مشاكسة شاعر (مساجله).....

قيل لي نايف الجربوع شاعر وما يقصد حركه قلت كيف؟
قالوا انت ملك الالغاز هات له الغاز وكانوا يسممونني بهذ اللقب فلما سمعت
هالمدحه ملك الالغاز .. فيها نفخة راس وانا انبري واقول:.
ـــــــــــــ

ليازان جوي للتماثيل واشتقت = قلت الكلام لمن يثمن كلامي
اللي من حسن نيته كد تحففت = ويجيب مقصودي ويفهم مرامي
يابو طلال العلم لك لاتعوقت =بعد التحيه مع جزيل السلامي
والمعذره كان بكلامي تطرقت = لاشيا بعيده ياعزيز المقامي
وشهي عجوز في عصبها تعلقت = خاشرك فيها المغربي والتهامي
تزينت لك وانت فيها ترفقت = قسي الحديد ولين ريش النعامي
وانشدك عن شي يجاملك لو بقت= اسود سواده مثل ليل ظلامي
ليا طردته عن محلك توفقت = وان حل في دارك يمشيك عامي
وكنز جمعته يالسنافي مع الوقت = خلاك لك بين الرجال احترامي
انفق منه ماهو بينقص لو انفقت = حتى ولايمكن ينوله حرامي
وانشدك عن شي بعد فيه برقت = يمرّويقفي مثل حلم المنامي
ان شفته مشرق فانا معه شرقت= وان طال يقصر والركايب ظوامي
وويش اللذيذ اللي تعرفه وله ذقت= ومن عاش ذاقه من جميع الانامي
وعن كاذب غشك ياليتك ماصدفت =ومن صدق الكاذب ماظنه يلامي
ياللي بتفسير المعاني تعمقت =وشالذي من وين ما سرت امامي
ووشالذي لو فيه بالفكر دققت = تلقاه ميت حي باردوحامي
ماتمسكه لو للخضيرا تسلقت = ويحتاج له من عاش حتى النيامي
تم الكلام وهات من حل ماطقت = واسلم رعاك الله يابن الكرامي

ــــــــــ 16/10/1410هـ
سلمته الورقه قراها وابتسم وحطها بجيبه وبعد يومين سلمني الرد وفيه :.
لاتقراه لين تحاول بالحل.......
{
{ـــــــــ
نايف بن جربوع الطريسي قال:.
ــــــــ

حي الجواب اللي بعيد عن المقت = عداد ما يمطر حقوق الغمامي
جاني جواب له معاني وفرقت = بين المعاني بعدماصار امامي
كلامك اللي ياعلي به تنطقت = باهداف مخفيها عن عيون رامي
وان لحل الغوز ابن زيد نسقت = بين القلم والسطر بعد اهتمامي
وبديت احلل بالمعاني ووثّقت = بغرب وشرق ومن جنوب وشامي
الاوله دنيا تزين وعاشقت = فيها الحياة بحب ماهو غرامي
وللي يفسد في محلك وله لقت = ذاك الجهل بقلوب ماهي فهامي
والكنز ياللي في شداده توسقت =هذاك علم وصاحب العلم سامي
والرابع اللي مع مسيره توهقت = عمر الفتي عام مضى عقب عامي
تشرّق معه باول شبابك ليارقت = وركايبه عدة اسنين حطامي
والخامس اللي وصط بحره تعمقت =النوم لذه للعيون النيامي
والكاذب الغشاش من بعد مافقت = هذا الامل والا خيال عدامي
والسابع اللي يسبقك كان سابقت = الشوف مع مستقبلك يالقطامي
والثامن اللي باربع اوصاف طبقت = ذاك الهواءللروح قبل الختامي
وان ترى مع مع موكب الغازك الحقت =لغز ولاني عنك بالعلم كامي
وشهو رفيق رافقك وانت وافقت = صامت مطيع مايرد الكلامي
لاشك مايفزع بضيقك ليا ضقت = وليا رفعت احسام يرفع حسامي
هذا وانا عن لازمك ماتدرقت =ولاني عن اسرار الطبيعه محامي

ـــــــــــ
ادركت المطلوب ولغزه يقصد الظل وصح لسانه

صح لسانك مليون على القصيده
والله يعطيك العافيه
بيض الله وجهك

صح لسانك يابوخالد وصح لسان نايف الجربوع

قصائد رائعة استمتعت بقراءتها تحمل الغاز ذكيه جدا

اشكرك على اتحافنا بها وتعطير مجلسنا

صح لسانك يابوخالد وصح لسان نايف الجربوع

ماشاء الله وتبارك الله عليك يابو خالد موسوعة للألغاز

الله يحفظك ونايف الجربوع كذلك

اصح الله لسانيكما وادام عزكما

الحب الباقي
عبدالله الفريدي
بخيتان البشري
اشكركم مروركم يشرف وتاييدكم يمنح الثفه دمتم وسلمتم من كل شر