على رجم الاحزان جالس لحالي ،،،،،

على رجم الاحزان جالس لحالي
وهاضت هجوسي على وضع حالي
قضيت العمر بين مُرن وحالي
ومُر الليالي مع العمر زادي

بلحظة اتذكر ولحظة اتصبر
واجبر واكسر واكسر واجبر
ولا هلت العين أهلل واكبر
واداري دموعي واجامل فؤادي

لقيت المفارق طعونه قوية
ليا حل فالروح ماهو شوية
كما الرعد فالصدر حزة دويه
ولو تظهر انك مع الناس عادي

عسى جنة الخلد لك ياشجاعي
بعد فرقتنا ظروف الوداعي
تبات الخلايق وانا الليل واعي
وحزن المفارق على الجو سادي

وفرقى المحبين لاجات فجعة
ولا عاد فيها مع الوقت رجعة
لها طيف عايش ولا غاب سجعه
بعد مات يزحم عليه وينادي

فلا دمع وقّف ولا نوم طابي
وحاولت أميز خطّاي وصوابي
لقيت الصبر والرضا للمصابي
علاج وفرج عند رب العبادي