(( شاب الفكر))

البارحة مانمت ليلي ولانام=مظنون عيني نون عيني والاهداب
احيان اناظر خلف واحيان قدام=وآقول صدق الحكي والحكي كذاب
احكم على نفسي بنفسي بالاعدام=وافتح على نفسي ملاين الابواب
احلم وانا صاحي وتفسير الاحلام=بيني وبينه باب والقفل فالباب
المستريح اللي بلا فكروالهام=لايطلبه احدٍ ولاهو بطلاب
والا الشقي اللي بلا درع وحزام=اللي رصيدة خالٍ منه الاصحاب
دنياك يابن آدم مقادير واقسام=والآخره معروف للاولى حساب
انعام ماتنفعك ياهيه الانعام=والعين مايملى حدقها سوى تراب
ماحدٍ من العالم على صدرة وسام=والنار قالوا مالها غير شباب
الفرق بين الناس ماهو بالاجسام=والعيب مايستره غترة وجلباب
العام مدري عام الاول قبل عام=يوم ابتدت في ساحة القدس الانشاب
بعد العراق استسلمت مات صدام=واستبشرت طهران من بعد ماغاب
من قبلها كابول ومن بعده الشام=والبث حصري في قنوات الارهاب
المتهم معروف صاروخ قسام=والجرح عيت لاتداويه الاعشاب
اعلام تآتي بعدها اعلام واعلام=المشكلة فينا وفينا للاغراب
اسلامنا باطن وظاهره الاسلام=ظاهر ومعلن باطنه عنه الاظراب
انلام لو ماقلت هيا اصحو انلام=شاب الفكر والقاف للحين ماشاب