ردي على الشاعر الخلوق / صقر المراقيب

((خالد بن عبيد بن معتوق ألأحمدي ))صقر المراقيب

مادمت من ربع ٍ مشاكيل وقـروم= دخيلهـم يبشـر بامـان وحميـه
نشكي عليك الحال ياجيـد القـوم= رجال منصف ماتجيـب الخطيـه
ياحسين دنيانا بها طبـع مشـؤم= لو سرتك يوميـن تبكيـك ميـه
من عاش فيها ثم ماقال محـروم= اكذبـه لوهـو عزيـز ٍ علـيـه
سبعين بالميه من الناس مضيـوم= ذولا ضحايـا ودّ بيـن البـريـه
كم غربلتني من عداوات وهمـوم= وكم بيحت لي من سـدود ٍ قويـه
ضاقت عليه كنهـا درب بالعـوم= ثـم كشـرت بالنيابهـا والثنيـه
في درب مسبوره ومزروعه لغوّم= من ناس ردة فعل الاحسان سيـه
والوقت مايبقى من الطيب معـدوم= لو كان فيه اجناس قشـران نيـه
واللي يساوي صقر شيهان بالبوّم= هذي غشامة قلـب واكبـر بليـه
والله يجيرك من شقا ضل يحمـوم= في يوم جمع الناس مافيـه زيـه
والخط ما جالك على ضرف مختوم= في منتدى واضح بشاشـه نقيـه

((حسين شامان المعمري))

جاني وأنا أرحب بكم دايم الدوم=وايضا على قافك ندق التحيه
أهلا هلا بإعداد ماشالت غيوم=فيك أنت يا خالد زبون الونيه
تشكي علي الحال والحال مقسوم=وأنا لقيت الناس تمشي سويه
دنياك يا خالد مقاسيم وسهوم=دربين والخيره وراهن خفيه
كم لبّست عشاقها ظافي هدوم=ياسرع ماتسلب ثياب العريه
ماظن تخدع مثل شرواك شغموم=والعز كنز أهل النفوس الابيه
والسوق ماهو يافتى الجود محكوم=فيه الفروق اللي من أول خفيه
وانته وأنا فالطيبه نفرق السوم=وزن الذهب بغرام وإلا وقيه
والله مالوم اللي من الوجد ماسوم=جتني طواريقه جداد ونديه
قلت اتركوا خالد ولانطري اللوم=اللوم قسم اللي يخلي خويه
ولفك نجيبه لو تتقى مع الروم=خذني وانا معكم على كل هيه
معنا سيوفٍ مابها حد مثلوم=وان عودت فتنه لنا المقدريه
وحنا سندك إن بانت القوم للقوم=من بيننا الفزعات طبع وسجيه
والله يبيحك عد ماينبت الدوم=وإعداد ماخطت حروف ابجديه