ديوان الشاعر// عبدالعزيز بن حمود ابالعون

أنا يشير اللي يريد البشاره = زانت وجت ليه على كيف ماريد
اليوم جوي صافيٍ من غباره = يا ويلكم يأهل الكبود المغاديد
يا ويلكم من جد ماهي عياره = ياللي علينا توجهون البواريد
خصٍ به اللي يختفي بالستاره = ويكفن المرحوم من غير تشهيد
خله على كبدة تزيد الحراره = لا عل ماله عند ربه مشاحيد
خطو البليد اللي كبارٍ قفاره = يفرح ليا صارت مشاكل وتنكيد
على هواء نفسه يسوي قراره = لاشك ما ياصل مثل غيره الميد
علي من يمناي لا أقصر هجاره = حتى يطاوع بالشكيمه اليا قيدك
بالعنف والا الطيب ماهو بكاره = هذا جزا اللي ينقل الهرج ويزيد
واليا صفت لي مع مدير الإداره = ما همني هرج الخبول الملابيد
كلٍ على كيفه يوجه قطاره = ذولي محاديرٍ وذولي مسانيد
الشامخ اللي يستوي للأماره = حقٍ على زيارته بأول العيد
حقٍ على أزيارته واعتباره = بالخط الأول دايمٍ بأول السيد
شيخ الشيوخ اللي براسه نعاره = وصفه مثل هداج شيخ المواريد
ما هو رسٍ ممتلي من دماره = دايم على جاله حيام المفاريد
هداج هو هداج مابه غياره = حصلت له الشهره بليا تماجيد
حصلت له الشهرة وزاد اشتهاره = على فطاحل نجد ذكره تراديد
مثلك ليا وصفت والعلم شاره = يا شيخنا عند اختلاف المواعيد
أنته لنا درعٍ قويٍ وساره = أصله من الفولاذ ما هو تقاليد
أصله من الفولاذ ما هو عماره = صافي حديده ما حصل فيه تسويد
من ساس ما فيكم من العيب تاره = وأخير ما بالأرض تال الأجاويد
عسى لهم في كل ديره وحاره = تالي ولتالي رسوم ومواليد
يا شيخ يارع الفخر والكباره = قد جاك من غيري قصايد وتأييد
أنته مثل حرٍ على راس قاره = من ماكرٍ طيره جريءٍ على الصيد
النادر اللي يستوي للصقاره = يأخذ على جول الحباري ملاكيد
دايم على كفه تشوف الحماره = يفرس ولا يفرس ولا له طواريد
تم الكلام اللي نويت اختصاره = ياريف هتاش الخلا والرواويد
من جاك مايلقاك عند السماره = يلقاك وسط البيت عند البغاديد
يلقاك حول الكيف عند المناره = بمسودسٍ فوق مرفع تقل حيد
أكبر ليا وصفت من حيد صاره = مبني على روس العيال البواليد
عيال عودٍ سار وأنهى مساره = على النقا والصدق ما هي هرابيد
على النقا والصدق والانهصاره = دون الضعيف اللي حدوه المقاريد
ليا وقفوا قدام باب الوزاره = ويبست من الذله حلوق الرعاديد
يقلط على وضح النقا بأختياره = مدفع بني سالم سريع التساديد
اللي سريعه ثورته وانفجاره = على الهدف ما هو على غير تأكيد
كلٍ شهد له بالوفاء والجداره = عسى له الفردوس منزل وتخليد
عقب لنا نمرٍ تهاب النماره = شوفه ليا صارت وعايد وتهديد
رباح فيه من العيا والسطاره = ما يكدي العدوان لو هم صناديد
نحشم على شانه بحشمة وقاره = وناطا على روس الأفاعي بلاقيد
ما فيه مثله بالدهاء والشطاره = زايد على غيره بليا تحاديد
عندي وكلٍ له سفير وسفاره = وأظن مافيها عليه مناقيد
واللي تهيا العام جعله وداره = عن سيرة الماضي تجوز التصاديد
هذي سواة السوق ربح وخساره = ما هي على راسي ولا راس أبو زيد

الشاعر / عبدالعزيز بن حمود أبالعون رحمه الله

تل قلبي تلتين من العموقي = تلة اللي تلته عدوٍ سمينه
تل هيمن حملوه من القوقي = تل هيم اثعش والمكره لعينه
ليتني يا منيف ما شفت البروقي = وليتني ما رحت لضليع المكينه
راكب اللي لامشى مشيه يفوقي = ما يداني شوف ريحة بانزينه
ما يغرز في غراميل الطروقي = مثل قصاف الرعد تسمع رطينه
يلفي اللي عقبهم عفت المذوقي = ربعي اللي كل واجب ناطحينه
ربعي المزنان والحق محقوقي = يوم كلٍ عزوته تبرد كنينه
بعدهم عني عمى عيني وعوقي = وعندهم لو طحت راسي رافعينه
الجماعه يرفعون الراس فوقي = ومن يلوم بحبهم تنسد عينه
شوفهم عندي مثل شوف العذوقي = وبعدهم عني مخليني رهينه
والا أنا مبسوط من حسن الوفوقي = عند ابو هزاع ما فيه غبينه
ليتني من شان ابو هزاع روقي = من عيال ثبيت والا محالفينه
ليت جيرتنا تطول ولاتبوقي = وليتنا طول الحياه مجاورينه
جاري اللي ما يهس ولا يتوقي = ولا يحسب وش غدا له من يدينه
وأمره ربه على حسن النطوقي = وهينه نفسه عسى الله لايهينه
صافيٍ قلبه على الجيره شفوقي = مني البيضاء على غرة جبينه
مع عيال ثبيت منزالي وسوقي = اشتري وابيع كني بالمدينه
شيخهم مسلط ليا هاب الطفوقي = كم سجين زال كربة والادينه
مخلبٍ صياد في كف صفوقي = عادته صيد الجليله خابرينه
كل ما زادت سنيني زاد شوقي = عندهم حيث القصير مدلهينه
رفقتهم طيب وانا معهم رفوقي = جارهم ماراح منهم مزعلينه
ما حدً مني ضاق ولاني ضيوقي = يوم خطو اللاش نفسه ما تعينه
همشريٍ مهنته كثر الطقوقي = دايمً تصغر عيونه من قرينه
ما غدا له حق مير انه سلوقي = كلب مغرابٍ تربص في خزينه
نا يعرف اللازمات من الحقوقي = ولا يميز وش عدوه من خدينه
ولو بغينا الزنق للخبل الزنوقي = ما حسبنا ويش ربعه من ثمينه
ما ندرا عن علومً ما تلوقي = ولا نرد الراس يمه حاقرينه

البارحة ليلي سواياه فيه = ما تنتسوى يا سلايل دغليب
ضاقت على فجوج نجد الفضيه = وأقصى مشاويري من الدار للسيب
وأقوم واقعد بين هذي وذيه = مستانسٍ وناسة الجن والذيب
من علةٍ وسط الحشا داخليه = مقرها بين الضلوع المحاديب
بين الضلوع اللي عليها محنيه = منها معاليق الضماير عباعيب
وش رايكم يا محللين القضيه = دعواي سريه وداخلني الريب
خايف وخوفي من فعايل يديه = ونفسي تراودني على شقة الجيب
والناس منذ كانت الجاهليه = لهم وعليهم يابو ناصر مواجيب
أنت الحكيم اللي فعولك قويه = رجال عرف وماضيٍ لك تجاريب
فيك الشجاعه والكرم والحميه = وأضن ما بك غير ذلي عذاريب
لا والذي بالدين شرف نبيه = الواحد اللي يعلم السر والغيب
إنك من الوافين والعبقريه = بالقول والا مانصيناك بمصيب
تكفى يابو ناصر بع الأرض ليه = بارت وأنا محتاج حاجة معازيب
بارت وأنا محتاج لي وعليه = لي وعليه للجماعه مطاليب
ولا أنت يا ربيعان خذها هديه = عندك ولا عند الوجيه المغاضيب
عندك ولا عند الوجيه الدنيه = عفون الرجال قريبين المحاضيب
والا أنت مثل الحربه العنقريه = مضرابها يفوق كل المضاريب
عندي ولا فيها عليه خطيه = يا كامل الثنتين يا منقع الطيب
بيتك مشيد لون قارة طميه = مبني على شيمه وقيمه وترتيب
على الشرف والطيب والشاذليه = بيتٍ يزورونه جماعه وأجانيب
ينصونه العربان من كل نيه = على الطريق ولا لهم عنه تجنيب
يوصف على هداج شيخ الجويه = دايم وقطعانه ترك المغاريب
يردنه القطعان صبح وعشيه = وضحن عليهن من غلاهن دباديب
تفوح أنابيعه ويزتاد ميه = ما هو برسٍ ما يسر الدغاليب
ما قيل وراده يحول خويه = على غريفٍ كل نصه غثاريب
هداج تيماء اللي تصافق دليه = كلٍ قصدبه من حضوف اللواعيب
مثلك ليا وصفت وأنته حليه = عندي ولا فيها عليه مناقيب

الشاعر / عبدالعزيز بن حمود أبالعون رحمه الله