رساله رمضانيه..

هاك الرساله ماهي بحبر الأقلام=ولا بالبريد اللي يوزع حموله..
من شاشة الجوال بزرار الأرقام=نرسل وتاصلك البيوت بسهوله..
بأول ليالي شهرنا اللي من العام=نرقب مع الأشواق لحظة وصوله..
شهر رمضان ورابع أركان الأسلام=بعد حلوله.. مرحبا في حلوله..
لك التهاني كثر مابالحرم حام=حمامن أمن بالسماء وبنزوله..
حظك عساه من الليالي والأيام=صالح عملك.. ويكتب الله قبوله..
الناس بأيام الشهر راحوا أقسام=كلن على سكه.. ويشعب ذلوله..
أحدن يصوم وليله أذكار واقيام=على كتاب الله وسنة رسوله..
وحدن يصوم الاعن الهرج ماصام=عرض المقفي لازمنه يطلوله..
وحدن تقدم فالتراويح قدام=رجله على درب المساجد عجوله..
لاكن تراخى بعد ماكان مقدام=طاوع هواه وطاع نفسن ملوله..
وحدن اتبين الشمس وتغيب ماقام=لياحزة المغرب وهو في خموله..
يصحي على شاشة تماثيل وأفلام=مع قصة المخرج ودور البطوله..
وحدن لبس ثوبه مع شماغ بسام=يلف وسط السوق ستين جوله..
كثرت مشاويره على مجمع أحلام=لوك تشوفه تحسب المول موله..
ماني على دار الفتاوى والأحكام=هاجس يراودني وحبيت أقوله..
المملكه تنعم تحت ظل حكام=أختاروا القران دستور دوله ..