ديوان الشاعر عبدالله عتيق الحنيني

النفس دايم للخطايا اماره=محدن عن الزلات بمزكيها
أحيان اجاهدها واصد الغاره=واكثر مرار اطيعها وارضيها
اكره خطا نفسي واحب انكاره=مابرهن الزله وكابرفيها
وابليس متقن فالغرور ادواره=على أدم أبو ابنادم امشيها
يسوقنا للذنب تاره تاره=كم نفس ملعون الثوا مغويها
لسدل على قبح الذنوب ستاره=شين الذنوب ومرها يحليها
ونفسن تطيعه باالدجا منهاره=تباعته مع سكته مخزيها
بوار والدنيا معه بواره=ماتلحق أولها والاتاليها
كم واحدن فيها معمر داره=قفا وداره ماتمتع فيها
أمسا جنازه في يد القباره=روحن خذاها الله وهو واليها
يومن به المولى العزيز اختاره=والروح لاجا الموت من يذريها
مابين جنات الاله وناره=من قدم الحسنه يبايلاقيها
ماهي غنات التاجر وفكساره=ياراعي الحسنه تجود فيها
كلن حسب زرعه يحوش ثمار=واللي غرس له غرستن يجنيها
على السراط اروحنا مراره=والنار حسب اعمالنا نعديها
عساي مع من خاتمت مشواره=من خاتمتها خير من ماضيها
لجا نهارالميمنه ويساره=بيضن صحايفنا نماري فيها
ياراحم المخلوق بالكفاره=عوراتنا بثيابنا موريها
عناثقيل الذنب حط اوزاره=وعظم الذنوب برحمتك ترميها
وسقنا على دربن تشع انواره=ونفسن تضل بقدرتك تهديها
عبدن رجا الله واحتما بجواره=والناس لاخايف والاراجيها
من صد عني ماتقصا أخباره =والناس عز أنفوسهامغنيها
مخلوق من ما مهين أطواره=له قوتن حكم الدهر يفنيها
وكلن بها الدنياوله مقداره=بصدورنا تبقا ولا نطريها
وبعض الصدور قبور للحفاره=وصدورلوتبحث بدا خافيها
ماتتعب العساس والسباره=شفافتن يطمع بها قاريها
يفرح بها الي والمن منشاره=بالكذب دايم ذمته مهفيها
طيرن يحوش الشر في منقاره=على وخام الغيبه مضريها
أن هامه السربوت نط أجداره=وان جاته الضيفان مايقريها
قبيض قرشه مايفوت أصراره=مشفوح بالأولى وماياليها
تاجر وناره ميته بوجاره=بدري عساه يروح ويخليها
يفنا وراع الطيب تبقا أذكاره=سوالف اهل الطيب مع راويها
والفرق في سبك الذهب وعياره=والا التنك ماونست شاريها
والوقت هذا من يشق غباره=كلن يقول القوس انا باريها
وعند الولي خاف الزمن واسراره=هو موجد العله وهومبريها