هدت الذيب

بسم الله الرحمن الرحيم

الي خذا له بالزمن هدت الذيب = تكفيه عن نبح الكلاب وغثاها
والي مضريها لحش العراقيب = ماهدها من شان يرفع ابناها
والي تقفيبه على الشك والريب = يقفي ويقبل مستمر بعماها
بالهرج وإلا لو تلف الولايب = نفسه وهي نفسه ترا مايحماها
يغز ساقه دوم بين الاصاحيب = وإلا رجال العرف تكرم الحاها
وقت الرخاء يامفتلين الاشانيب = ياشلة ٍ من شافها ماغزاها
شلة خزا ويجمعون الاكاذيب = والي طراله خزي قام ونصاها
لادين لادنيا ولاينوجد طيب = ومن فوق ذي ياشين منطق لغاها
بعد الصحيح الي به الشمس ماتغيب = في برها وبجوها ووسط ماها
المرجله ماهي سوالف واساليب = تحت السقوف الي قوي ٍ اغطاها
من لانطحها شاب من قبل لايشيب = بعد المشيب إن رامها مالقاها
ماكل من يغزي لفاء بالمكاسيب = والنار يكفي عن لهبها سناها
مايوّجب الي مايعرف المواجيب = وبعض الضروس تضيم حتى جماها
والي وقع في قاسيات المخاليب = عن دائها ليته بحث عن ادواها
ولافتر فكر الي تسما لواعيب = الي تضيّع شمسها في ضحاها
والي ضحك باسنان والنص تركيب = الحب يطحن كان دارت رحاها
يصيب من عنده للاهداف تصويب = يل البندق الي ثايره في اخباها
والغيب مابه واحد ٍ يعلم الغيب = الا الكريم الي بعالي سماها

فايزموسى البشري