مرثية ابن طما الحربي بصياف

ياحرف شعري سوق لي طيب القاف=عساه يطفي عن فوادي هجيره
بنعي بشعري شاعر الحرف صياف=عساف صعبات الحروف العسيره
لو إن بعده نظم الاشعار تنعاف=لجله علم فالرد محد ٍ نظيره
لكن له حق ٍ علينا وميقاف=نشهر صدى ذكراه في خير سيره
صياف شاعر عنه عجزن الأوصاف=باني نظم شعره بفكر و بصيره
عميق في معناه قصاف الأهداف=شعره كما جم البحور الغزيره
شاعر يدير الحرف من رأس مشراف=رفع بشعره صيت كل العشيره
يبني حروفه لو على ضيق محراف=دكتور في نظم القصيد و خبيره
من معجزات الرد بإجماع الأطراف=فالشعر حاز أعلى مراتب شهيره
سجل له التاريخ وأنصفه بإنصاف=على الخليج وكل صحراء الجزيره
وننعيك يامن هو للأشعار صراف=تنعيك ربعك حرب في كل ديره
و القافيه تكثر عليك التحساف=وتقول أنا صياف ماريد غيره
والملعبه فيها الخلل بان ينشاف=تمشي على عكاز عرجاء كسيره
ماهو بنقص بحق غيره ولا اجحاف=لا والذي منشي المزون الغزيره
لكن شعره دُر في قلب الأصداف=يحْمل معاني ساميات ٍ خطيره
خفيفةٍ مثل النسايم والأطياف=بتارة ٍ مثل السيوف الشطيره
أسرار حرفه صعب تعرف و تنشاف=الا بقاموس ٍ ولجنه كبيره
كم شاعرٍ قالوا بالأشعار عراف=طافت على فكره معاني كثيره
إلا على صياف محال ينخاف=امبرمج ٍ كل الشعر في ضميره
واليوم ننظم شعر والدمع ذراف=من بعد وادعناه نظرة أخيره
ننعيه وأكثر قافيتنا على آف=من حب أبو مفلح جميل السريره
ونطلبك يالله عد من حج او طاف=وعد الكواكب والنجوم المنيره
تجعل قبر صياف للخير مرياف=وتسلمه يوم الزحام وتجيره
وتحط له في جنة الخلد مضياف=وتخلي الديباج مفرش سريره
وتعوضنا بعده للأشعار عساف=خليفةٍ بعده يقود المسيره

عبدالمحسن بن طما الاسلمي الحربي