ديوان الشاعر/لافي بن نفجان الحربي

سامرت نجم ٍ سرى البارح على القمّه=وارجح الفال واملـي غيـر متشايـم
رجواي باللي امر عيسى شهد لأمّـه=نفس ٍ توكل علـى الله مالهـا ظايـم
نشت القريحه وجت للفكـر منظمّـه=وانا على المفردات الشـرد متهايـم
لا تلومني يارفيـع الـراس والهمّـه=وصفة علاجي بعيطـا جوهـا غايـم
ابي ليـا رف قلبـي ونهشـه همّـه=قبل يسوق الصباح ولزمـة الصايـم
ليا غطس من غطاه النوم في جمّـه=شغلت جيب ٍ مجهـز للسفـر دايـم
فكسار قطع الخلاء والبعـد ماهمّـه=مايقعد ليا اشتغل في صوتـه النايـم
ليـا تريـح بترسـه واتصـل دمّـه=كنه من اعلا المنصـه للهدف قايـم
عليه وصف الشجاع اللي نسف كمّه=ماتاخذه دون وجهـه لومـة اللايـم
هومة حنيش ٍ براسه يصطلي سمّـه=والا الاسـد القـدوم بغابتـه عايـم
وليا نويت المكـان شعـوري ملمّـه=ادل وانصـاه لـو مادربـه مـلايـم
كنه مركب علـى التمثـال مزتمّـه=تمثال جيب ٍ لراس العـرق متطايـم
ليا داست الرجل بنصه واللهب خمّـه=فرة قطـاة ٍ عليهـا حـول الحايـم
هواء المغابيش ماينساه مـن شمّـه=ومبدا الطويله علاج الخافـق الهايـم
امشي وراء هاجسي لو ابعـد اليمّـه=يزول هم ٍ بصـدري شغلـه مزايـم
ماحولي الا الكلاش لجنبـي اضمّـه=في ديرة ٍ بعدهـا والخـوف متقايـم
ولا شوف ناس ٍ خششها بس ملتمّـه=لو هم جلايب تبـور ولا لهـا سايـم
عبادة وجيه ماتحافـظ علـى الذمّـه=واللي نوى بعدهـم مايلحقـه لايـم
ناس ٍ تشيل الحسـد بقلـوب مخمّـه=عنهم وعن مثلهم لو اضحكوا شايـم
واجنـب المتهـم فـي نقلـه النمّـه=واهل السقايط بعضهم للبعض رايـم
وبعض العرب لو نشوفه مانجي يمّه=من دونه الدرب ياقف سـد ومتايـم