وعندما صرم العود تنادو بالمسناد لنجد وارسلت لهم هذه الكلمات اثناء تواجدهم

والله انه مايدله خاطري لاضاقي=غير ازور الموجه اللي نارها مشعوقه
حبنا لاهل الوفاء حبٍ من الاعماقي=ولانود الاعزيزٍ طيبات عموقه
السنافي طيبٍ للطيبه تواقي=طيبته زادت وجادت بالوفاء منطوقه
والله انا لو نفتش قلبه الخفاقي=مانحصل غير كنز الود في صندوقه
يذكرون المشعلي ون يبست الارياقي=الدواء في ساعته كلٍ طلب مسحوقه
من شيوخٍ سيفهم في المعركه حلاقي=لحيةٍ يهوي عليها عدها محلوقه
والمسافر مايهون وحضرة العملاقي=نادرٍ جاب العشاء لالحقوه سبوقه
وابو زيد الشاعر اللي هيض العشاقي=وشاعرٍ ويهيض اللي يستمع طاروقه
محارب الزله يجر وغربل المشتاقي=هيضه واخلج من اسبابه لديرة شوقه
من تغيب ماسمع له لستمع لراقي=قام يسر الود من جسمه لكل عروقه
وابو خالد دايمٍ للطيبه سباقي=اقصد الروقي هذاك اللي رفيعٍ ذوقه
نعم بالحدباء وله مني جزيل اشواقي=فارسيٍ صيدته لو اصرمة ملحوقه
والجدي نجمٍ يبين ان غابة الاشفاقي=من تقدا به يدل وخلص الله عوقه
مبعد الهقوه وراء هقوات من به هاقي=مركزه راس السنام اللي تعلا نوقه
وراعي الوضح المضيحه زينة الاعناقي= تقدم ابله للحيا تسبق على زملوكه
وكل طيب ماعرفته واجبه فالباقي=وكل وافي عند وافي ماتضيع حقوقه
من نوادير المحطه نقطف اللي لاقي=وكل جزله غاليه والغاليه معشوقه
جعل يفداهم خطاة المزلج المطفاقي=يالله انك لاتعز العالم المطفوقه
مايغث الموجه الا الطربق الطرباقي=يرعد ويومي براسٍ جعله الطابوقه
لعترض ياجعل قدمه يعرض التفاقي=بندقه مضرب سهمها احجتن مفروقه
البلا وان سندوا واقفو عن الحداقي=عن ديار اللي على الشاطي يرب شدوقه
ياهل البل ماتبون لذودكم سواقي=دون شرط ودون فيزا وكل نقل يسوقه
يحترق لرعد سماها والعج البراقي=في المدينه بس جسمٍ فاقدٍ معلوقه

مساجله بيني وبين الشاعر القدير /خالد عبيد بن معتوق الاحمدي وكان المبدا منه وهذا مبداه ويليه ردي عليه

عندي طلب بطلبك ياطير شيهـان=ياسايح ٍ بالجـو عـارف حوالـه
خذ هالرساله دام نور الضحى بان=شمالك الشرقـي توجـه عجالـه
مخبور بالخفجي لنا خير صدقـان=رجل ٍ يزيـد المـد للـي وفالـه
اللي ورث عادات للجود واحسـان=من شايب ٍ مبـداه نهـج العدالـه
مامات من خلّف مثل صار عنوان=للي معقّـب فـي عيالـه رجالـه
ياطير مقصودي على ذيب سرحان=له فزعة ٍ يشهد بها مـن شكالـه
مضحي ولد جمران مرحوم جمران=والنعم في مضحي ونعـم بخوالـه
كسابة النوماس فـي كـل ميـدان=بني عمر قـوم الوفـا والجمالـه
ياطيـر لامنـك تلاقيـت ذيبـان=قبّل حجاجـه قبـل مـد الرسالـه
مكتوب له فيها عن الحال تبيـان=من عندنـا يبـداه لفـظ الجلالـه
مشروح به في قول موجز ومليان=علم ٍ يبيّن صاحبـه كيـف حالـه
الاوله حالـي بهـا زود نقصـان=كنه قصدني سحر صاحب دجالـه
اللي يعينونه علـى فعلـه الجـان=راع العقد والنفث لا طـاب فالـه
وانكان عاش الوقت في خير وامان=يوم القيامه يبتلـش فـي غلالـه
والثانيـه بالـود مانـي بنسيـان=الصاحـب اللـي مالقينـا بدالـه
غرو ٍ وعدني بالصفى صار خوّان=واليوم يعزمني حضـور احتفالـه
والثالثه موقـف يخليـك حيـران=لنّك تضنـه علـم فيـه استحالـه
وشلون صدقاني يصيرون عدوان=وما صابهم مني قصـور وجهالـه
ودامي كتبت الخط للـرد شفقـان=عجّل ترى صاحبك صعب احتماله
وصلي على نور الهدايه والايمان=اعداد سوّاح البشر فـي صلالـه

الشاعر / خالد بن عبيد بن معتوق ألأحمدي

اهلا هلا واعداد هتان الامزان=بخطٍ لفاني واشقر الاريش شاله
يالحر الاشقر بس لحظه على شان=اخذ المرد وجعلها لك سهاله
مردود مرسول السنافي بليهان=بعد قريته خوذ ردي بداله
واسلم وسلملي على هاك الاركان=وماتحوي الفقره من اهل الاصاله
امن الرجال اللي تنومس بالاكوان=احامده لاعدو اهل الشكاله
افعالهم عن كثرة الشرح برهان=يوم الجزيره بين حاله وحاله
اللي حمو في شذرة السيف شامان=مهيوب ياضلعٍ سباعه بجاله
راياتهم بيضٍ على راس مابان=ومحصلين البيض في كل حاله
لاهنت ياخالد سلايل كحيلان=اللي كتب ربك على العبد جاله
والله يجيرك من بلا سو ماكان=والشر عن شخصك يعجل زواله
واللي يلومك في هواء خدر الاعيان=في سوقهن ماعمره اتعب رحاله
الود قد لوع مغاوير شجعان=وياما شكو سيفه رجال الشكاله
مابه كلام لخرس الاعيان سلطان=وحكمٍ ينفذ جور وإلا عداله
وإليا برك يشتال الاثقال شقران=والثقل ماهم الجمل لارتكاله
النفس من خالف هواء النفس ربحان=ومن العناء يالقرم يرتاح باله
لان السلامه ماتقدر بالاثمان=والرجل يشري راحته في حلاله
واحذر تصاحب لك من الناس منان=وبغير اهلها ماتحط الجماله
السن يضحك لكن القلب وجعان=يمن لو قدم عليك البياله
والصاحب اللي مايشارك الاحزان=لاطحت قال الهيس مالي وماله
من لايجازي راع الاحسان بحسان=العيد مع فرقاه ناظر هلاله

الشاعر/ مضحي بن جمران الحربي

================================================== ================================================== =====================