ديوان الشاعر : شريف بن راكب الفريدي

ياحبني لاهل النوايا السليمه=اللي مثل غيثٍ يعزّل نفيضه
عند الحشام تشوف نفسك حشيمه=وعند الليام يقال مافيك عيضه
من لادعى النفس لهواها خصيمه=يشوف من نوع الخطا مايغيضه
لي سيرةٍ هي تاج راسي قديمه=حملتها قدام حمل الحفيظه
نفسي لها عندي معزه وقيمه=واخاف يكسرها الغلط كسر بيضه
ما زتها مع كل طاري عزيمه=واعدها وسط المحافل حضيضه
اخشى يجي من لايعرف الوسيمه=اللي يشيّل له فشقةٍ نقيضه
تثور من حظي واحصل قسيمه=وابقى ورا قصه طويله عريضه
اليا انسحبت يقال شاف الهزيمه=ويحبك سداها بالسلوك الغليظه
وتساوت الذله معي والجريمه=واصبح حدى الامرين مثل الفريضه
اليا اعترض قدمي خطات البهيمه=ذبحه حرام وتركتي له غميضه
بعض القصور يعوض به سمل خيمه=لياصار تلقى به قلوبٍ مريضه
بعدك عن اللي مايودك غنيمه=وفراق من قلد خلايف قريضه
لويمسح المجرم دموع اليتيمه=تشوف نظرات العيون البغيضه

[/quote]