ديوان الشاعرة مستورة الأحمدي {وله}

القصيدة التي شاركت فيها في الدورة الثالثة لشاعر المليون

في مان الله يا أرض القصيد وياسما الشعّار =في مان الله يا نجمٍ حبسني الدمع عن شوفه
في مان الله يا حلم بقصيدة تلفت الأنظار =تمايل فوق صفحة نور بالتصفيق مزفوفه
قصيدة صدرها فتنة,قصيدة عجزها إبهار =قصيدة تطلق إحساسك وهي بالوزن مكتوفه
قصيدة يوم يعزفها الألم وعروقك الأوتار =تظن أنك على مسرح ونبضك صار معزوفه
تدق فقلب من ناظر خطاها والمفاتن طار =ترقص كل أطرافه برعشة نفس ملهوفه
قصيدة عقدها معلن بعز وغيرها مسيار =قرينة سعد للإبداع عليه بواو معطوفه
خطبها والمهر وده, كشف لعيونها الأسرار =وسلّمها زمام الشعر يحكم وزنها حروفه
يفز لحرفها الجالس من التقدير والإكبار =قذاة فعين حاسدها ,وكحل عيون مطروفه
في مان الله يا ليلة قمرها ألهم السُمّا ر =وأنا عن شرفة أحلامي بسلطة عيب موقوفه
في مان الله يا فرصة فقدها الراغب المحتار =يجامل والثمن حريته ,ويقول مخلوفه
يغرد فوق غصني الشعر وان مرّ الهوى به طار =يهاب الشوك في غصن تدلى يتبع قطوفه
يمد الكف ليدين الضيا من خلف ظهر جدار =ويطلب فزعته في درب بالاخطار محفوفه
يمرجح في القصيدة قلب وحبال الخيال قصار =ينادى العاشق اللي له دروب الوصل مرصوفه
نصبت العمر له خيمة في برده والمشاعر نار =وقطع شوقي سواد الليل واقف يفرك كفوفه
يردد يا عسى الغايب يجي مشفوع بالأعذار =يحيي منتظر وصله بجملة غير مألوفه
في امان الله يا قصة غياب الفارس المغوار =فمان الله يا فرحة ويا طرحة وغطروفه