ديوان الشاعر تركي العبيد الشاماني

البارحه جاني لعين منهرش=يالين صرت اسمع من الضيقه وشيش
ان كزني من طنخ راسي قلت هش=وان سبني قلت اللعين يقول ويش
ان شاف له ذيبن يقانب ينخرش=وان ذاق من مر الغضاره له طريش
ادهشني الله يقلعه يوم اندهش=مني ومش رويسه براسي مشيش
ان قام له نظره تبين في الغبش=يفرق الخيل الاصيل من الكديش
اليا تسند نعبو حيه عطش=واليا تحدر قال يابن الناس طيش
هيمان من سود الليالي منكمش=واليا مشا تسمع مع المشيه كريش
يودني لكن من بعد انكرش=ان كان ماضر العرب خله يعيش
لولا الطناخه وسط ربعه يبتلش=يوسم على خشمه وفي خده لطيش
ماقلت له ياكود ماحب الغشش=خل العلاقه طيبه يابو نشيش
ان جيت في سوق الشواوي والدبش=اسمع لعلك ماتقوم ابطش بطيش
من يوم شفتك تنثني مثل الحنش=وتفح لين افح ثم تنغش نغيش
قلت الله انه ياخذ العود الهشش=يريح الملعون في ظل العريش
اليا تولشك الوليش من الولش=راسي يشيش وراسك الاغبر يشيش
ياقوه صبره لتظاهر بالطنش=تقدح عيونه شر لاشاف الوليش
يطشني عند الكهوف اليا طفش=ويطير للرجم الطويل بدون ريش
عمامته فوق الكتوف ابو حشش=يقش من حوله من العالم قشيش
اليا هرج من فوق راسي ينفقش=حكيم ينبش علمنا كله نبيش
اليا سالته تعلم الغيب؟ارنبش=والغيب عند اللي خلقنا يالغشيش
خدشت قلبه يوم مثله مانخدش=واصبح بعد لديت له هش وخريش