نواٍ تلاعج بالمثاني بروقه

ياالله طلبتك غر مزنٍ مزابير = نوٍّ تلاعج بالمثاني بروقه
برقه يشق المزن كنه فنانير = دهمٍ مواخيره وغرٍ وسوقه
البرق يبرق والرعد له زماجير = والريح بنفاس النسايم تسوقه
مزنٍ يلاعب كل شما شناضير = ينثر ادقاق الودق منخل فتوقه
مابه برد والا عجاج ومعاصير = سحٍّ وتسكابٍ تواصل دفوقه
سحاب وسميٍّ تدافع مناحير = يضفي على نجد العذيّة حقوقه
سيله يجنّب عن قديم المعابير = يومي بعيدان الشجر من عروقه
ستين ليلة مرزماتٍ مهادير = ليلٍ غطى شمس النهار بغسوقه
حتى نبات الأرض غطى العثامير = وقامت تغطرف بالروابي اعذوقه
عشبٍ على البيداء فروعه مزاهير = يضيع بدريّ البهم في طروقه
الأرض خضراء والمحاجر مغادير = والريح ذعذاع القفاري نشوقه
مراتعٍ لبست احللها مقافير = تبري جروحٍ بالضمير امحروقة
وصارت لعشّاق الطبيعة تباشير = واللي بغى المقناص حضّر علوقه
ركبوا على مترفّعٍ كنه الزير = يضرب على الدرب الخطر مايعوقه
سرّوه يوم ملابطين الغنادير = كلن بنومه محكماتٍ اوثوقه
على الطريق المختصر خطرن ايطير = لا اعرض مساره كنه الحزم فوقه
قبل يطير من العشاش العصافير = والشمس في برج الشروق امخنوقة
ياطا على غض الوسوم المباكير = يفوح ريان الشذى من عنوقه
فوقه اهل الهقوات ماهم مثابير = كل ابلجٍ كيف النشامى يشوقه
في ديرةٍ فيها الزبيدي مغارير = تطرب رفيع الذوق ويطيب ذوقه
هاذي وصايف عشقتي يأهل الخير = وكلن حسب عشقه يشوف امعشوقه

نافع الحربي[/center]

الشاعر الكبير

نافع الحربي

صح لسانك وعتلا شانك

قصيده جزله من شاعر جزل

الله يرزق البلاد والعباد بالحيا الضافي

تقبل مروري يابن العم الغالي

الابداع والشعرفي هذا النص مكانه
صح لسانك يانافع وبيض الله وجهك

البرق يبرق والرعد له زماجير = والريح بنفاس النسايم تسوقه
مزنٍ يلاعب كل شما شناضير = ينثر ادقاق الودق منخل فتوقه
مفردة حصرية

ابيات خالدة لقد احتفل الشعر بهذه الدرة الثمينة

صح السانك لاهنت ولاهان منطوقك

واللهم لاتخيب من طلبك واسق البلاد والعباد

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح السانك وبيض الله وجهك
شاعرنا القدير / نافع الحربي
ودمت بهذا الابداع

	المشاركة الأصلية كتبت بواسطة سعد المحمدي

	الشاعر الكبير نافع الحربي صح لسانك وعتلا شانك قصيده جزله من شاعر جزل الله يرزق البلاد والعباد بالحيا الضافي تقبل مروري يابن العم الغالي

شاعرنا الموقر سعد المحمدي
هلابك أنار متصقحي في وجودك يابن العم
الله لايهينك

اهلا وسهلا وعودا حميدا شاعرنا الغالي نافع الحربي وين الغيبات يارجل


ومليون مليون صح السانك على هالعصماء

واعتلا شانك


واللهم اجعله مطر خير ورحمه

وتقبل دعاء اخينا نافع النافع واكفنا
مثل هذا السيل :

سـيـلـه يـجـنّـب عـــن قـديــم المـعـابـيـر
يـومـي بعـيـدان الشـجـر مـــن عـروقــه

واجعله اللهم في بطون الاوديه ولاتجنبه مجاريه

وارزقنا مطر رحمة وسقيا



تحيتي وتقديري

	المشاركة الأصلية كتبت بواسطة ابوهليل

	الابداع والشعرفي هذا النص مكانه صح لسانك يانافع وبيض الله وجهك

ابو هليل هلابك يابن العم وصح بدنك وجهك بيض
قد سرني حضورك الله لايهينك

	المشاركة الأصلية كتبت بواسطة الكحيلة

	البرق يبرق والرعد له زماجير = والريح بنفاس النسايم تسوقه مزنٍ يلاعب كل شما شناضير = ينثر ادقاق الودق منخل فتوقه مفردة حصرية ابيات خالدة لقد احتفل الشعر بهذه الدرة الثمينة صح السانك لاهنت ولاهان منطوقك واللهم لاتخيب من طلبك واسق البلاد والعباد

شاعرتنا القديرة الكحيلة
شكرا لك وصح بنك قد سرني حضورك في
متصفحي الله لايهينك