الرأس تبقى عزته بأرتفاعه

بسم الله الرحمن الرحيم

السلام عليكم ورحمة الله وبركاته

هذه القصيدة تعبر عن نفسها , أرجوا ان تحوز على رضاكم واستحسانكم

يابدر حنا نجازي الطيب بالطيب=وإلا الردي تكشف فعوله قناعه
حنا على فعل الوفا نشب ونشيب=ميراثنا من قبل سن الرضاعة
نتبع سلوم مكملين المواجيب=منهج شرف لنا الفخر بأتباعه
يابدر مابالصبر لوم وعذاريب=اخوك حلمه يقف دون اندفاعه
جمل وأشيل الحمل مع شمّخ النيب=ولاقلت مالي بالحمول استطاعة
صبرت يوم الصبر خصلة من الطيب=والصبر في بعض المواقف شجاعة
ماني زبون لكلمتن مالها غيب=وعن ردها أملك عز نفس وقناعة
زبونها اللي يخطي العلم ويصيب=يردها بأسلوب خبث ولكاعة
أمشي اللي ماوراها مطاليب=لجل العتب مرفوع بين الجماعة
والله ما ادنق في هروج الأكاذيب=الرأس تبقى عزته بأرتفاعه
وبالسيف ما أنطح شايلين المشاعيب=مادام خصمي علته في دفاعه
لجل الجنون ليا أروحت ريحة الذيب=بقلوبهم ماللمواجه مناعة
الناس منهم ماسلم نوح وشعيب=ولا ارضاهم الرسول راع الشفاعه
وركضٍ ورى هرج القفاء يعتبر عيب=ياكاسبين بهالمجال البراعه
خلو كلام مدورين العذاريب=المجتمع تكاتفه باجتماعه
لاتشتقون بهرج شذب العراقيب=اللي يروّج مصدره بالأشاعه
حرّيف يوم يودي الهرج ويجيب=أسرع من إعلان الخبر بالاذاعه